Haryanvi Bible
लैव्यव्यवस्था 10
नादाब अर अबीहू के भस्म होण का बखान
फेर नादाब अर अबीहू नाम के हारुन के बेट्याँ म्ह तै दो बेट्याँ नै अपणा-अपणा धूपदान लिया, अर उन म्ह आग भरी, अर उस म्ह धूप गेर कै उस आग तै जिसका हुकम यहोवा नै कोनी दिया था यहोवा कै स्याम्ही अर्पित करी। फेर यहोवा कै स्याम्ही तै आग लिकड़ी अर उन दोनुआ ताहीं भस्म कर दिया, अर वे यहोवा कै स्याम्ही मरगे। फेर मूसा नै हारुन तै कह्या, “या वाए बात सै जिस ताहीं यहोवा नै कह्या था, के जो मेरै धोरै आवै जरूरी सै के वो मन्नै पवित्र जाणै, अर सारी जनता कै स्याम्ही मेरी महिमा करै।” अर हारुन चुप रहया।
फेर मूसा नै मीशाएल अर एलसाफान तै जो हारुन कै चाचा उज्जीएल के बेट्टे थे बुलाकै कह्या, “धोरै आओ, अर अपणे भतीज्यां नै पवित्र स्थान कै आग्गै तै ठाकै छावणी कै बाहर ले जाओ।” मूसा के इस हुकम कै मुताबिक वे धोरै जाकै उननै अंगरख्याँ सुधा ठाकै छावणी कै बाहर लेगे। फेर मूसा नै हारुन तै अर उसके बेट्टे एलीआजर अर ईतामार तै कह्या, “थम लोग अपणे सिर कै बाळ ना बिखराओ, अर ना अपणी पोशाक नै पाड़ो, इसा ना हो के थम भी मर जाओ, अर सारी मण्डळी पै उसका छो भड़क उठै; पर इस्राएल के सारे कुण्बे के माणस जो थारे भाई-बन्धु सै वो यहोवा की लगाई होई आग पै बिलाप करैं। अर थम माणस मिलापआळे तम्बू के दरबाजे कै बाहर ना जाईयो, इसा ना हो के थम मर जाओ; क्यूँके यहोवा के अभिषेक का तेल थारे पै लाग्या होया सै।” मूसा के इस वचन कै मुताबिक उननै करया।
याजकां खात्तर निर्धारित चाल चलण
फेर यहोवा नै हारुन तै कह्या, “जिब-जिब तू या तेरे बेट्टे मिलापआळे तम्बू म्ह आवैं तब-तब थारे म्ह तै कोए ना तो दाखमधु पिए हो ना और किसे ढाळ का नशा, कदे इसा ना हो के थम मर जाओ; थारी पीढ़ी-पीढ़ी म्ह या विधि मान्नी जान्दी रहवै, जिसतै थम पवित्र अर अपवित्र म्ह, अर शुद्ध अर अशुद्ध म्ह अन्तर कर सको; अर इस्राएलियाँ तै उन सारी विधियाँ नै सिखा सको, जिस ताहीं यहोवा नै मूसा कै जरिये उनतै बताई सैं।”
फेर मूसा नै हारुन तै अर उसके बचे होए दोन्नु बेट्याँ एलीआजर अर ईतामार तै भी कह्या, “यहोवा कै हवन म्ह तै जो अन्नबलि बच्या सै उसनै लेकै वेदी कै धोरै बिना खमीर खाओ, क्यूँके वो परमपवित्र सै; अर थम उसनै किसे पवित्र स्थान म्ह खाओ, वो यहोवा कै हवन म्ह तै तेरा अर तेरे बेट्याँ का हक सै; क्यूँके मन्नै इसाए हुकम पाया सै। फेर हिलाई होई भेंट की छात्ती अर ठाई होई भेंट की जाँघ नै थम लोग, यानिके तू अर तेरे बेट्टे-बेटियाँ सारे किसे शुद्ध जगहां म्ह खाओ; क्यूँके वे इस्राएलियाँ कै मेलबलियां म्ह तै तेरा अर तेरे बाळकां का हक ठहरा दिया गया सै। चर्बी कै हवन सुधा जो ठाई होई जाँघ अर हिलाई होई छात्ती यहोवा कै स्याम्ही हिलाणे कै खात्तर आया करैगी, यो हिस्सा यहोवा के हुकम कै मुताबिक सदा की विधि के नियम-कायदे तै तेरा अर तेरे बाळकां कै खात्तर सैं।”
फेर मूसा नै पापबलि के बकरे की खोजबीन करी, तो के पाया के, वो जळाया गया सै, ज्यांतै एलीआजर अर ईतामार जो हारुन के बेट्टे बचे थे उनतै वो छो म्ह आकै कहण लाग्या, “पापबलि जो परमपवित्र सै अर जिस ताहीं यहोवा नै तेरे तै ज्यांतै दिया सै के थम मण्डळी के अधर्म का बोझ अपणे पै ठाकै उनकै खात्तर यहोवा कै स्याम्ही प्रायश्चित करो, थमनै उसका माँस पवित्र स्थान म्ह क्यूँ न्ही खाया? देक्खो, उसका लहू पवित्र स्थान कै भित्तर तो ल्याया ए न्ही गया, बेशक ठीक था के थम मेरे हुकम कै मुताबिक उसकै माँस नै पवित्र स्थान म्ह खान्दे।” इसका जवाब हारुन नै मूसा तै इस तरियां दिया, “देख, आज ए उननै अपणे पापबलि अर होमबलि ताहीं यहोवा कै स्याम्ही चढ़ाया; फेर मेरै पै इसी बिप्दा आण पड़ी सै! इस करकै जै मै आज पापबलि का माँस खान्दा तो के या बात यहोवा कै स्याम्ही भली होन्दी?” जिब मूसा नै यो सुण्या फेर उसनै तसल्ली होई।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.