१ कुरिन्थि 8

मूर्तिगोळी येर्सकु आगोद आमली काण्णा

1ईग मूर्तिगोळ्द मुंद बली माळ्द भोजन वस्तुगोळ्द बारा दा नाव जान्सतेव कि नाव सप्पा मुंदरी ग्यान आद.

ग्यान घमण्ड पैदा माळतद, लेकीन प्यार देल उन्नती आगतद. 2अगर यावारा समसुल कि ना येनारा जान्सतीन, रा ह्यांग जान्सोद पायजे हांगा ईग ताका जान्सालुन. 3लेकीन अगर यावारा परमेश्वर से प्यार ईटतान, रा परमेश्वर आऊक अरूतान.

4इदुरसाटी मूर्तीगोळ्द मुंद बली माळ्द वस्तुगोळ्द तिनोद बारा दा नाव जान्सतेव कि मूर्ति इन दुनिया दा येनु अस्तित्व ईलच, अदिक आऊक बिटकु याऊ परमेश्वर ईलच. 5इदुरसाटी आकाश दा अदिक पृथ्वी मा हापाळ सा “द्याव” कहलुसतार. ह्यांग कि हापाळ सा द्याव अदिक हापाळ सा “प्रभु” आर. 6तौभी नाम साटी रा ऊंद अच परमेश्वर आन: मतलब आप्प याऊन दी टु सप्पा वस्तुगोळ माळकु आग्याव, अदिक नाव आऊन साटी आयेव. अदिक आव ऊंद अच प्रभु आन, मतलब यीशु मसीह याऊन द्वारा सप्पा वस्तुगोळ माळकु आव, अदिक नाव भी आऊन द्वारा माळकु आगेव.

7लेकीन सप्पा मंळसागोळी ईद ग्यान ईलच, लेकीन येनारा लॉकुर ईग ताका मूर्ति इन संपर्क दा ईत्‍तुर कारण ईग ताका बली कोळ्द वस्तु अक हिंग तिनतार मान्सी खराखुरा मूर्ति इन मुंद बली माळकु आग्याद, अदिक आऊन विवेक निर्बल आगोद कारण अशुध्द आगेगतान. 8ऊमोद नामी परमेश्वर उन हात्‍ती पहुचुसाल्द. अगर नाव तिनतीदील रा नाम्द येनु हानि ईलच, अदिक अगर तिनदेव रा येनु लाभ ईलच.

9लेकीन सावधान! हिंग आगबाळुल कि नीम्द ईद आजादी ईदारा निर्बलगोळ साटी ठोकर इन कारण आगेगुल. 10अगर यावारा मंळसा नीन घाई ग्यानी इक मूर्ति इन मंदिर दा ऊमतेला नोळ्यान अदिक आव निर्बल जन आगुल रा येन इदुर देल आऊन विवेक इक मूर्ति इन मुंद बली माळ्द वस्तु तिनोद हिम्मत आगतीदील. 11ई रीति देल अपमान ग्यान इन कारण आव निर्बल वार्ट यार्द साटी मसीह सोत्‍तुन, नाश आगेदान. 12ई प्रकार वार्टगोळ विरूद्ध अपराध माळदुर देल अदिक आदुर्द निर्बल मन इक दुख पोहचुसदुर देल, नीव मसीह अन्द विरूद्ध अपराध माळतीर. 13ई कारण अगर ऊमोद नान वार्ट उक ठोकर तिनसीत, रा ना यागलु यातारा रीति देल मॉदरा तिनतीदील, ना आगुल कि ना तान वार्ट उन साटी ठोकर इन कारण बनसाईन.