Haryanvi Bible
नीतिवचन 13
बुद्धिमान बेट्टा पिता की शिक्षा नै सुणै सै,
पर मखौल करण आळा फटकार नै भी न्ही सुणदा।
भला माणस अपणी बात्तां कै कारण बढ़िया चीज खाण पावै सै,
पर बिश्वासघाती माणसां का पेट दंगे-फसाद तै भरै सै।
जो अपणे मुँह की चौकसी करै सै, वो अपणी जान की हिफाजत करै सै,
पर जो घणा बोल्लै सै, उसका नाश हो जावै सै।
आलसी का जी आस तो करै सै, पर उसनै कुछ न्ही मिलदा,
पर मेहनती की सारी अभिलाषा पूरी हो जावै सै।
धर्मी झूठ्ठी बात तै बैर राक्खै सै,
पर दुष्ट अपणी शर्मिन्दगी का कारण हो जावै सै, अर शर्मिन्दा हो जावै सै।
धार्मिकता खरी चाल चालण आळे की हिफाजत करै सै,
पर पापी अपणी दुष्टता कै कारण उखड़ जावै सै।
कोए तो धन कठ्ठा करै सै, पर उसके धोरै कुछ न्ही रहन्दा,
अर कोए धन उड़ा दे सै, तोभी उसकै धोरै भतेरा रहवै सै।
धनी माणस की जान की छुड़ौती उसके धन तै हो सै,
पर कंगाल इसी धमकी नै सुणदा भी कोनी।
धर्मियाँ का चाँदणा खुशी गैल चमकै सै,
पर दुष्टां का दीवा बुझ जावै सै।
घमण्ड तै सिर्फ झगड़े होवै सै,
पर जो माणस सलाह मान्नै सै, उनकै धोरै बुद्धि रहवै सै।
धोक्खे तै कमाया धन तावळा खतम हो जावै सै,
पर जो अपणी मेहनत तै कठ्ठा करै सै, उसकै बढ़ोतरी होवै सै।
जिब आस पूरी होण म्ह देर होवै सै, तो मन उदास हो जावै सै,
पर जिब आस पूरी हो जावै सै, तो जीवन का पेड़ लाग्गै सै।
जो वचन नै तुच्छ जाणै सै, उसका नाश हो जावै सै,
पर हुकम नै मानण आळा नै आच्छा फळ मिलै सै।
बुद्धिमान की शिक्षा जीवन का चोवा सै,
अर उसकै कारण माणस मौत कै फंदे तै बच सकै सै।
समझदारी कै कारण दया होवै सै,
पर धोक्खेबाज माणसां का राह मुश्किल होवै सै।
बुद्धिमान माणस तो समझ तै काम करै सै,
पर मूर्ख अपणी मूर्खता फैलावै सै।
दुष्ट दूत मुसीबत म्ह ए फँस्या रहवै सै,
पर बिश्वासयोग्य दूत मिलाप करवावै सै।
जो शिक्षा नै सुणी-अनसुणी करै, वो कंगाल होवै सै अर निरादर पावै सै,
पर जो डाँट नै मान्नै सै, उसकी बड़ाई होवै सै।
लालसा का पूरा होणा तो जी नै मिठ्ठा लाग्गै सै,
पर बुराई तै हटणा, मूर्खां कै जी नै बुरा लाग्गै सै।
बुद्धिमानां की संगत कर, तो तू भी बुद्धिमान हो जावैगा,
पर मूर्खां का साथी नाश हो जावैगा।
विपत्ति पापियाँ कै पाच्छै लाग्गी रहवै सै,
पर धर्मियाँ नै आच्छा फळ मिलै सै।
भला माणस अपणे नात्ती-पोत्यां खात्तर सम्पत्ति छोड़ जावै सै,
पर पापी की सम्पत्ति धर्मी कै खात्तर राक्खी जावै सै।
कमजोर माणसां नै खेत्ती-बाड़ी म्ह तै भोत खाण-पीण की चीज मिलै सै,
पर अन्याय तै उस ताहीं हड़प लिया जावै सै।
जो अपणे बेट्टे पै छड़ी न्ही चलान्दा वो उसका बैरी सै,
पर जो उसतै प्यार राक्खै, वो उसनै जतन तै शिक्षा देवै सै।
धर्मी भर पेट खाण पावै सै,
पर दुष्ट भूक्खे रह जावै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.