आमोस 9

परमेश्वर उन न्याय

1ना प्रभु उक वेदी इन म्याकुच निदुर्त नोळदीन, अदिक आव अंदुन: “खंबागोळ्द स्यांडा मा बडु यदुर देल सपर्‍यागोळ आळगाळुल, अदिक अवरी सप्पा लॉकुर ताल्ला मा केडुकु तुकळा तुकळा माळ; अदिक जो नष्ट आगोर देल ऊळदार, आंदरी ना तलवार देल घात माळाईन; आंदुर दा टु ऊंद भी ओळ सकतीदील, अदिक जो तान इक ऊळस्यान, आव ऊळु सकतीदील.

2“यतिकी चाहे आंदुर अगुळकु अधोलोक दा ईळ्दोगुल, तरी ना अल टु कय वाळुस्कु आंदरी तराईन; चाहे आंदुर आकाश मा येरेगुल, तरी ना अल टु आंदरी ईळ्सकु तराईन. 3चाहे आंदुर कर्मेल दा होचकोमुल, लेकीन अल भी ना आंदरी ढुंढ ढुंढ्सकु हुडु कोमाईन, अदिक चाहे आंदुर समुद्र अन खोल दा नान नजर देल दुर आगुल, अल भी ना हाव इक आंदरी फन होडोद आग्या कोळाईन. 4चाहे दुश्मन आंदरी जुप्सकु गुलामी दा ओयुल, अल भी ना आग्या कोटकु तलवार देल आंदरी घात माळाईन; अदिक ना आंदुर मा भलाई माळोर साटी ईला, बुराई इच माळोर साटी नजर तिर्गुसाईन.”

5सेनागोळव परमेश्वर यहोवा अन मुटदुर देल धरती पिघलुसतद,

अदिक अदुर सप्पा ईरावाळेर विलाप माळतार;

अदिक अद सप्पा च्या सप्पा मिस्त्र अन गांगा अन घाई आगेतद,

जो वाळुसतद,

अदिक गोर्त आगेगतद.

6जो आकाश दा तान मान्ना बनुसतान,

अदिक तान आकाश मण्डल इन पायवा धरती मा हाकतान,

अदिक आग्या कोटकु समुद्र अन नीर धरती मा वाहुस बुळतान,

आऊंदा हेसुर यहोवा आद.

7“हे इस्त्राएलीगोळा,” यहोवा अन ईद वाणी आद, “येन नीव नान साटी कूशिगोळ घाई हैलेच? येन ना इस्राएल इक मिस्त्र द्याश टु अदिक पलिश्तीगोळी कप्तोर टु तेगुकु तंदिदील? अदिक अरामीगोळी कीर टु तंदिदील? 8नोळी, परमेश्वर यहोवा अन नजर ई पापमय राज्य मा हतकु आद, अदिक ना ईदरी धरती मा टु नाश माळाईन; तरी भी पुरा रिति देल याकूब उन घराना अन नाश माळतीदील,” यहोवा अन ईदा वाणी आद.

9“नान आग्या देल इस्राएल इन घराना सप्पा राज्यगोळ दा हींग चाल्सकु आदीत ह्यांग अनाज चालनी दा चाल्सकु आगतद, लेकीन अदुर्द ऊंद भी पुष्ट दाना जमीन मा बिळतीदील. 10नान प्रजा दाकळोर सप्पा पापी जो अनतार, ‘आ विपत्ति नाम मा बिळतीदील, अदिक नामी घेर्सतीदील,’ आंदुर सप्पा तलवार देल कोंदकु आदार.

इस्राएल इन पुनर्निमाण

11“आ समय ना दाऊद उन बिदकु झोपड़ी इक निद्रुसाईन, अदिक आऊन वाळा अन दरारगोळी सुधरूसाईन, अदिक आऊन खण्डरगोळी मात्त बनुसाईन, अदिक ह्यांग आव प्राचीनकाल दा ईरोन, आऊक हांगा बनुस बुळाईन; 12यदुर देल आ ऊळ्द एदोमीगोळी उलटा सप्पा राज्यगोळी जो नान हेसुर देल कारूकु आगताव, तान अधिकार दा ताकोमुल,” यहोवा जो ई क्याल्सा पुरा माळतान, आऊन ईदा वाणी आद.

13यहोवा अन ईद भी वाणी आद,

“नोळी, समय बरेत्याद याग

फसल कडावाळा कटाई खतम भी माळ सकतीदील

कि नागर नळसावाळा होट बंदान;

बींजा बोऊसावाळा अन बोऊसोद पुरा भी आगतीदील

कि अंगुर मेट्टावाळा होट बंदान,

पहाळीगोळ दा टु सय अंगुर इन रास्सा टपकुसित,

अदिक सप्पा पहाळीगोळ अदुर दा मुळ्केदाव.

14ना तान प्रजा इस्राएल इन बंदीगोळी वापस तराईन,

अदिक आंदुर ऊजळुस्द नगरगोळी मात्त बनुस्कु अऊर दा ईत्तार;

आंदुर अंगुर इन बेली हचकु अऊर काय तिंदार.

15ना आंदरी, आंदुर्दा जमीन दा बोऊसाईन,

अदिक आंदुर तान जमीन दा टु जो ना आंदरी कोटीन, बाक यागलु कितकु आगतीदील,”

नीम परमेश्वर यहोवा अन ईदा वचन आद.