Haryanvi Bible
भजन संहिता 128
परमेसवर का भय मान्नण तै आशीष
यात्रा का गीत
कितना धन्य सै हर एक वो माणस जो यहोवा का भय मान्नै सै,
अर उसकी राह पै चाल्लै सै!
तू अपणी कमाई नै जरुर खाण पावैगा;
तू धन्य होवैगा, अर तेरा भलाए होवैगा।
तेरे घर कै भित्तर तेरी घरआळी फळ देण आळी अंगूर की बेल की तरियां होवैगी;
तेरी मेज कै च्यांरु ओड़ तेरे बाळक जैतून के पौध्यां की तरियां होवैगें।
सुण जो माणस यहोवा का भय मान्ने सै,
वो इस्से तरियां आशीष पावैगा।
यहोवा थमनै सिय्योन तै आशीष देवै,
अर तू जीवन भर यरुशलेम की सलामती देख्दा रहवै।
बलके तू अपणे दोत्ते पोत्यां नै भी देखण पावैगा।
इस्राएल नै शान्ति मिलै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.