Haryanvi Bible
जकर्याह 10
यहूदा अर इस्राएल का दोबारा बसाया जाणा
बरसात के अन्त म्ह यहोवा तै बारिस माँगों, यहोवा तै जो बिजळी चमकावै सै, अर वो उननै बारिस देवैगा अर हर एक के खेत म्ह हरियाली उपजावैगा। क्यूँके गृहदेवता अनर्थ बात कहवैं अर भावी कहण आळे झूठ्ठा दर्शन देक्खैं अर झूठ्ठे सपने सुणावै, अर बेकार की शान्ति देवैं सै। इस कारण माणस भेड़-बकरियाँ की तरियां भटकगे1; अर पाळी के ना होण कै कारण बुरी हालत म्ह पड़े सै।2
“मेरा छो पाळीयाँ पै भड़क्या सै, अर मै उन अगुवां नै सजा देऊँगा; क्यूँके सेनाओं का यहोवा अपणे झुण्ड यानिके यहूदा के घरान्ने का हाल देखण ताहीं आवैगा, अर लड़ाई म्ह उन ताहीं अपणा हट्टा-कट्टा घोड़ा जिसा बणावैगा। यहूदा म्ह तै कुणे का पत्थर, उसे म्ह तै खूँटी, उसे म्ह तै युद्ध का धनुष, उसे म्ह तै सारे प्रधान प्रगट होवैंगे। वे इसे वीरां की तरियां होवैंगे जो लड़ाई म्ह अपणे बैरियाँ नै सड़कां के चिकड़ की तरियां रौंदन्दे हों; वे लड़ैगें, क्यूँके यहोवा उनकै गैल रहवैगा, इस कारण वे वीरता तै लड़ैगें अर दुश्मन के घुड़सवारां की उम्मीद टूट्टैगी।”
“मै यहूदा के घरान्ने नै पराक्रमी करुँगा, अर यूसुफ के घरान्ने का उद्धार करुँगा। मेरे ताहीं उनपै दया आई सै, इस कारण मै उननै वापस ल्याकै उन्हे के देश म्ह बसाऊँगा, अर वे इसे होवैंगे, मान्नो मन्नै उन ताहीं मन तै न्ही उतारया3; मै उनका परमेसवर यहोवा सूं, इस करकै उनकी सुण ल्यूँगा एप्रैमी माणस वीर की तरियां होवैंगे, अर उनका मन इसा आनन्दित होगा जिसा दाखमधु तै होवै सै। यो देखकै उनके बच्चे आनन्द करैंगे अर उनका मन यहोवा के कारण मगन होवैगा।”
“मै सीट्टी बजाकै उननै इशारा दियुँगा अर कठ्ठा करुँगा, क्यूँके मै उनका छुड़ाण आळा सूं, अर वे इसे बढ़ैंगे जिस तरियां पैहले बढ़े थे। पर फेर भी मै उननै जात्ति-जात्ति के माणसां के बिचाळै बिखेर दियुँगा तोभी वे दूर-दूर देशां म्ह मेरे ताहीं याद करैंगे, अर अपणे बाळकां समेत जिन्दा बोहड़ आवैंगे। मै उननै मिस्र देश तै बोहड़ा ल्याऊँगा, अर अश्शूर तै कठ्ठा करुँगा, अर गिलाद अर लबानोन के देशां म्ह ल्याकै इतणा बढ़ाऊँगा के ओड़ै वे समा ना सकैगें। वो उस दुख दायक समुन्दर म्ह तै होकै उसकी लहर दाबदा होया जावैगा अर नील नदी का सारा ढुंघा पाणी सूख जावैगा। अश्शूर का घमण्ड ताेड़या जावैगा अर मिस्र का राजदण्ड जान्दा रहवैगा। मै मेरे माणसां नै यहोवा के जरिये पराक्रमी करुँगा, अर वे उसके नाम तै चाल्लै-फिरैंगे,” यहोवा की याए वाणी सै।
Source notes (3)
- Footnote माणस भेड़-बकरियाँ की तरियां भटकगे जिनका पाळी ना होण कै कारण या उननै भटकाण आळा पाळी होण कै कारण बन्धुवाई म्ह ले जाकै दूर करया गया।
- Footnote मत्ती 9:36; हब. 2:18-19
- Footnote वे इसे होवैंगे, मान्नो मन्नै उन ताहीं मन तै न्ही उतारया परमेसवर सदा वर्तमान का परमेसवर सै वो आध्धी माफ न्ही देन्दा। परमेसवर उनके अपराध अर पाप कदे याद न्ही करैगा। वो पश्चातापी माणस नै उसका खोया होया अनुग्रह पुनः प्रदान करै सै जिसा के वो उसतै कदे वंचित ना होया हो, अर उन ताहीं नए अनुग्रह तै भर देवै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.