Haryanvi Bible
जकर्याह 9
इस्राएल का दुश्मनां तै बचाव
हद्राक देश कै बारै म्ह यहोवा का कह्या होया भारी वचन जो दमिश्क के शहर पै भी पड़ैगा। क्यूँके यहोवा की नजर माणस जात की, अर इस्राएल के सारे गोत्रां की और लाग्गी सै; हमात के शहर की और जो दमिश्क के शहर कै धोरै सै, अर सोर अर सीदोन की और, ये तो घणेए बुद्धिमान सैं। सोर नै अपणे खात्तर एक गढ़ बणाया, अर धूळ के किणक्यां की तरियां चाँदी, अर सड़कां की कीच की तरियां बढ़िया सोन्ना बटोर राख्या सै। देक्खो, परमेसवर उसनै औरां के हक म्ह कर देवैगा, अर उसके घमण्ड नै तोड़कै समुन्दर म्ह गेर देवैगा; अर वो नगर आग का निवाळा हो जावैगा।
यो देखकै अश्कलोन का शहर डरैगा; गाज़ा के शहर नै दुःख होवैगा, अर एक्रोन का शहर भी डरैगा, क्यूँके उसकी उम्मीद टूट्टैगी; अर गाज़ा म्ह फेर राजा ना रहवैगा अर अश्कलोन फेर बसी ना रहवैगी। अश्दोद के शहर म्ह अनजाणे माणस बसैंगे; इस्से तरियां मै पलिश्तियाँ के गर्व नै तोड़ूँगा1। मै उसके मुँह म्ह तै शिकार का लहू अर घिनोणी चीज लिकाड़ देऊँगा, फेर उन म्ह तै जो बच्या रहवैगा, वो म्हारे परमेसवर का जन होवैगा, अर यहूदा म्ह अधिपति जिसा होगा; अर एक्रोन के माणस यबूसियाँ की तरियां बणैगें। परमेसवर नै कह्या, “फेर मै उस सेना के कारण जो धोरै तै होकै जावैगी अर फेर बोहड़ आवैगी, अपणे भवन के लोवै-धोरै छावणी करे रहूँगा, अर कोए सताण आळा फेर उनके धोरै तै होकै ना जावैगा, क्यूँके मै ये बात इब भी देक्खूँ सूं।”
सिय्योन का आण आळा राजा
हे सिय्योन के माणसों घणेए मगन हो। हे यरुशलेम के माणसों जयजयकार करो! क्यूँके तेरा राजा तेरे धोरै आवैगा; वो धर्मी अर उद्धार पाया होया सै2, वो दीन सै, अर गधे पै बलके गधी के बच्चे पै चढ़या होया आवैगा।3 मै एप्रैम के रथ अर यरुशलेम के घोड़े नाश करुँगा; अर युद्ध के धनुष तोड़ गेरे जावैंगे, अर वो गैर जातियाँ तै शान्ति की बात कहवैगा; वो समुन्दर तै समुन्दर ताहीं अर महानद तै धरती के दूर-दूर के देशां ताहीं प्रभुता करैगा।4
प्रभु अपणे लोग्गां नै बचावैगा
तू भी सुण, क्यूँके मेरा करार के लहू कै कारण, मन्नै तेरे कैदियाँ ताहीं बिना पाणी के खड्डे म्ह तै उभार लिया सै।5 हे उम्मीद धरे होए कैदियों! गढ़ की और मुड़ो; मै आज ए बताऊँ सूं के मै थारे ताहीं बदले म्ह दुगणा सुख देऊँगा।
क्यूँके मन्नै धनुष की तरियां यहूदा ताहीं चढ़ाकै उसपै तीर की तरियां एप्रैम ताहीं लगाया सै। मै सिय्योन के बासिन्दया नै यूनान के बासिन्दया कै खिलाफ उभारूँगा, अर उननै वीर की तलवार जिसा कर देऊँगा। फेर यहोवा उनके माणसां के उप्पर दिखाई देवैगा, अर उसका तीर बिजळी की तरियां छूटैगा; अर परमेसवर यहोवा नरसिंगा फूँक कै दक्षिण देश की जिसी आँधी म्ह होकै चाल्लैगा। सेनाओं का यहोवा ढाल तै उननै बचावैगा, अर वे अपणे बैरियाँ का नाश करैंगे, अर उनके गोफन के पत्थरां पै पैर धरैंगे; अर वे पीकै इसा शोर-सराबा करैंगे जिसा माणसां दाखमधु पीकै करै सैं; अर वे कटोरे की तरियां या वेदी के कुण्यां की तरियां भरे जावैंगे।
उस बखत उनका परमेसवर यहोवा उननै अपणी प्रजारूपी भेड़-बकरी जाणकै उनका उद्धार करैगा; अर वे मुकुटमणि ठहरकै, उसकी धरती तै घणे ऊँच्चे पै चमकदे रहवैंगे6। उसका कितना घणाए कुशल, अर उसकी कितनी ए घणी शोभा होवैगी! उसके जवान माणस अन्न खाकै, अर कुमारियाँ नया दाखमधु पीकै हट्टे-कट्टे हो जावैंगी।
Source notes (6)
- Footnote पलिश्तियाँ के गर्व नै तोड़ूँगा गर्व अपणे देश की बर्बादी तै बच जावैगा, अपणे शहरां पै कब्जा करैगा, आजादी कम होवैगी। यो उनकी राष्ट्रीयता की हानि तै न्ही बचैगा; क्यूँके वे खुद ओड़ै के माणसां न्ही होवैंगे, जिननै अपणे लाम्बे वंश अर इस्राएल पै अपणी जीत पै गर्व था।
- Footnote वो धर्मी अर उद्धार पाया होया सै यो उसके व्यक्तित्व की महिमा एवं सिद्धता सै के सिध्द जन उसनै देक्खै अर उसकी स्तुति करै।
- Footnote मत्ती 21:5; यूह. 12:14-15
- Footnote इफि. 2:17; भजन. 72:8
- Footnote मत्ती 26:28; निर्ग. 24:8; 1 कुरि. 11:25
- Footnote वे मुकुटमणि ठहरकै, उसकी धरती तै घणे ऊँच्चे पै चमकदे रहवैंगे परमेसवर के बैरी पैरां तळै रौंदे जावैंगे क्यूँके एक सर्वनिष्ठ बात अपणी पूर्ति तै चूक गी, वे कीमती मणि ठहरैगें, राजा का अभिषिक्त राजदण्ड होवैंगे
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.