Haryanvi Bible
भजन संहिता 99
पवित्रता खात्तर स्तुतिगान
यहोवा राजा होया सै; देश-देश के लोग काँपगे!
वो करूबां पै बैठ्या सै; धरती डोल उठै!
यहोवा सिय्योन म्ह महान सै;
अर वो देश-देश के माणसां कै उप्पर प्रधान सै।
वो तेरे महान अर भययोग्य नाम का धन्यवाद करै!
क्यूँके वो तो पवित्र सै।
ताकतवर राजा न्याय तै प्यार करै सै,1
तन्नै ए सच्चाई ताहीं लाग्गू करया सै;
न्याय अर धर्म ताहीं याकूब म्ह तन्नै ए चाल्लूँ करया सै।
म्हारे परमेसवर यहोवा नै सराहो;
अर उसके पैरां की चौकी कै स्याम्ही दण्डवत करो!
क्यूँके वो पवित्र सै!
उसके याजकां म्ह मूसा अर हारुन,
अर उसके प्रार्थना करण आळयां म्ह तै शमूएल यहोवा नै पुकारै था, अर वो उनकी सुण लेवै था।
वो बादळ के खम्भे म्ह हो कै उनतै बात करया करदा;
अर वे उसकी चितौनियाँ अर उसकी दी होई विधियाँ पै चाल्या करदे।
हे म्हारे परमेसवर यहोवा तू उनकी सुण लेवै था
तू उनके काम्मां का पलटा तो लेवै था
फेर भी उन खात्तर माफ करण आळा परमेसवर था।
म्हारे परमेसवर यहोवा नै सराहो,
अर उसके पवित्र पर्वत पै दण्डवत करो;
क्यूँके म्हारा परमेसवर यहोवा पवित्र सै!
Source notes (1)
- Footnote ताकतवर राजा न्याय तै प्यार करै सै राजा ताकतवर सै अर वो न्याय तै प्यार करै सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.