Haryanvi Bible
मीका 4
शान्ति का राज्य
अन्त कै दिनां म्ह इसा होवैगा के यहोवा के भवन का पहाड़ सारे पहाड़ां पै मजबूत करया जावैगा, अर सारी पहाड़ियाँ तै घणा ऊँच्चा करया जावैगा; अर सारी जात्तां के माणसां नै धारा की तरियां उसकी और चाल्लैगें। अर घणी जात्तां के माणस जावैंगे, अर आप्पस म्ह कहवैंगे, “आओ, हम यहोवा के पहाड़ पै चढ़कै, याकूब के परमेसवर के भवन म्ह जावां; फेर वो म्हारे ताहीं अपणे राह सिखावैगा, अर हम उसके रास्तयां पै चाल्लैगें।” क्यूँके यहोवा के नियम-कायदे सिय्योन तै, अर उसका वचन यरुशलेम तै लिकड़ैगा। वो घणे देशां के माणसां का न्याय करैगा1, अर दूर-दूर तक की ताकतवर जातियाँ के झगड्या नै मिटावैगा; इस करकै वे अपणी तलवार पीटकै हळ के फाळ, अर अपणे भाल्यां तै दात्ती बणावैंगे; फेर एक जात्ति दुसरी जात्ति कै खिलाफ तलवार ना चलावैगी; अर माणस2 आगै तै युद्ध विद्या ना सीखैंगे। लेकिन वे अपणी-अपणी दाखलता अर अंजीर के पेड़ तळै बैठ्या करैंगे, अर कोए उननै ना डरावैगा; सेनाओं के यहोवा नै योए वचन दिया सै।
सारे राज्याँ के माणस तो अपणे-अपणे देवता का नाम लेकै चाल्लै सैं, लेकिन हम अपणे परमेसवर यहोवा का नाम लेकै सदा सर्वदा चाल्दे रहवांगे।
यहोवा की या वाणी सै, उस बखत मै प्रजा के लंगड्यां नै, अर धक्के तै लिकाड़े होयां नै, अर जिन ताहीं मन्नै दुःख दिया सै उन सारया नै कठ्ठे करुँगा। अर लंगड्यां नै मै बचा राखूँगा, अर दूर करे होया नै एक ताकतवर जात्ति कर दियुँगा; अर यहोवा उनपै सिय्योन पहाड़ कै उप्पर तै सदा राज्य करदा रहवैगा।
अर हे एदेर के गुम्मट, हे सिय्योन की पहाड़ी, पैहला राज यानिके यरुशलेम का राज्य तेरे ताहीं मिलैगा।
इब3 तू क्यूँ चिल्लावै सै? के तेरै म्ह कोए राजा न्ही रह्या? के तेरा योजना बणाण आळा नाश होग्या, जिसतै जच्चा जनान्नी की तरियां तेरे ताहीं पीड़ा उठ्ठै सै? हे सिय्योन की बेट्टी, जच्चा जनान्नी की तरियां पीड़ा ठाकै पैदा कर; क्यूँके इब तू गढ़ी म्ह तै लिकड़कै मैदान म्ह बसैगी, बलके बाबेल देश ताहीं जावैगी; ओड़ैए तू छुड़ाई जावैगी, यानिके ओड़ैए यहोवा तेरे ताहीं तेरे दुश्मनां के बस म्ह तै छुड़ा लेवैगा।
इब भोत सी जात तेरै खिलाफ कठ्ठी होकै तेरे बारै म्ह कहवैंगे, “सिय्योन अपवित्र करी जावै, अर हम अपणी आँख्यां तै उसनै देक्खां।” पर वे यहोवा की कल्पना न्ही जाणदे4, ना उसकी योजना समझै सैं, के वो उननै इसा बटोर लेवैगा जिसे खलिहाण म्ह पूळे बटोरै जावै सैं। हे सिय्योन, उठ अर कटणी कर, मै तेरे सींगां5 नै लोहे के, अर तेरे खुरां नै पीतळ के बणा दियुँगा; अर तू भोत सी जात्तां नै चूर-चूर करैगी, अर उनकी लूटी होई कमाई यहोवा नै अर उनकी जायदाद धरती के प्रभु कै खात्तर चढ़ाया करैगी।
Source notes (5)
- Footnote वो घणे देशां के माणसां का न्याय करैगा हर एक नै अपणा राह लिया था, इब वे परमेसवर के विधियाँ की शिक्षा लेण आवैंगे।
- Footnote अर माणस 1 राजा. 4:25; जक. 3:10
- Footnote यिर्म. 8:19; यशा. 13:8
- Footnote वे यहोवा की कल्पना न्ही जाणदे परमेसवर की इच्छा थी के उसके माणस सजा पावैं लेकिन भविष्य की भलाई तै वे अनजाण थे (जो उनके मन फिराव पै आधारित थी) के परमेसवर उननै माफ करणा चाहवै था लेकिन उनके घमण्ड की सजा भी देणा चाहवै था।
- Footnote बल या ताकत
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.