Haryanvi Bible
गिनती 33
मिस्र तै इस्राएलियाँ की यात्रा का वर्णन
जिब तै इस्राएली मूसा अर हारुन की अगुवाई म्ह टोळ बाँधकै मिस्र देश तै लिकड़े, फेर उनके ये पड़ाव होए। मूसा नै यहोवा पै तै हुकम पाकै उनके चाल्लण उनके रुकण कै मुताबिक लिख दिए; अर वे ये सैं। पैहले महिन्ने1 के पन्द्रहवें दिन नै रामसेस2 तै चल दिये; फसह कै दुसरे दिन इस्राएली सारे मिस्रियाँ कै देखदे बेखटके लिकड़गे, जिब के मिस्री अपणे सारे जेठ्यां नै माट्टी दे रे थे जिन ताहीं यहोवा नै मारया था; अर उनके देवत्यां ताहीं भी सजा दी थी।
इस्राएलियाँ नै रामसेस तै चालकै सुक्कोत म्ह डेरे खड़े करे।
अर सुक्कोत तै चालकै एताम म्ह, जो जंगळ-बियाबान कै सिरे पै सै, डेरे खड़े करे।
अर एताम तै चालकै वे पीहहीरोत नै मुड़गे, जो बाल-सपोन कै स्याम्ही सै; अर मिग्दोल कै स्याम्ही डेरे खड़े करे।
फेर वे पीहहीरोत कै स्याम्ही तै चालकै समुन्दर कै बीच म्ह तै होकै जंगळ-बियाबान म्ह आये, अर एताम नाम के जंगल म्ह तीन दिन कै राह म्ह चालकै मारा म्ह डेरे खड़े करे।
फेर मारा तै चालकै वे एलीम नै गए, अर एलीम म्ह पाणी के बारहा चोए अर सत्तर खजूर कै पेड़ मिले, अर उननै ओड़ै डेरे खड़े करे।
फेर उननै एलीम तै चालकै लाल समुन्दर कै तट पै डेरे खड़े करे।
अर लाल समुन्दर तै चालकै सीन नाम के जंगळ-बियाबान म्ह डेरे खड़े करे।
फेर सीन नाम के जंगळ-बियाबान तै चालकै उननै दोपका म्ह डेरा करया।
अर दोपका तै चालकै आलूश म्ह डेरा करया।
अर आलूश तै चालकै रपीदीम म्ह डेरा करया, अर ओड़ै उन माणसां ताहीं पीण का पाणी न्ही मिल्या।
फेर उननै रपीदीम तै चालकै सीनै के जंगळ-बियाबान म्ह डेरे खड़े करे।
अर सीनै के जंगळ-बियाबान तै चालकै किब्रोतहत्तावा म्ह डेरा करया।
अर किब्रोतहत्तावा तै चालकै हसेरोत म्ह डेरे खड़े करे।
अर हसेरोत तै चालकै रित्मा म्ह डेरे खड़े करे।
फेर उननै रित्मा तै चालकै रिम्मोनपेरेस म्ह डेरे खड़े करे।
अर रिम्मोनपेरेस तै चालकै लिब्ना म्ह डेरे खड़े करे।
अर लिब्ना तै चालकै रिस्सा म्ह डेरे खड़े करे।
अर रिस्सा तै चालकै कहेलाता म्ह डेरा करया।
अर कहेलाता तै चालकै शेपेर पर्वत कै धोरै डेरा करया।
फेर उननै शेपेर पर्वत तै चालकै हरादा म्ह डेरा करया।
अर हरादा तै चालकै मखेलोत म्ह डेरा करया।
अर मखेलोत तै चालकै तहत म्ह डेरे खड़े करे।
अर तहत तै चालकै तेरह म्ह डेरे खड़े करे।
अर तेरह तै चालकै मित्का म्ह डेरे खड़े करे।
फेर मित्का तै चालकै उननै हशमोना म्ह डेरे खड़े करे।
अर हशमोना तै चालकै मोसेरोत म्ह डेरे खड़े करे।
अर मोसेरोत तै चालकै याकानियाँ कै बिचाळै डेरा करया।
अर याकानियाँ कै बिचाळै तै चालकै होर्हग्गिदगाद म्ह डेरा करया।
अर होर्हग्गिदगाद तै चालकै योतबाता म्ह डेरा करया।
अर योतबाता तै चालकै अब्रोना म्ह डेरे खड़े करे।
अर अब्रोना तै चालकै एस्योनगेबेर म्ह डेरे खड़े करे।
अर एस्योनगेबेर तै चालकै उननै सीन नाम के जंगळ-बियाबान कै कादेश म्ह डेरा करया।
फेर कादेश तै चालकै होर पर्वत कै धोरै, जो एदोम देश की हद पै सै, डेरे खड़े करे।
ओड़ै इस्राएलियाँ नै मिस्र देश तै लिकड़ण कै चाळीसवें साल के पाँचमै महिन्ने के पैहले दिन नै हारुन याजक यहोवा का हुकम पाकै होर पर्वत पै चढ़या, अर ओड़ै मर ग्या।
अर जिब हारुन होर पर्वत पै मर ग्या जिब वो एक सौ तेईस साल का था।
अर अराद का कनानी राजा, जो कनान देश कै दक्षिण हिस्से म्ह रहवै था, उसनै इस्राएलियाँ के आण की खबर पाई।
फेर इस्राएलियाँ नै होर पर्वत तै चालकै सलमोना म्ह डेरे खड़े करे।
अर सलमोना तै चालकै पूनोन म्ह डेरे खड़े करे।
अर पूनोन तै चालकै ओबोत म्ह डेरे खड़े करे।
अर ओबोत तै चालकै अबारीम नाम के डीहों म्ह जो मोआब की हद पै सैं, डेरे खड़े करे।
फेर उन डीहों तै चालकै उननै दीबोन म्ह डेरा करया।
अर दीबोन तै चालकै अल्मोनदिबलातैम म्ह डेरा करया।
अर अल्मोनदिबलातैम तै चालकै उननै अबारीम नाम के पहाड़ां म्ह नबो कै स्याम्ही डेरा करया।
फेर अबारीम पहाड़ां तै चालकै मोआब कै अराबा म्ह, यरीहो नगर कै धोरै यरदन नदी कै तट पै डेरा करया।
अर उननै मोआब के अराबा म्ह बेत्यशीमोत तै लेकै आबेलशित्तीम तक यरदन नदी कै किनारे-किनारे डेरे खड़े करे।
कनान पै हमले का आदेश
फेर मोआब कै अराबा म्ह, यरीहो नगर कै धोरै की यरदन नदी कै तट पै, यहोवा नै मूसा तै कह्या,
“इस्राएलियाँ नै समझाकै कह: जिब थम यरदन नदी की परली ओड़ होकै कनान देश म्ह पोहचों फेर उस देश के बाशिंद्यां नै उनके देश तै लिकाड़ दियो; अर उनके सारे नक्काशीदार पत्थरां नै अर ढळी होई मूरतां ताहीं नाश कर दियो, अर उनके सारी पूजा की ऊँच्ची जगहां नै गेर देणा। अर उस देश नै अपणे अधिकार म्ह लेकै उस म्ह निवास करियो, क्यूँके मन्नै वो देश थारे तै दिया सै के थम उसके हकदार हो। अर थम उस देश ताहीं चिट्ठी गेर कै अपणे खानदान्ना के मुताबिक बाँट लियो; यानिके जो कुण्बे घणे सैं उन ताहीं घणा, अर जो थोड़े सैं उन ताहीं थोड़ा हिस्सा देणा; जिस कुल की चिट्ठी जिस जगहां कै खात्तर लिकड़े वोए उसका हिस्सा ठहरै; अपणे पितरां कै गोत्रां के मुताबिक अपणा-अपणा हिस्सा लियो। पर जै थम उस देश के बाशिंद्यां नै अपणे आग्गै तै ना लिकाड़ोगे, तो उन म्ह तै जिन ताहीं थम उस म्ह रहण द्योगे, वे मान्नो थारी आँखां म्ह काँटे अर थारै पैरां म्ह कील ठहरैगें, अर वे उस देश म्ह जड़ै थम बसोगे, थमनै मुसीबत म्ह गेरैगें। अर उनतै जिसा बरताव करण की इच्छा मन्नै करी सै उस्से तरियां ए थारै तै करुँगा।”
Source notes (2)
- Footnote पैहले महिन्ने इब्रानी कलेंडर कै मुताबिक यो दिन मार्च अर अप्रैल कै बीच म्ह आवै सै, फसह के पैहले महिन्ने का पन्द्रहवें दिन
- Footnote रामसेस एक शहर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.