Haryanvi Bible
लैव्यव्यवस्था 9
याजकीय सेवकाई (बलि-अर्पण)
आठवें1 दिन मूसा नै हारुन अर उसकै बेट्याँ तै अर इस्राएली अगुवां ताहीं बुलवाकै हारुन तै कह्या, “पापबलि कै खात्तर एक बेकसूर बाछड़ा, अर होमबलि कै खात्तर एक बेकसूर मिंढा लेकै यहोवा कै स्याम्ही भेंट चढ़ा। अर इस्राएल के माणसां तै न्यू कह, ‘थम पापबलि कै खात्तर एक बकरा, अर होमबलि कै खात्तर एक बाछड़ा अर एक भेड़ का बच्चा ल्यो, जो एक साल के हों अर बेकसूर हों, अर मेलबलि कै खात्तर यहोवा कै स्याम्ही चढ़ाण कै खात्तर एक बळध अर एक मिंढा, अर तेल तै सणे होए मैदे का एक अन्नबलि भी ले ल्यो; क्यूँके आज यहोवा थारे ताहीं दर्शन देवैगा।’” अर जिस-जिस चीज का हुकम मूसा नै दिया उन सारया नै वे मिलापआळे तम्बू कै आग्गै ले आए; अर सारी मण्डळी धोरै जाकै यहोवा कै स्याम्ही खड़ी होई। फेर मूसा नै कह्या, “यो वो काम सै जिसकै करण कै खात्तर यहोवा नै हुकम दिया सै के थम उसनै करो; अर यहोवा की महिमा का तेज थारे ताहीं दिखाई देवैगा।” फेर मूसा नै हारुन तै कह्या, “यहोवा के हुकम कै मुताबिक वेदी कै धोरै जाकै अपणे पापबलि अर होमबलि नै चढ़ाकै अपणे अर सारी जनता कै खात्तर प्रायश्चित कर अर जनता कै चढ़ावा नै भी चढ़ाकै उनकै खात्तर प्रायश्चित कर।”
इस करकै हारुन नै वेदी कै धोरै जाकै अपणे पापबलि के बाछड़े ताहीं बलिदान करया। अर हारुन के बेट्टे लहू नै उसकै धोरै लेगे, फेर उसनै अपणी आंगळी ताहीं लहू म्ह डुबा कै वेदी कै सीन्गां पै लहू ताहीं लगाया, अर बाकी लहू तै वेदी कै पावेयां पै उण्डेल दिया; अर पापबलि म्ह की चर्बी अर गुर्दे अर कळेजे पै की झिल्ली ताहीं उसनै वेदी पै जळाया, जिसा यहोवा नै मूसा तै हुकम दिया था। अर माँस अर खाल ताहीं उसनै छावणी तै बाहर आग म्ह जळाया।
फेर होमबलि पशु ताहीं बलिदान करया; अर हारुन के बेट्याँ नै लहू ताहीं उसकै हाथ म्ह दिया, अर उसनै उस ताहीं वेदी पै चौगरदे नै छिड़क दिया। फेर उननै होमबलि पशु के टुकड़े-टुकड़े करकै सिर सुधा उसकै हाथ्थां म्ह दे दिया अर उसनै उनतै वेदी पै जळा दिया। अर उसनै आंतड़ी अर पायां ताहीं धोया अर वेदी पै होमबलि कै उप्पर जळाया।
फेर उसनै माणसां के चढ़ाव्यां ताहीं आग्गै लेकै अर उस पापबलि कै बकरे नै जो उनकै खात्तर था लेकै उसका बलिदान करया, अर पैहल्या की ढाळ उस ताहीं भी पापबलि करकै चढ़ाया। अर उसनै होमबलि ताहीं भी धोरै ले जाकै विधि कै मुताबिक चढ़ाया। अर अन्नबलि नै भी धोरै ले जाकै उस म्ह तै मुट्ठी भर वेदी पै जळाया, यो तड़कैए कै होमबलि के अलावा चढ़ाया गया।
बळध अर मिंढा, यानिके जो मेलबलि पशु जनता कै खात्तर थे वे भी बलि करे गए; अर हारुन के बेट्याँ नै लहू ताहीं उसकै हाथ म्ह दिया, अर उसनै उस ताहीं वेदी पै चौगरदे नै छिड़क दिया; अर उननै बळध की चर्बी तै, अर मिंढे म्ह तै मोट्टी पुन्झड़ ताहीं, अर जिस चर्बी तै आंतड़ी ढकी होवै सै उस ताहीं, अर गुर्देयां सुधा कळेजे पै की झिल्ली ताहीं भी उसकै हाथ म्ह दिया; अर उननै चर्बी ताहीं छात्ती पै धरया; अर उसनै वो चर्बी वेदी पै जळाई, पर छात्ती अर सोळी जाँघ ताहीं हारुन नै मूसा के हुकम कै मुताबिक हिलाणे की भेंट कै खात्तर यहोवा कै स्याम्ही हिलाया।
फेर हारुन नै माणसां की ओड़ हाथ बढ़ाकै उन ताहीं आशीर्वाद दिया; अर पापबलि, होमबलि, अर मेलबलियां नै चढ़ाकै वो तळै उतर आया। फेर मूसा अर हारुन मिलापआळे तम्बू म्ह गए, अर लिकड़कै माणसां तै आशीर्वाद दिया; फेर यहोवा का तेज सारी जनता नै दिखाई दिया। अर यहोवा कै स्याम्ही तै आग लिकड़ी चर्बी सुधा होमबलि नै वेदी पै भस्म कर दिया; इसनै देखकै जनता नै जय-जयकार का नारा लगाया, अर अपणे-अपणे मुँह कै बळ गिरकै दण्डवत करया।
Source notes (1)
- Footnote आठवें अगुवां बणाये जाण पै सात दिनां कै पाच्छै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.