Haryanvi Bible
मीका 7
इस्राएल का नैतिक पतन
हाय मेरे पै! क्यूँके मै उस आदमी की तरियां होग्या सूं जो धूपकाल के फळ तोड़ण पै, या रही होई दाख चुगण कै बखत के अन्त म्ह आ जावै, मेरे ताहीं तो पक्की अंजीरां की लालसा थी, पर खाण कै खात्तर कोए गुच्छा न्ही रह्या। भगत माणस धरती पै तै नाश होगे सैं, अर माणसां म्ह एक भी सीध्धा आदमी न्ही रह्या; वे सारे के सारे हत्या कै खात्तर घात लगावैं, अर जाळ लगाकै अपणे-अपणे भाई का शिकार करै सैं। वे अपणे दोन्नु हाथां तै मन लगाकै बुराई करै सैं; हाकिम रिसवत माँग्गै, अर न्यायी रिसवत लेण नै त्यार रहवै सै, अर रईस अपणे मन की बुराई बखान करै सै; इस्से तरियां तै वे सारे मिलकै जाळसाज्जी करै सैं। उन म्ह तै जो सबतै बढ़िया सै, वो कंटीली झाड़ी की तरियां दुखदाई सै, जो सबतै सीध्धा सै, वो काण्डे आळे बाड़े तै भी बुरा सै। तेरे पहरेदारां का कह्या होया दिन, यानिके तेरी सजा का दिन आ ग्या सै। इब वे तावळे भ्रमित हो जावैंगे। दोस्त पै बिश्वास ना करो, खास मित्तर पै भी भरोस्सा ना राक्खो; बलके अपणी घरआळी पै भी न्ही, अर उसतै सम्भळ कै बोलणा। क्यूँके बेट्टा बाप की बेजती करै, अर बेट्टी माँ की, अर बहू सास कै खिलाफ उठ्ठै सै; माणस के दुश्मन उसके घर के माणसां होवै सैं। लेकिन मै यहोवा की और देखदा रहूँगा, मै अपणे उद्धारकर्ता परमेसवर की बाट देखदा रहूँगा; मेरा परमेसवर मेरी प्रार्थना सुणैगा।
हे मेरी बैरण, मेरे पै आनन्द ना करै; क्यूँके जिस तरियां ए मै गिरुँगा उसे तरियां उठूँगा; भी अर जद ए मै अन्धकार म्ह पडूँगा जिब्बे ए यहोवा मेरे खात्तर ज्योति का काम देवैगा। मन्नै यहोवा कै खिलाफ पाप करया सै, इस कारण मै उस बखत ताहीं उसके छो नै सहन्दा रहूँगा जिब ताहीं के वो मेरा मुकद्दमा लड़कै मेरा न्याय ना चुकावैगा। उस बखत वो मेरे ताहीं उजियाळे म्ह लिकाड़ ले आवैगा, अर मै उसकी धार्मिकता देखूँगा। फेर मेरी बैरण जो मेरे ताहीं न्यू कहवै सै के तेरा परमेसवर यहोवा कित्त रह्या, वो भी उसनै देक्खैगी अर शर्म तै मुँह छुपावैगी। मै अपणी आँख्यां तै उसनै देखूँगा; फेर वो सड़कां की कीच की तरियां लताड़ी जावैगी।
तेरे बाड़याँ के बाँधण कै दिन उसकी हद बढ़ाई जावैगी। उस दिन अश्शूर तै, अर मिस्र के नगरां तै अर मिस्र अर महानद कै बिचाळै के, अर समुन्दर-समुन्दर अर पहाड़-पहाड़ कै बिचाळै तै अर फरात नदी इलाके के देशां के माणस तेरे धोरै आवैंगे। फेर भी यो देश अपणे रहण आळयां के काम्मां कै कारण उजाड़ ए रहवैगा।
तू लाठ्ठी लिए होए अपणी प्रजा की चरवाही कर1, यानिके अपणे खास हिस्से की भेड़-बकरियाँ की, जो कर्मेल के बण म्ह अलग बैठ्ठै सैं; वे पुराणे बखत की तरियां बाशान अर गिलाद म्ह जाकै बस जावैं।
यहोवा न्यू कहवै सै, जिस तरियां कै मिस्र देश तै तेरे लिकड़ आण के दिनां म्ह, उस तरियां ए इब मै उसनै अदभुत काम दिखाऊँगा। गैर जात देखकै अपणे सारे पराक्रम कै बारै म्ह शर्मावैंगी; वे अपणे मुँह नै हाथ तै छुपावैगी, अर उनके कान बहरे हो जावैंगे। वे साँप की तरियां माट्टी चाट्टैंगी2, अर धरती पै रेंगण आळे जन्तुआं की ढाळ अपणे बिलां म्ह तै काँम्बदी होई लिकड़ैगी; वे म्हारे परमेसवर यहोवा के धोरै थरथरान्दी होई आवैगी, अर वें तेरै तै डरैंगी।
तेरे बराबर इसा परमेसवर कित्त सै जो अधर्म नै माफ करै अर अपणे खास हिस्से के बचे होया के अपराध नै ढाँप दे? वो अपणे छो नै सदा बणाए न्ही रहन्दा, क्यूँके वो करुणा तै प्यार राक्खै सै। वो फेर म्हारे पै दया करैगा, अर म्हारे अधर्म के काम नै लताड़ देवैगा। तू उनके सारे पापां नै ढुंघे समुन्दर म्ह गेर देवैगा। तू याकूब कै बारै म्ह वा सच्चाई, अर अब्राहम कै बारै म्ह वा करुणा पूरी करैगा, जिसकी कसम तू पुराणे बखत के दिनां तै लेकै इब ताहीं म्हारे पितरां अब्राहम अर याकूब तै खान्दा आया सै।
Source notes (2)
- Footnote तू लाठ्ठी लिए होए अपणी प्रजा की चरवाही कर इब भविष्यवक्ता एक दिल तै प्रार्थना कै गैल समापन करै सै जिसका उसनै आच्छी ढाळ जवाब मिलै सै के परमेसवर अपणी ताकत नै नए सिरे तै प्रगट करैगा जिसा उस बखत प्रगट करया था जिब उसनै उन ताहीं अपणी प्रजा बणाया था।
- Footnote वे साँप की तरियां माट्टी चाट्टैंगी माट्टी चाटणा माणस की दीन-हीन हालत नै बतावै सै जो खुद ताहीं धरती पै गिरा देवैं सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.