ओबद्याह 1

एदोम पै आण आळा न्याय

1ओबद्याह का दर्शन। एदोम कै बारै म्ह यहोवा न्यू कहवै सै: हम लोग्गां नै यहोवा की और तै खबर सुणी सै, अर एक दूत गैर जातियाँ म्ह न्यू कहण नै भेज्या गया सै: 2“उठो! हम उसतै लड़ण नै उठ्ठां!” मै तेरे ताहीं जात्तां म्ह छोट्टा कर दियुँगा, तू घणा निकम्मा गिण्या जावैगा। 3हे पहाड़ां की दरारां म्ह बसण आळे, हे ऊँच्‍ची जगहां म्ह रहण आळे, तेरे घमण्ड नै तेरे ताहीं धोखा दिया सै1; तू मन म्ह कहवै सै, “कौण मेरे ताहीं धरती पै उतार देवैगा?” 4फेर भी चाहे तू उकाब की तरियां ऊँच्‍चा उडदा हो2, बलके तारागण कै बीच अपणा घोंसला बणाए हो, फेर भी मै तन्‍नै ओड़ै तै नीच्‍चै गिराऊँगा, यहोवा की याए वाणी सै।

5जै चोर डाकू रात नै तेरे धोरै आन्दे, (हाय, तू किस तरियां मिटा दिया गया सै!) तो के वे चुराए होए धन तै छिक कै चले ना जान्दे? अर जै दाख के तोड़ण आळे तेरे धोरै आन्दे, तो के वे कित्ते-कित्ते दाख न्ही छोड़ जान्दे? 6पर एसाव का धन किस तरियां टोह कै लूट्या गया सै, उसका गुप्त धन किस तरियां पता लगा-लगाकै लिकाड़या गया सै!

7जितन्या नै तेरै तै करार करया था, उन सारया नै तेरे ताहीं हद तक धकेल दिया सै; जो माणस तेरै तै मेल राक्खैं थे, वे तेरे ताहीं धोखा देकै तेरै पै हावी होए सैं; वे तेरी रोट्टी खावै सैं, वे तेरै खात्तर फंदा लगावै सै उस म्ह कुछ समझ न्ही सै। 8यहोवा की या वाणी सै, के मै उस बखत एदोम म्ह तै बुद्धिमानां नै, अर एसाव के पहाड़ म्ह तै चलाकी नै नाश न्ही करुँगा?

एदोम का उसके भाई तै गलत बरताव

9अर हे तेमान, तेरे शूरवीरां का मन कच्‍चा हो जावैगा, अर एसाव के पहाड़ पै का हर एक माणस घात होकै नाश हो जावैगा।

10हे एसाव, एक उड़दंग कै कारण जो तन्‍नै अपणे भाई याकूब पै करया, तू शर्म तै ढकैगा; अर सदा कै खात्तर नाश हो जावैगा। 11जिस दिन परदेशी माणस उसकी जायदाद खोसकै लेगे, अर पराए माणसां नै उसके फाटकां तै घुसकै यरुशलेम पै चिट्ठी गेरी, उस दिन तू भी उन म्ह तै एक था। 12पर तन्‍नै ठीक न्ही था के तू अपणे भाई कै दिन म्ह, यानिके उसकी विपत्ति कै दिन म्ह उसकी और देखदा रहन्दा, अर यहूदियाँ के विनाश के दिन उनके उप्पर खुश होन्दा, अर उनके संकट के दिन बड़ा बोल बोल्दा। 13तेरे ताहीं ठीक न्ही था के मेरी प्रजा की मुसीबत के दिन तू उसके फाटक म्ह बड़दा, अर उसकी मुसीबत के दिन उसकी बुरी हालत नै देखदा रहन्दा, अर उसकी मुसीबत के दिन उसकी जायदाद पै हाथ लगान्दा। 14तेरे ताहीं सही न्ही था के चौराहयाँ पै उसके भाजण आळे नै मार गेरण कै खात्तर खड्या होन्दा, अर संकट के दिन उसके बचे होया नै पकड़दा।

15क्यूँके सारी जातियाँ पै यहोवा के दिन का आणा नजदिक सै3। जिसा तन्‍नै करया सै, उसाए, तेरै तै भी करया जावैगा, तेरा बरताव बोहड़कै तेरे ए सिर पै पड़ैगा।

इस्राएल की आखरी जीत

16जिस तरियां तन्‍नै मेरे पवित्र पर्वत पै पिया, उसे तरियां तै सारी जातियाँ लगातार पीन्दी रहवैंगी, वे पीवैंगे अर वे निगळ जावैंगे, अर इसी हो जावैंगी जिसी कदे होई ए न्ही।

17पर उस बखत सिय्योन पर्वत पै बचे होए माणस रहवैंगे, अर वो पवित्रस्‍थान ठहरैगा; अर याकूब का घरान्‍नां अपणे खास हिस्यां का अधिकारी होगा। 18फेर याकूब का घरान्‍नां आग, अर यूसुफ का घराना लौ, अर एसाव का घरान्‍नां खूँटी बणैगा; अर वे उन म्ह आग लगाकै उननै भस्म करैंगे, अर एसाव के घरान्‍ने का कोए न्ही बचैगा; क्यूँके यहोवा ए नै इसा कह्या सै।

19दक्षिण देश के माणस एसाव के पहाड़ के अधिकारी हो जावैंगे, अर नीच्‍चै के देश के माणस पलिश्तियाँ के अधिकारी होवैंगें; अर यहूदी, एप्रैम अर सामरिया के देश नै अपणे हिस्से म्ह कर लेंगे, अर बिन्‍यामीन गिलाद का अधिकारी होगा। 20इस्राएलियाँ के उस दल म्ह तै जो माणस गुलाम्मी म्ह जाकै कनानियाँ के बीच सारफत ताहीं रहवै सैं, अर यरुशलेमियाँ म्ह तै जो माणस गुलाम्मी म्ह जाकै सपाराद म्ह रहवै सैं, वो सारे दक्षिण देश के नगरां के अधिकारी हो जावैंगे। 21उद्धार करण आळे एसाव के पहाड़ का न्याय करण कै खात्तर सिय्योन पर्वत पै चढ़ आवैंगे, अर राज्य यहोवा ए का हो जावैगा।