आमोस 8

कायगोळ देल तुम्द फुट्टी इन दर्शन

1परमेश्वर यहोवा नानी ईद तोर्सदुन: कि बिसुल माळग्या अन कायगोळ देल तुम्द ऊंद फुट्टी आद. 2आव अंदुन, “हे आमोस, नीनी येन कांळ्सकु बिळतद?”

ना अंदीन, “बिसुल माळग्या अन कायगोळ देल तुम्द ऊंद फुट्टी.”

आग यहोवा नान से अंदुन, “नान प्रजा इस्राएल इन अन्त होट बंदाद; ना ईग अदरी मात्त बिळतीदील.” 3परमेश्वर यहोवा अन वाणी आद, “आ दिशी मंदिर इन हाळ हाहाकार दा बदलुसेदाव, अदिक लाशगोळ्द धोळ्द डुंबर हत्तीत; अदिक सप्पा जागागोळ दा अव सुंगामुंगा भिटकु आगेदव.”

इस्राएल इन पतन

4ईद केळी, नीव जो कंगालगोळी मेट्टोद अदिक द्याश इन पिड़ीत लॉकुरी नष्ट माळोद चाहासतीर, 5जो अनतीर, “व्हासा चाँद इन दिन याग होदीत कि नाव अनाज मार सक्केव? आराम दिन याग बितुसीत, यदुर देल नाव तान गोदी मारली तर सक्केव, नाव तराजु उन बट इक हिंग माळ कोंडेव कि लॉकुरी ठगुस सक्केव. 6कि नाव कंगालगोळी पैस्या कोटकु, अदिक दरिद्रगोळी कवळी इन दाम मा कोंड कोंडेव, अदिक गाडर्या हतकु अनाज मारेव?”

7यहोवा, याकूब उन घमण्ड, आवा तान किर्या तिनकु अनतान, “ना नीम यातोदारा क्याल्सा अक यागलु मारूतिदील. 8येन ई कारण जमीन नळ्गतीदील? येन अऊर माकळोर सप्पा ईरावाळेर विलाप माळतीदील? ईद द्याश सप्पा च्या सप्पा मिस्त्र अन नील गांगा अन घाई आदीत, जो वाळुसतद, अदिक गोर्त आगेगतद.”

9परमेश्वर यहोवा अन ईदा वाणी आद, “आ समय ना सुर्य अक हागुल इन होती अस्त माळाईन, अदिक ई द्याश इक हाट्टा हागुल अंधार माळ बुळाईन. 10ना नीम हाब्बगोळ्द उत्सवगोळी दुर माळकु विलाप माळसुसाईन, अदिक नीम सप्पा हाळगोळी दुर माळकु विलाप इन हाळ हाळसुसाईन; ना नीम सप्पा मुंदुर्द कटि दा शोक इन फळक्या हाकसुसाईन, अदिक नीम सप्पा मुंदुर्द ताल्लागोळी टक्कल माळाईन, अदिक हींग विलाप माळसुसाईन ह्यांग ऊंदठेसा अन साटी आगतद, अदिक अदुर अन्त कठिन दुख इन दिन इन घाई आदीत.”

11परमेश्वर यहोवा अन ईद वाणी आद, “नोळी, ईत्ता दिन बरेत्याव, याग ना ई द्याश दा अकाल कळाईन; अदुर दा हस्तकु रा ईत्तार लेकीन अनाज इन साटी ईला अदिक निरळ्कु रा ईत्तार लेकीन नीर इन साटी ईला, लेकीन यहोवा अन वचनगोळी केळोद अच हसु निरळ्क ईत्तीत. 12लॉकुर यहोवा अन वचन इन खोज दा समुद्र टु समुद्र ताका अदिक उत्तर टु पूर्व ताका लंग लंग वयाळ्यार, लेकीन आऊन खोज माळ सकतीदील.

13“आ समय सुन्दर कुवारा पोरगोळ अदिक हारोदोर पारगोळ येढ्ढु मुंदुर निरळ्क इन मारा देल मुर्छित आदार. 14जो लॉकुर सामरिया अन पापमूल, अदिक, ‘दान इन द्याव उन जिन्दगी इन किर्या, अदिक बेर्शेबा अन पंथ! इन किर्या, तिनतार आंदुर सप्पा बिद्दार, अदिक बाक येळतीदील.’”