Haryanvi Bible
गिनती 34
कनान देश की हद
फेर यहोवा नै मूसा तै कह्या, “इस्राएलियाँ नै यो हुकम दे: के जो देश थारा हिस्सा होवैगा वो तो चौगरदे की हद तक का कनान देश सै, इस करकै जिब थम कनान देश म्ह पोहचों, फेर थारा दक्षिणी प्रान्त सीन नाम के जंगळ-बियाबान तै ले एदोम देश कै किनारे-किनारे होंदा होया चल्या जावै, अर थारी दक्षिणी हद खारे ताल कै सिरे पै शरु होकै पश्चिम कान्ही चाल्लै; ओड़ै तै थारी हद अक्रब्बीम नाम की चढ़ाई की दक्षिण की ओड़ पोहचकै मुड़ै, अर सीन तक आवै, अर कादेशबर्ने के दक्षिण की ओड़ लिकड़ै, अर हसरद्दार ताहीं बढ़कै अस्मोन तक पोहचै; फेर वा हद अस्मोन तै घूमकै मिस्र देश कै नाळे ताहीं पोहचै, अर उसका अन्त समुन्दर का तट ठहरै।”
“फेर पश्चिमी हद महासमुंदर हो; थारी पश्चिमी हद याए ठहरै।”
“थारी उत्तरी हद या हो, यानिके थम महासमुंदर तै ले होर पर्वत तक हद बाँधणा; अर होर पर्वत तै हमात की घाटी ताहीं हद बाँधणा, अर वो सदाद पै लिकड़ै; फेर वो हद जिप्रोन ताहीं पोहचै, अर हसरेनान पै लिकड़ै; थारी उत्तरी हद याए ठहरै।”
“फेर अपणी पूर्वी हद हसरेनान तै शपाम तक बाँधणा; अर वो हद शपाम तै रिबला ताहीं, जो ऐन कै पूरब कान्ही सै, तळै ताहीं उतरदे-उतरदे किन्नेरेत नाम के ताल कै पूरब तक लाग ज्या; अर वो हद यरदन नदी ताहीं उतरकै खारे ताल कै तट पै लिकड़ै। थारे देश की च्यांरु हद येए ठहरै।”
फेर मूसा नै इस्राएल के माणसां तै फेर कह्या, “जिस देश के थम चिट्ठी गेर कै हकदार होवोगे, अर यहोवा नै उस ताहीं साढ़े नौ गोत्र के माणसां ताहीं देण का हुकम दिया सै, वो योए सै; पर रूबेनियाँ अर गादियाँ के गोत्र तो अपणे-अपणे पितरां कै खानदान्ना के मुताबिक अपणा-अपणा हिस्सा पा लिया सैं, अर मनश्शे के आध्धे गोत्र के माणस नै भी अपणा हिस्सा पा लिया सैं; यानिके उन ढाई गोत्रां के माणस यरीहो नगर कै धोरै की यरदन नदी कै परली ओड़ पूरब दिशा म्ह, जड़ै सूर्योदय होवै सै, अपणा-अपणा हिस्सा पा चुके सैं।”
देश बाँट्टण आळे प्रधान
फेर यहोवा नै मूसा तै कह्या, “जो आदमी थारै खात्तर उस देश नै बाँट्टैगें उनके नाम ये सै एलीआजर याजक अर नून का बेट्टा यहोशू। अर देश नै बाँट्टण कै खात्तर एक-एक गोत्र का एक-एक प्रधान ठहराणा। अर इन माणसां के नाम ये सैं यहूदागोत्री यपुन्ने का बेट्टा कालेब, शिमोनगोत्री अम्मीहूद का बेट्टा शमूएल, बिन्यामीन गोत्र किसलोन का बेट्टा एलीदाद, दान कै गोत्र का प्रधान योग्ली का बेट्टा बुक्की, यूसुफियाँ म्ह तै मनश्शेइयां कै गोत्र का प्रधान एपोद का बेट्टा हन्नीएल, अर एप्रैमियां कै गोत्र का प्रधान शिप्तान का बेट्टा कमूएल, जबूलूनियाँ कै गोत्र का प्रधान पर्नाक का बेट्टा एलीसापान, इस्साकारियाँ कै गोत्र का प्रधान अज्जान का बेट्टा पलतीएल, आशेरियाँ कै गोत्र का प्रधान शलोमी का बेट्टा अहीहूद, अर नप्तालियाँ कै गोत्र का प्रधान अम्मीहूद का बेट्टा पदहेल।” जिन माणसां तै यहोवा नै कनान देश ताहीं इस्राएलियाँ कै खात्तर बाँट्टण का हुकम दिया वे येए सैं।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.