Haryanvi Bible
भजन संहिता 46
परमेसवर म्हारा शरणस्थान
प्रधान बजाण आळे खात्तर कोरहवंशियों का, अलामोत की राग पै एक गीत
परमेसवर म्हारा शरणस्थान अर ताकत सै,
संकट म्ह आसान्नी तै मिलण आळा मददगार।
इस कारण हमनै कोए डर कोन्या चाहे धरती
उल्ट जावै,
अर पहाड़ समुन्दर के बीच म्ह गेर दिए जावै;
चाहे समुन्दर का पाणी गरजै अर झाल उठ्ठै,
अर पहाड़ उसकी बाढ़ तै काँप उठ्ठै। (सेला)
एक नदी सै जिसकै पाणी तै परमेसवर के
नगर म्ह
यानी परमप्रधान के पवित्र भवन नै
आनन्द होवै सै।
परमेसवर उस नगर के बीच म्ह सै, वो कदे
टळण का कोन्या;
पौ फटते ही परमेसवर उसकी मदद करै सै।
जात्ति-जात्ति के माणस झल्ला उठे, राज्य-राज्य
के माणस डगमगाण लाग्गे;
वो बोल उठ्या, अर धरती पिघळगी।
सेनाओं का यहोवा म्हारै गैल सै;
याकूब का परमेसवर म्हारा ऊँच्चा गढ़ सै। (सेला)
आओ, यहोवा के बड़े-बड़े काम्मां नै देक्खो,
के उसनै धरती किस ढाळ विरान
करी सै।
वो धरती की छोर तक लड़ाईयाँ नै मिटावै सै;
वो धनुष नै तोड़ै, अर भाल्लै के दो टुकड़े करदे सै,
अर लड़ाई के रथां नै आग म्ह झोंक देवै सै!
“चुप हो जाओ1, अर जाण ल्यो के मै ए परमेसवर सूं।
मै जातियाँ म्ह महान सूं,
मै पूरी दुनिया म्ह महान सूं!”
सेनाओं का यहोवा म्हारै गैल सै;
याकूब का परमेसवर म्हारा ऊँच्चा गढ़ सै। (सेला)
Source notes (1)
- Footnote चुप हो जाओ लड़ाई बन्द करो
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.