Haryanvi Bible
नहूम 1
परमेसवर का अपणे बैरियाँ पै छो
नीनवे1 कै बारै म्ह भविष्यवाणी। एल्कोशवासी नहूम शहर के दर्शन की किताब।
यहोवा जळण राक्खण आळा अर बदला लेण आळा परमेसवर सै; यहोवा बदला लेण आळा अर जळजळाहट करण आळा सै; यहोवा अपणे धोक्खा देण आळयां तै बदला लेवै सै, अर अपणे बैरियाँ का पाप न्ही भूलदा। यहोवा देर तै छो करण आळा अर बड़ा शक्तिमान सै2; वो दोषी नै किसे तरियां निर्दोष न्ही ठहरावैगा। यहोवा बवंडर अर आँधी म्ह होकै चाल्लै सै, अर बादळ उसके पैरां की धूळ सैं।
उसके झिड़कण तै महानद सूख जावै सैं, वो सारी नदियाँ नै सूखा देवै सै; बाशान के खेत अर कर्मेल के बाग कुम्हळान्दे अर लबानोन के फूलां की हरियाली जान्दी रहवै सै। उसकी उपस्थिति तै पहाड़ काँम्ब उठ्ठै सैं अर पहाड़ियाँ गळ जावै सैं; उसके प्रताप तै धरती बलके सारा संसार अपणे सारे रहण आळयां समेत थरथरा उठ्ठै सै।
उसके छो का सामना कौण कर सकै सै? अर जिब उसका छो भड़कै सै, फेर कौण ठहर सकै सै? उसकी जळजळाहट आग की तरियां भड़क ज्या सै, अर चट्टान उसकी शक्ति तै पाट पाटकै गिरै सैं। यहोवा भला सै; संकट के दिन म्ह वो मजबूत गढ़ ठहरै सै, अर अपणे शरणागतां नै याद राक्खै सै। पर वो उमड़दी होई धारा तै उसकी जगहां का अन्त कर देगा, अर अपणे बैरियाँ नै खदेड़ कै अन्धकार म्ह भगा देगा। थम यहोवा कै खिलाफ के कल्पना कर रहे सो? वो थारा अन्त कर देवैगा; विपत्ति दुसरी बार पड़ण न्ही पावैगी। क्यूँके चाहे तेरे दुश्मन काण्डयाँ तै उळझे होए हों, अर शराब के नशे म्ह चूर भी हों, तोभी वे सूक्खी खूँटी की तरियां भस्म करे जावैंगे। हे नीनवे, तेरै म्ह तै एक दुष्ट लिकड़या सै, जो यहोवा कै खिलाफ कल्पना करै अर नीचता की योजना बणावै सै।
यहोवा अपणे लोग्गां तै न्यू कहवै सै, “चाहे वे3 सारी तरियां तै ताकतवर हों, अर घणे भी हों, तोभी पूरी तरियां तै काट्टे जावैंगे अर जीरो हो जावैंगे। मन्नै तेरे ताहीं दुःख दिया सै, पर फेर न्ही देऊँगा। क्यूँके इब मै उसका जूआ तेरी गर्दन पै तै उतारकै तोड़ गेरूँगा, अर तेरा बन्धन पाड़ गेरूँगा।”
यहोवा नै तेरे बारै म्ह न्यू हुकम दिया सै “आग्गै तै तेरा खानदान ना चाल्लै; मै तेरे देवालयां म्ह तै ढळी अर गढ़ी होई मूर्तियाँ नै काट गेरूँगा, मै अश्शूर के खात्तर कब्र खोदूँगा, क्यूँके तू जीण के लायक न्ही सै।”
देक्खो4, पहाड़ां पै शुभ समाचार का सुणाण आळा अर शान्ति का प्रचार करण आळा आ रह्या सै! इब हे यहूदा, अपणे त्यौहार मना, अर परमेसवर ताहीं करे होए अपणे वायदे नै पूरा कर, क्यूँके वो दुष्ट फेर कदे तेरे बिचाळै होकै ना चाल्लैगा, वो पूरी तरियां तै नाश होया सै।
Source notes (4)
- Footnote नीनवे नहूम की भविष्यवाणी भी घणी कठोर अर भयानक सै योना की चेतावनी सुणकै नीनवे के रहण आळयां नै मन फिराया था लेकिन वे फेर पाप म्ह गिरगे थे
- Footnote बड़ा शक्तिमान सै दिव्य शक्ति कै गैल दैवीय सहनशीलता भी जावै सै परमेसवर धीरजवन्त सै उसका धीरज दुर्बलता का न्ही उसके ताकत का प्रतीक सै
- Footnote अश्शूर के रहण आळे
- Footnote प्रेरि. 10:36; रोम. 10:15; इफि. 6:15
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.