१ कुरिन्थि 9

प्रेरितगोळ्द अधिकार अदिक कर्तव्य

1येन ना आजाद हैलेच? येन ना भी प्रेरित आल्लच? येन ना यीशु उक जो नामव प्रभु हुन, नोळीदील? येन नीव प्रभु दा नांद मेहनत इन प्रतिफल आल्लच. 2अगर ना दुसरा अन्द साटी प्रेरित आल्लच, तरी भी नीम साटी रा हुईन; यतिकी ना परमेश्वर उन क्याल्सा माळदीन, नीम प्रभु दा एकता अच नान प्रेरित आगोद प्रमाण आद.

3जो नानी जाँच तार, आंदुर साटी ईदा नांद उत्‍तर आद. 4येन नामी कमाई माळकु तिनोद कुडोद अधिकार ईलच? 5येन नामी ईद अधिकार ईलच, कि यातारा मसीह आकतींग इन सांगुळ मदा माळकु आक इक हुळकु टेटेव, ह्यांग दुसरा प्रेरित अदिक प्रभु उन वार्ट अदिक कैफा माळतार? 6या सिर्फ नानी अदिक बरनबास उक अच कमाई माळकु तिनोद अधिकार ईलच. 7हिंग याव आन जो तांद अच खर्च मा सेना दा स्यावा माळतान? याव आन जो अंगुर इन केई हचकु अदुर्द काय तिनालुन? हिंग याव आन जो म्यांडागोळ्द रखवाली माळकु अऊर्द हाल कुडालुन?

8येन ना ईव मातगोळ मंळसागोळ्द अच रीति मा अनतीन? यतिकी व्यवस्था अन्द किताब दा ईदा मात लिख्सकु आद. 91येन व्यवस्था ईद अनाल्द? यतिकी मूसा अन्द व्यवस्था दा लिख्सकु आद, “दावन दा नळुतेला वस्ता अन्द बाय कट बाळेतीर.” येन परमेश्वर वस्तागोळ्द अच चिन्ता माळतान? 10या विशेष माळकु नाम साटी अनतान. हा नाम साटी अच लिख्सकु आग्याद, यतिकी उचित आद कि नांगर नळसावाळा आशा देल केई नळसुल, अदिक दावन कोळावाळा फसल सिक्‍कोद आशा देल दावनी माळुल. 112याग नाव नीम्द साटी आत्मिक मातगोळ बोऊसदेव, अदिक अगर नाव आ शारीरिक वस्तुगोळ्द फसल कडुतेव, रा येन अद धोळ्द मात आद. 12अगर नीम मा दुसरा लॉकुर अधिकार जतुसतार, रा येन नाम्द नीम मा यक्कुल अधिकार हैलेच?

तरी भी नाव ई अधिकार इन इस्तेमाल माळीदिल, लेकीन नाव सब येनारा सहन माळतेव कि नाम्द द्वारा मसीह अन खुशखबरी दा अळचन बरबाळुल. 13येन नीव जान्सालीर कि जो मंदिर दा स्यावा माळतार, आंदुर मंदिर दा टु तिनतार; अदिक जो वेदी इन स्यावा माळतार, आंदुर वेद इन भेंट इन सहभागी आगतार? 143ईदा रीति देल प्रभु भी ठहरूसदुन कि जो लॉकुर खुशखबरी केळ्सतार, आंदुर जीविका खुशखबरी देल आगुल.

15लेकीन ना इदुर दा टु यातोदारा भी मात इक क्याल्सा दा तंदिदील, अदिक ना ईव मातगोळ इदुरसाटी लिख्सीदिल कि नांद साटी हिंग माळुल, यतिकी इदुर देल रा नांद सायोद अच भला आद कि यावारा नांद घमण्ड इक बेकार ठहरूसुल. 16अगर ना खुशखबरी केळसाईन, रा नांद साटी येनु घमण्ड इन मात आलच; यतिकी ईद रा नांद साटी जरूरी आद. अगर ना खुशखबरी ईला केळसाईन, रा नान मा हाय! 17यतिकी अगर तान इच्छा देल ईद माळतीन रा मजदूरी नानी सिकतद, अदिक अगर तान इच्छा देल माळालीन तरी भी परमेश्वर नानी ईद सौप्सदुन अदिक ईदा नांद कर्तव्य हुन. 18रा नांद मजदूरी येन हुन? ईद कि याग ना खुशखबरी प्रचार माळाईन रा अदरी फुकट दा माळाईन, अदिक खुशखबरी दा जो नान अधिकार आद अदरी पुरा रीति देल उपयोग दा ईला तराईन.

19यतिकी ना मंळसागोळ से आजाद आईन तरी भी ना तान तान इक सप्पा मुंदुर्द दास माळ कोंडीन कि हापाळ लॉकुरी परमेश्वर उन राज्य दा तर सकुल. 20ना यहूदीगोळ साटी यहूदी आदीन कि यहूदीगोळी परमेश्वर उन राज्य दा तर सकुल. जो लॉकुर मूसा अन्द व्यवस्था अन्द हात्‍ती आर आंदुर साटी ना व्यवस्था अन्द हात्‍ती ईला आगदुर मा भी व्यवस्था अन्द हात्‍ती आदीन कि आंदरी जो व्यवस्था अन्द हात्‍ती आर, आंदरी भी परमेश्वर उन राज्य दा तर सकुल. 21जो व्यवस्थारहित आर आंदुर साटी ना यीशु मसीह जो परमेश्वर उन व्यवस्था देल रहित आईन, व्यवस्थारहित-सा आगेदीन कि जो व्यवस्थारहित आर आंदरी भी परमेश्वर उन राज्य दा तर सकुल. 22ना निर्बलगोळ साटी निर्बल सा आगेदीन कि निर्बलगोळी जिक्सकु तराईन. ना सब मंळसागोळ साटी सब येनारा बन्सदीन कि यातोद ना यातोद रीति देल यावारा ऊंद मंळसा अन्द उद्धार माळसुसाईन.

23ना ईद सब येनारा खुशखबरी इन साटी माळतीन कि दुसरा अन्द सांगुळ अदुर्द भागी आगेगाईन. 24येन नीव जान्सालीर कि दवळ दा रा सप्पा अच वोळतार, लेकीन ईनाम ऊंदा मंळसा वोयतान? नीव भी ई प्रकार देल वोळी कि नीव जीत्स सकी. 25आळोद प्रतियोगिता दा भाग ताकोमावाळा हर ऊंद खिलाळी सप्पा प्रकार इन संयम ईटतान. आव रा नाश आगोद हार इन प्राप्ती इन साटी ईद सप्पा येनारा माळतार, लेकीन नाव रा आ मुकुट साटी माळतेव जो मुरझुसाल. 26इदुरसाटी ना रा ईदा रीति देल हरूतीन, लेकीन लक्ष्यहीन ईलच; ना भी ईदा रीति देल बुक्‍की देल आळतीन, लेकीन अदुर घाई ईला जो हवा पीट्सतेला आळतान. 27लेकीन ना तान मय इक बडुतीन कुटतीन अदिक वश दा तरतीन, यागल्यारा हिंग ना आगबाळुल कि दुसरा अक प्रचार माळकु ना खुद अच यातोदारा रीति देल निकम्मा ठहरूसाईन.