Haryanvi Bible
भजन संहिता 115
एक सच्चा परमेसवर और मूर्ति
हे यहोवा, म्हारी न्ही, म्हारी न्ही, पर अपणे ही नाम की महिमा,
अपणी करुणा अर सच्चाई कै मुताबिक कर।
जात-जात के माणस क्यूँ कहण पावै,
“के उनका परमेसवर कित्त सै?”
म्हारा परमेसवर तो सुर्ग म्ह सै;
उसनै जो चाह्या वो करया सै।
उन सारे लोग्गां की मूर्ति सोन्ने-चाँदी की तो सै,
वे माणसां के हाथ्थां की बणाई होई सै।
उनकै मुँह तो सै पर वे बोल न्ही सकदी;
उनकी आँख तो सै, पर वे देख न्ही सकदी।
उनकै कान तो सै, पर वे सुण न्ही सकदी;
उनकै नाक तो सै, पर वे सूंघ न्ही सकदी।
उनकै हाथ तो सै, पर वे छू न्ही सकदी;
उनकै पैर तो सै, पर वे चाल न्ही सकदी;
अर उनके गळे तै कोए आवाज न्ही लिकड़ सकदी।
जिस तरियां वो सै उसे तरियां उनके बणाण आळे भी सै;
अर उनपै भरोस्सा राक्खण आळे भी सारे उसे तरियां हो ज्यांगे।
हे इस्राएल, यहोवा पै भरोस्सा राख!
तेरा मददगार अर ढाल वोए सै।
हे हारुन के कुण्बे, यहोवा पै भरोस्सा राख!
तेरा मददगार अर ढाल वोए सै।
हे यहोवा के डरण आळेयो, यहोवा पै भरोस्सा राक्खो!
थारा मददगार अर ढाल वोए सै।
यहोवा नै म्हारे ताहीं याद करया सै; वो आशीष देवैगा;
वो इस्राएल के घरान्ने नै आशीष देवैगा;
वो हारुन कै घरान्ने नै आशीष देवैगा।
के छोट्टे के बड़े
जितने परमेसवर तै डरणिये सै, वो उननै आशीष देवैगा।
यहोवा थमनै अर थारे वंश नै और भी घणाए बढ़ावैगा।
यहोवा जो अकास अर धरती नै बणाण आळा सै,
उसकी ओड़ तै थमनै आशीष पाई सै।
सुर्ग तो यहोवा का सै,
पर धरती उसनै माणसां ताहीं दी सै।
मरे होये जितने चुपचाप पड़े सै,
वो तो परमेसवर की स्तुति न्ही कर सकदे,
पर हम लोग परमेसवर नै
इब तै लेकै सदा ताहीं धन्य कहवागें।
परमेसवर की स्तुति करो!
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.