Haryanvi Bible
मीका 2
हाय1 उनपै, जो बिछोण्यां पै पड़े होए बुराईयाँ की कल्पना करैं अर बुरे काम की इच्छा राक्खै सैं, अर ताकत्त वर होण कै कारण सुबेरै नै दिन लिकड़दे ए वे उसनै पूरा करै सैं। वे2 लोग खेत्तां का लालच करकै उननै खोस लेवै सैं, अर घरां का लालच करकै उननै भी ले लेवै सैं; अर उसके घरान्ने समेत माणस पै, अर उसके खास भाग समेत किसे माणस पै अंधेर अर अत्याचार करै सैं। इस कारण, यहोवा न्यू कहवै सै, मै इस कुल पै इसी मुसीबत गेरण पै सूं, जिसकै नीच्चै तै थम अपणी गर्दन हटा ना सकोगे; ना अपणे सिर ऊँच्चे करे होए चाल सकोगे; क्यूँके वो मुसीबत का बखत आपदा तै भरया होगा। उस बखत अमीर लोग यो घणे शोक आळा गीत उदाहरण के तौर पै गाया करैंगें, “म्हारा तो सर्वनाश होग्या; वो मेरे माणसां के भाग नै बिगाड़ै सै; हाय, वो उसनै मेरे ताहीं कितनी दूर कर देवै सै! यहोवा म्हारे खेत म्हारे पै राज करण आळे नै दे देवै सै।” इस कारण तेरा इसा कोए ना होगा, जो यहोवा की मण्डळी म्ह चिट्ठी गेरकै नाप्पण की डोरी डाल्लै।
उनके नबी न्यू कहवै सै, भविष्यवाणी मत्त करो. बकवादी कह्या करै सैं, “बकवास ना करो। इन बात्तां कै खात्तर ना कह्या करो!” इसे माणसां म्ह तै बेजती ना मिटैगी। हे इजराइल के लोगों, के यो कह्या जावै के यहोवा का आत्मा अधीर होग्या सै? के ये काम उसे के करे होए सैं? के मेरे वचनां तै उसका भला न्ही होन्दा जो सिधाई तै चाल्लै सै? यहोवा नै उत्तर दिया, फेर भी कल की बात सै के मेरी प्रजा दुश्मन बणकै मेरै खिलाफ उठी सै; थम शान्त अर भोळे-भाळे यात्रियाँ के देह पै तै कपड़े खोस लेओ हो जो लड़ाई का विचार ना करकै बेधड़क चाल्ले जावै सैं। मेरी प्रजा की जनानियाँ नै थम उनके सुखधामां तै लिकाड़ देओ हो3; अर उनके छोट्टे बाळकां तै थम मेरी दी होई बढ़िया चीज सदा कै खात्तर छीन लेओ हो। उठो, चले जाओ! क्यूँके यो थारी आराम की जगहां न्ही सै; इसका कारण वो अशुद्धता सै जो मुश्किल दुःख कै गैल थारा नाश करैगी। जै कोए झूठ्ठी आत्मा म्ह चालदा होया झूठ्ठी अर बेकार बात कहवै अर कहवै के मै थमनै लगातार दाखमधु अर शराब कै खात्तर प्रचार सुणान्दा रहूँगा, तो वोए इन माणसां का भविष्यवक्ता ठहरैगा।
हे याकूब के लोगों, मै जरुर थमनै कठ्ठा करुँगा; मै इस्राएल के बचे होया नै जरुर कठ्ठा करुँगा; अर बोस्रा की भेड़-बकरियाँ की तरियां एक साथ राखूँगा। उस झुण्ड कै बराबर जो आच्छी चराई म्ह हो, वे माणसां की बहुतायत कै मारे शोर-सराबा मचावैंगें। उनकै आगै-आगै बाड़े का तोड़ण आळा गया सै, इस करकै वे भी उसनै तोड़ रहे सैं, अर फाटक तै होकै लिकड़े जा रहे सैं; उनका राजा यहोवा उनके आगै-आगै गया यानिके यहोवा उनका सरदार अर अगुआ सै।
Source notes (3)
- Footnote भजन. 36:4
- Footnote लैव्य. 25:23-28; गिन. 27:1-11; 33:54; 36:1-12
- Footnote मेरी प्रजा की जनानियाँ नै थम उनके सुखधामां तै लिकाड़ देओ हो सम्भवतः जिननै उन ताहीं लूट्या था वे विधवाएँ थी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.