Haryanvi Bible
मीका 5
इब हे घणे दलां के शहर, दल बाँध-बाँधकै कठ्ठे हो, क्यूँके उसनै म्हारे ताहीं घेर लिया सै; वे इस्राएल के न्यायी कै गाल पै सोंटा मारैंगे।
यहोवा कहवै सै, हे बैतलहम एप्राता, जै तू इसा छोट्टा सै के यहूदा के हजारां म्ह गिण्या न्ही जान्दा, फेर भी तेरै म्ह तै मेरै खात्तर एक माणस लिकड़ैगा, जो इस्राएलियाँं म्ह राज करण आळा होवैगा; अर उसका लिकड़णा पुराणे बखत तै, बलके अनादिकाल तै होन्दा आया सै। इस करकै वो उननै उस बखत ताहीं छोड्डे रहवैगा, जिब ताहीं जच्चा पैदा ना करै; फेर इस्राएलियाँं कै धोरै उसके बचे होए भाई जो देश तै बाहर थे, बोहड़कै उनतै मिल जावैंगे। अर वो खड्या होकै1 यहोवा की दी होई शक्ति तै, अर अपणे परमेसवर यहोवा के नाम के प्रताप तै, उनकी चरवाही करैगा। अर वे सुरक्षित रहवैंगे, क्यूँके इब वो धरती की छोर तक महान ठहरैगा। अर वो शान्ति का मूल होवैगा,
जिब अश्शूरी सेना म्हारे देश पै चढ़ाई करैं, अर म्हारे राज-भवनां म्ह पैर धरैं, फेर हम उनके खिलाफ सात पाळी बलके आठ प्रधान माणस खड़े करैंगे। अर2 वे अश्शूर के देश नै बलके बड़ण की जगहां म्ह निम्रोद के देश नै तलवार चलाकै मार लेंगे; अर जिब अश्शूरी माणस म्हारे देश म्ह आवै, अर उसकी हद कै भित्तर पैर धरैं, फेर वोए माणस म्हारे ताहीं उनतै बचावैगा। अर याकूब के बचे होए माणस भोत राज्याँ कै बिचाळै इसा काम देवैंगे, जिसा यहोवा की और तै पड़ण आळी ओस, अर घास पै की बारिस, जो किसे कै खात्तर न्ही ठहरदी अर माणसां की बाट न्ही देखदी। अर याकूब के बचे होए माणस जात्तां म्ह अर देश-देश कै माणसां कै बिचाळै इसे होवैंगें जिसे जंगळी-पशुआं म्ह शेर, या भेड़-बकरियाँ के झुण्डां म्ह जवान शेर होवै सै, क्यूँके जिब वो उनके बीच म्ह तै जावै, तो लताड़दा अर पाड़दा जावैगा, अर कोए बचा ना सकैगा। तेरा हाथ तेरे बिरोधियाँ पै पड़ै, अर तेरे सारे दुश्मन नाश हो जावैं।
यहोवा की याए वाणी सै, उस बखत मै तेरे घोड़यां का तेरे बीच म्ह तै नाश करुँगा; अर तेरे रथां का विनाश करुँगा। मै तेरे देश के नगरां नै भी नाश करुँगा, अर तेरे किल्यां नै गेर दियुँगा। अर मै तेरे तंत्र-मंत्र नाश करुँगा, अर तेरै म्ह टोन्हे-टोटके आगै तै ना रहवैंगे। अर मै तेरी खुदी होई मूर्तियाँ, अर तेरी लाठें, तेरे बीच म्ह तै नाश करुँगा; अर तू आगै तै अपणे हाथ की बणाई होई चिज्जां नै दण्डवत ना करैगा। अर मै तेरी अशेरा नाम की मूर्तियाँ नै तेरी धरती पै तै उखाड़ गेरूँगा, अर तेरे नगरां का विनाश करुँगा। अर मै उन देशां नै जो मेरा कह्या न्ही मान्दे, छो अर जळजळाहट कै गैल उनतै बदला लेऊँगा।
Source notes (2)
- Footnote वो खड्या होकै भविष्यवक्ता इस जन्म लेण आळे राजा के व्यक्तिगत काम्मां का जिक्र करदा जावै सै। उसका अन्त न्ही होगा वो किसे पै अपणा राज निर्भर न्ही करैगा लेकिन उसनै खुद सम्भाळैगा।
- Footnote निम्रोद अश्शूर का ए दूसरा नाम सै. निम्रोद नै ए नीनवे शहर की स्थापना करी थी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.