Haryanvi Bible
श्रेष्ठगीत 5
हे मेरी भाण, हे मेरी दुल्हन,
मै अपणे बाग म्ह आया सूं,
मन्नै अपणा गन्धरस अर बलसान छाँट लिया;
मन्नै शहद समेत छात्ता खा लिया,
मन्नै दूध अर दाखमधु पी लिया।
सहेलियाँ
हे साथियो, थम भी खाओ,
हे प्यारों, पियो, जी भरकै पियो!
चौथा गीत
दुल्हन
मै सोया करुँ थी, पर मेरा मन जाग्या करदा।
सुण! मेरा प्रेमी खटखटावै सै, अर कहवै सै,
“हे मेरी भाण, हे मेरी प्यारी, हे मेरी कबूतरी,
हे मेरी निर्मल, मेरै खात्तर दरबाजा खोल,
क्यूँके मेरा सिर ओस तै भरया सै,
अर मेरी लटें रात म्ह गिरी होई बूँदां तै भीज्जी सै।”
मन्नै अपणे कपड़े तार लिए थे मै उस ताहीं फेर किस तरियां पैहरु?
मन्नै तो अपणे पैर धो लिए थे इब उन ताहीं किस तरियां मैल्ला करुँ?
मेरे प्रेमी नै अपणा हाथ किवाड़ के छेद तै भित्तर डाल दिया,
फेर मेरा मन उसकी खात्तर उमड़ उठ्या।
मै अपणे प्रेमी कै खात्तर दरबाजा खोलण उठी,
अर मेरे हाथ्थां तै गन्धरस टपक्या,
अर मेरी आँगळियाँ पै तै टपकदा होया गन्धरस कुण्डे की मूठां पै पड़या।
मन्नै अपणे प्रेमी कै खात्तर दरबाजा तो खोल्या
पर मेरा प्रेमी मुड़कै चल्या गया था।
जिब वो बोलण लाग रह्या था, तब मेरा जी घबरा ग्या था
मन्नै उस ताहीं टोह्या, पर न्ही पाया,
मन्नै उस ताहीं पुकारया, पर उसनै किमे जवाब न्ही दिया।
पैहरेदार जो नगर म्ह घूम्या करै थे, मन्नै मिले,
उननै मेरे ताहीं मारया अर घायल करया,
शहरपनाह के पैहरेदारां नै मेरी चाद्दर मेरे तै खोस ली।
हे यरुशलेम की बेटियों, मै थमनै कसम, खुवाकै कहूँ सूं, जै मेरा प्रेमी थमनै मिल जावै,
तो उसतै कह दियो के मै प्रेम म्ह रोग्गी सूं।
सहेलियाँ
हे बिरबानियाँ म्ह घणी सुथरी
तेरा प्रेमी और दुसरयां के प्रेमियाँ तै किस बात म्ह बढ़कै सै?
तू क्यूँ म्हारे ताहीं इसी कसम देवै सै?
दुल्हन
मेरा प्रेमी गोरा अर ताकतवर सै,
उसके बराबर कोए कोंनी1।
उसका सिर खरा सोन्ना सै,
उसकी लटकदी होई लटें काग की तरियां काळी सै।
उसकी आँख उन कबूतरां की तरियां सै जो
दूध म्ह नाह्के नदी के किनारे
अपणे झुण्ड म्ह एक कतार म्ह बैठ्ठे होए हों।
उसके गाल फूलां की फुलवाड़ी अर बलसान
की उभरी होई क्यारी सै।
उसके होठ सोसन फूल सै जिन म्ह तै पिंगळ्या होया गन्धरस टपकै सै।
उसके हाथ फीरोजा जड़े होए सोन्ने की छड़ सै।
उसकी देह नीलम के फूलां तै जड़े होए हाथी दाँत का काम सै।
उसके पैर कुन्दन पै बिठाए होए संगमरमर के खम्भे सै।
वो देक्खण म्ह लबानोन अर खूबसूरती म्ह देवदार के दरखत की तरियां मनभावणा सै।
उसकी बोल्ली घणी मिठ्ठी सै, हाँ वो घणा सुन्दर सै।
हे यरुशलेम की बेटियों, योए मेरा प्रेमी अर योए मेरा मित्तर सै।
Source notes (1)
- Footnote मेरा प्रेमी गोरा अर ताकतवर सै, उसके बराबर कोए कोंनी मेरा प्रेमी लाल और गोरा सा सै, वो दस हजारां म्ह एक सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.