Haryanvi Bible
नीतिवचन 12
जो शिक्षा पाण म्ह प्यार राक्खै सै वो ज्ञान तै प्यार राक्खै सै,
पर जो डाँट तै बैर राक्खै सै वो डांगर जिसा मूर्ख सै।
भले माणस तै तो यहोवा राज्जी होवै सै,
पर बुरी युक्ति करण आळे नै वो दोषी ठहरावै सै।
कोए माणस दुष्टता कै कारण टिक न्ही सकदा,
पर धर्मियाँ की जड़ कोनी उखड़ै।
भली जनान्नी अपणे धणी का मुकुट सै,
पर जो बेशर्मी के काम करै सै, मान्नो वा उसके हाड्डां कै सड़ण का कारण होवै सै।
धर्मियाँ की सब कल्पना न्याय की ए हो सै,
पर दुष्टां की तरकीब धोक्खा-धड़ी की हो सै।
दुष्टां की बातचीत घात लगाण कै समान हो सै,
पर भले माणस अपणे मुँह की बात तै छुड़ाणआळे हो सै।
जिब दुष्ट माणस का नाश होवै सै तो उनका नामो-निशान मिट जावै सै,
पर धर्मियाँ का घर टिक्या रहवै सै।
माणस की बुद्धि कै मुताबिक उसकी बड़ाई होवै सै,
पर बुरा माणस तुच्छ जाण्या जावै सै।
जिसकै धोरै खाण खात्तर रोट्टी तक न्ही रहन्दी,
पर अपणे बारै म्ह डींग मारै सै, उसतै नौक्कर राक्खण आळा साधारण माणस भी बढ़िया सै।
धर्मी माणस अपणे पशु की जान की भी सुधि राक्खै सै,
पर दुष्टां की दया भी निर्दयता सै।
जो अपणी धरती नै जोत्तै, तो वो भर-पेट खावै सै,
पर जो निठल्ले की संगत करै, वो बेअक्ले ठहरै सै।
दुष्ट माणस बुरे माणसां कै लूट के माळ की आस देक्खै सै,
पर धर्मियाँ की जड़ हरी-भरी रहवै सै।
बुरा माणस अपणी कड़वी बात्तां कै कारण फंदे म्ह फंसै सै,
पर धर्मी बिप्दा तै छुटकारा पावै सै।
भला आदमी अपणी बात्तां कै फळ तै छिक्या रहवै सै,
अर जिसी जिसकी करणी उसीए उसकी भरणी होवै सै।
मूर्ख नै अपणी ए चाल सीध्धी लाग्गै सै,
पर जो दूसरा की सलाह मान्नै सै, वो बुद्धिमान सै।
मूर्ख की रिस जिब्बे दिख जा सै,
पर बुद्धिमान माणस बेजती नै भी अनदेक्खा कर देवै सै।
सच बोलण आळा, सच्ची गवाही देवै सै,
पर जो झूठ्ठी गवाही देवै, वो धोक्खा-धड़ी जाहिर करै सै।
इसे लोग भी सै जिनका बिना सोच विचार बोलणा तलवार की ढाळ चुभै सै,
पर बुद्धिमान कै बोलण तै लोग चंगे होवै सै।
सच्चाई सदा ए बणी रहवैगी,
पर झूठ पल-भर का ए होवै सै।
बुरी तरकीब सोच्चण आळयां कै मन म्ह धोक्खा-धड़ी रहवै सै,
पर मेल की युक्ति करण आळे नै खुशी होवै सै।
धर्मी नै नुकसान न्ही होन्दा,
पर दुष्ट माणस घणी बिप्दा म्ह डूब जावै सै।
झूठ्ठे माणसां तै यहोवा नै घृणा आवै सै,
पर जो ईमानदारी तै काम करै सै, उनतै वो राज्जी होवै सै।
बुद्धिमान माणस ज्ञान का दिखावा न्ही करदा,
पर मूर्ख अपणे मन की मूर्खता का प्रचार ऊँच्ची आवाज म्ह करै सै।
मेहनती माणस राज करै सै,
पर आलसी मजदूरी खात्तर पकड़े जा सै।
दुखी मन दब जावै सै,
पर भली बात तै वो राज्जी होवै सै।
धर्मी अपणे पड़ोसी नै भी राह दिखावै सै,
पर दुष्ट लोग अपणी ए चाल कै कारण भटक जावै सै।
आलसी शिकार का पिच्छा न्ही करदा,
पर मेहनती नै सारी बेसकिमती चीज मिलै सै।
धर्म की राह म्ह जीवन मिलै सै,
अर उसकी राह म्ह मौत सै ही न्ही।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.