Haryanvi Bible
श्रेष्ठगीत 4
हे मेरी प्यारी तू सुन्दर सै, तू सुन्दर सै!
तेरी आँख तेरी लटां कै बीच म्ह कबूतरां
की तरियां दिखाई देवै सै।
तेरे बाळ उन बकरियाँ के झुण्ड की तरियां सै
जो गिलाद पहाड़ की ढळाण पै लेट्टी होई हो।
तेरे दाँन्त ऊन कतरी होई उन भेड्डां के झुण्ड की तरियां सै,
जो नाह्के उप्पर आई हो, उन म्ह तै हर एक के दो-दो जुड़मा बच्चें होवै सै।
अर उन म्ह तै किसे का भी साथी न्ही मरया।
तेरे होठ लाल रंग की डोरी की तरियां सै,
अर तेरा मुँह मन नै भाण आळा सै,
तेरे कपोल तेरी लटां कै नीच्चै
अनार की फाँक जिसी दिक्खै सै।
तेरा गळा दाऊद की मीनार के समान सै,
जो अस्त्र-शस्त्र कै खात्तर बण्या हो, अर जिसपै हजार ढाल टांग्गी होई हो,
वे सारी ढाल शूरवीरां की सै।
तेरी दोन्नु छात्ती मृग के दो जुड़मा बच्यां की तरियां सै,
जो सोसन फूलां कै बीच म्ह चरदे हो।
जिब तक दिन ठण्डा ना हो, अर छाया लाम्बी आन्दे-आन्दे मिट ना जावै,
तब ताहीं मै तावळा सा गन्धरस के पहाड़ अर लोबान की पहाड़ी पै चल्या जाऊँगा।
हे मेरी प्यारी तू सर्वांग सुन्दरी सै;
तेरे म्ह कोए खोट कोनी।
हे मेरी दुल्हन, तू मेरे गैल लबानोन तै,
मेरे गैल लबानोन तै चाल्ली आ।
तू अमाना की चोट्टी पै तै,
सनीर अर हेर्मोन की चोट्टी पै तै,
शेरां की गुफा तै, चीत्यां के पहाड़ां पै तै नीच्चै उत्तर कै आ1।
हे मेरी भाण, हे मेरी दुल्हन, तन्नै मेरा मन मोह लिया सै,
तन्नै अपणी आँख की एके झलक तै,
अर अपणे गळे के एके हीरे तै मेरा मन मोह लिया सै।
हे मेरी भाण हे मेरी दुल्हन, तेरा प्यार, कितना मनभावणा सै!
तेरा प्यार दाखमधु तै भी बढ़िया सै,
अर तेरे इत्रां की खुशबु सारे ढाळ के मसाल्यां की खुशबु तै!
हे मेरी दुल्हन, तेरे होठां तै शहद टपकै सै;
तेरी जीभ के नीच्चै शहद अर दूध रहवै सै,
तेरे कपड़ेयां की खुशबु लबानोन की तरियां सै।
मेरी भाण, मेरी दुल्हन, किवाड़ लाग्गे होए बाग की तरियां,
किवाड़ बन्द करया होया चोवा, अर छाप लगाया होया झरणा सै।
तेरे अंकुर बढ़िया फळ आळे अनार के बाग की तरियां सै,
जिस म्ह मेंहदी अर जटामासी,
जटामासी अर केसर,
लोबान के सारी ढाळ के दरखत, मुश्क अर दालचीनी,
गन्धरस, अगर, और सारे बढ़िया-बढ़िया खुशबुदार-द्रव्य होवै सै।
तू बाग्गां का चोवा सै,
फूटदे होए पाणी का कुआँ,
अर लबानोन तै बहन्दी धारा सै।
दुल्हन
हे उत्तर की हवा उठ, अर हे दक्षिण हवा चाल्ली आ!
मेरे बाग पै बह, जिसतै उसकी खुशबु फैलै।
मेरा प्रेमी अपणे बाग म्ह आवै,
अर उसके बढ़िया-बढ़िया फळ खावै।
Source notes (1)
- Footnote नीच्चै उत्तर कै आ निगांह कर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.