Haryanvi Bible
मीका 1
यहोवा का वचन, जो यहूदा के राजा योताम, आहाज अर हिजकिय्याह के दिनां म्ह मोरेशेत नगर के रहण आळे मीका ताहीं पोहच्या, जिस ताहीं उसनै सामरिया शहर अर यरुशलेम कै बारै म्ह पाया।
हे जात्ति-जात्ति के सारे माणसों, सुणो! हे खेत तू उस सब समेत जो तेरै म्ह सै, ध्यान दे! अर प्रभु यहोवा थारे खिलाफ, बलके परमेसवर अपणे पवित्र मन्दर म्ह1 तै थारे पै गवाही दे। क्यूँके देख, यहोवा अपणे पवित्रस्थान तै बाहर लिकड़ रह्या सै, अर वो उतरकै धरती की ऊँच्ची पहाड़ियाँ पै चाल्लैगा। पहाड़ उसकै नीच्चै गळ जावैंगे, अर तराई इस तरियां पाट्टैगी, जिस तरियां मोम आग की आँच तै, अर पाणी जो घाट तै नीच्चै बहवै सै। यो सब याकूब के अपराध, अर इस्राएल के घरान्ने के पाप कै कारण तै होवै सै। याकूब का अपराध के सै? के सामरिया न्ही? अर यहूदा की ऊँच्ची जगहां के सैं? के यरुशलेम न्ही? इस कारण मै सामरिया नै मैदान के खेत का ढेर कर दियुँगा, अर दाख का बगीचा बणाऊँगा; अर मै उसके पत्थरां नै खड्डे म्ह लुढ़का दियुँगा, अर उसकी नींव उखाड़ देऊँगा। उसकी सारी खुदी होई मूर्ति टुकड़े-टुकड़े करी जावैंगी; अर जो कुछ उसनै ओछापण करकै कमाया सै वो आग तै भस्म करया जावैगा, अर उसकी सारी प्रतिमा ताहीं2 मै चकणाचूर करुँगा; क्यूँके ओच्छेपण ए की कमाई तै उसनै उस ताहीं कठ्ठा करया सै, अर वो फेर ओच्छेपण की जिसी कमाई हो ज्यागी।
फेर मीका नै कह्या, इस कारण मै छात्ती पीटकै3 हाय-हाय, करुँगा; मै लुट्या होया4 सा अर नंगा होकै चाल्लां फिरा करुँगा; मै गादड़ां की तरियां चिल्लाऊँगा, और शुतुर्मुर्गां की तरियां रोऊँगा। क्यूँके सामरिया के घाव लाईलाज सै; अर मुसीबत यहूदा पै भी आण पड़ी, बलके वो मेरे जात्ति भाईयाँ पै पड़कै यरुशलेम के फाटक ताहीं पोहचगी सै।
गत शहर म्ह इसका जिक्र ना करो, अर ना रोओ; बेतआप्रा धूळ म्ह लोटपोट के दिखाओ के तेरे गैल के गलत हो रह्या अर थम कितणे दुखी सो। हे शापीर जगहां की रहण आळी नंगी होकै निर्लज्ज चली जा; सानान नगर की रहण आळी न्ही लिकड़ सकदी; बेतसेल के रोण-पीटण कै कारण उसका शरणस्थान थारे तै ले लिया जावैगा। क्यूँके मारोत की रहण आळी तो सही-सलामती की बाट देखदे-देखदे तड़फ गी सै, क्यूँके यहोवा की और तै यरुशलेम के फाटक ताहीं मुसीबत आ पोहची सै। हे लाकीश नगर की रहण आळी अपणे रथां म्ह रफतार तै चाल्लण आळे घोड़े जोत; सिर्फ तेरे तै सिय्योन की प्रजा के पाप की शरुआत होई, क्यूँके इस्राएल के अपराध सिर्फ तेरे म्ह पाए गए। इस कारण तू गत के मोरेशेत ताहीं दान देकै दूर कर देवैगा; अकजीब नगर के घर तै इस्राएल के राजा धोक्खा ए खावैंगे। हे मारेशा नगर की रहण आळी मै फेर तेरे पै एक अधिकारी ठहराऊँगा, अर इस्राएल के प्रतिष्ठित माणसां नै अदुल्लाम गुफा म्ह आणा पड़ैगा। अपणे लाडले बाळकां खात्तर अपणे बाळ कटवाकै सिर मुँण्डा, बलके शोक मनाण खात्तर अपणा पूरा सिर गिद्ध की तरियां गंजा कर देवैं सै, क्यूँके वे गुलाम होकै तेरे धोरै तै किसे दूर देश ताहीं चले गए सैं।
Source notes (4)
- Footnote परमेसवर अपणे पवित्र मन्दर म्ह यो या तो यरुशलेम म्ह जड़ै परमेसवर नै अपणे आप ताहीं थारे पै प्रगट करया या सुर्ग म्ह जिसका प्रतिरूप सै।
- Footnote उसकी सारी प्रतिमा ताहीं जिन मूर्तियाँ म्ह वे बिश्वास करैं थे वे उननै के बचावैंगे खुद ए बन्धुवाई म्ह जावैंगे जिस सोन्ने-चाँदी तै वे बणी थी उसे कै खात्तर उन ताहीं तोड़ दिया जावैगा।
- Footnote मै छात्ती पीटकै अध्याय के 1-7 वचन तक खास वक्ता परमेसवर सै, लेकिन वचन 8 तै मीका खास वक्ता सै।
- Footnote लुट्या होया इसका दूसरा मतलब नंगे पैर भी हो सकै सै। जिसा अर नंगा चल्या फिरया करुँगा; मै गादड़ां की तरियां चिल्लाऊँगा, अर शुतुर्मुर्गों की तरियां रोऊँगा।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.