Haryanvi Bible
न्यायियों 4
दबोरा अर बाराक का चरित्र
इब एहूद मर ग्या तब इस्राएलियाँ नै फेर यहोवा की नजर म्ह बुरा करया। ज्यांतै यहोवा नै उन ताहीं हासोर म्ह विराजण आळे कनान के राजा याबीन कै अधीन कर दिया1, जिसका सेनापति सीसरा था, जो गैरजात्तां के हरोशेत का रहणीया था। फेर इस्राएलियाँ नै यहोवा की दुहाई दी; क्यूँके सीसरा कै धोरै लोहे के नौ सौ रथ थे, अर वो इस्राएलियाँ पै बीस साल ताहीं बड़ा अंधेर करदा रह्या।
उस बखत लप्पीदोत की जनान्नी दबोरा जो नबिया थी इस्राएलियाँ का न्याय करै थी। वा एप्रैम नगर के पहाड़ी देश म्ह रामाह नगर अर बेतेल नगर कै बीच म्ह दबोरा के खजूर कै तळै बैठ्या करै थी, अर इस्राएली उसकै धोरै न्याय कै खात्तर जाया करै थे। उसनै अबीनोअम के बेट्टे बाराक ताहीं केदेश नप्ताली म्ह तै बुलाकै कह्या, “के इस्राएल के परमेसवर यहोवा नै यो हुकम न्ही दिया, के तू जाकै ताबोर पहाड़ पै चढ़, अर नप्तालियाँ गोत्र अर जबूलूनियाँ गोत्र म्ह के दस हजार माणसां नै गैल ले जा? फेर मै याबीन के सेनापति सीसरा नै रथां अर भीड़भाड़ समेत कीशोन नदी तक तेरी ओड़ खींच ले आऊँगा; अर उसनै तेरे हाथ म्ह कर दियुँगा।” बाराक नै उसतै कह्या, “जै तू मेरे गैल चाल्लैगी तो मै जाऊँगा, न्ही तो न्ही जाऊँगा।” दबोरा नै उसतै कह्या, “बेशक मै तेरे गैल चालूँगी; फेर भी इस यात्रा तै तेरी किमे बड़ाई न्ही होगी, क्यूँके यहोवा सीसरा ताहीं एक जनान्नी के अधीन कर देवैगा।” फेर दबोरा उठकै बाराक कै गैल केदेश म्ह गई। फेर बाराक नै जबूलून गोत्र अर नप्ताली गोत्र के माणसां ताहीं केदेश म्ह बुलवा लिया; अर उसकै पाच्छै दस हजार माणस चढ़गे; अर दबोरा भी उसकै गैल चढ़गी।
हेबेर नाम के केनी नै उन केनियाँ म्ह तै, जो मूसा के साले होबाब के वंश के थे, अपणे ताहीं न्यारा करकै केदेश कै धोरै सानन्नीम के बांज दरखत तक जाकै अपणा डेरा औड़ै ए डाल्या था।
जिब सीसरा नै यो समाचार मिल्या के अबीनोअम का बेट्टा बाराक ताबोर पहाड़ पै चढ़ ग्या सै, फेर सीसरा नै अपणे सारे रथ, जो लोहे के नौ सौ रथ थे, अर अपणे गैल की सारी सेना नै गैरजात्तां के हरोशेत तै कीशोन नदी पै बुलवाया। फेर दबोरा नै बाराक तै कह्या, “उठ! क्यूँके आज वो दिन सै जिस म्ह यहोवा सीसरा नै तेरे हाथ म्ह कर देवैगा। के यहोवा तेरै आग्गै न्ही लिकड़या सै?” इसपै बाराक अर उसकै पाच्छै-पाच्छै दस हजार माणस ताबोर पहाड़ तै उतर पड़े। फेर यहोवा नै सारे रथां बलके सारी सेना समेत सीसरा ताहीं तलवार तै बाराक के स्याम्ही घबरा दिया; अर सीसरा रथ पै तै उतरकै पैदल-पैदल भाज चाल्या। अर बाराक नै गैरजात्तां के हरोशेत ताहीं रथां अर सेना का पिच्छा करया, अर तलवार तै सीसरा की सारी सेना नाश करी गई; अर एक भी माणस ना बच्या।
पर सीसरा पैदल-पैदल हेबेर केनी की जनान्नी याएल के डेरे ताहीं भाज ग्या; क्यूँके हासोर के राजा याबीन अर हेबेर केनी म्ह मेल था। फेर याएल सीसरा की भेंट कै खात्तर लिकड़कै उसतै कहण लाग्गी, “हे मेरे प्रभु, आ, मेरै गैल आ, अर ना डरै।” फेर वो उसकै धोरै डेरे म्ह गया, अर उसनै उसके उप्पर कम्बल उढा दिया। फेर सीसरा नै उसतै कह्या, “मन्नै प्यास लागरी सै, मन्नै थोड़ा पाणी प्या।” फेर उसनै दूध की कुप्पी खोलकै उसतै दूध प्याया, अर उस ताहीं उढा दिया। फेर उसनै उसतै कह्या, “डेरे के द्वार पै खड़ी रह, अर जै कोए आकै तेरे तै पूच्छै, ‘उरै कोए माणस सै?’ फेर कहिये, ‘कोए भी कोनी।’” इसकै बाद हेबेर की पत्नी याएल नै डेरे की एक खूँटी ली, अर अपणे हाथ म्ह एक हथौड़ा भी लिया, अर दबे पाँव उसके पास जाकै खूँटी ताहीं उसकी कनपटी म्ह इसा ठोक दिया के खूँटी पार होकै धरती म्ह धसगी; वो तो थक्या था ज्यांतै गहरी नींद म्ह सोण लाग रह्या था। आखर म्ह वो मर ग्या। जिब बाराक सीसरा का पिच्छा करदा होया आया, फेर याएल उसतै भेंट करण खात्तर लिकड़ी, अर कह्या, “उरै आ, जिसनै तू ढूँढ़ण लागरया सै वो मै तन्नै दिखाऊँगी।” फेर उसनै उसके गैल जाकै के देख्या; के सीसरा मरया पड़या सै, अर वा खूँटी उसकी कनपटी म्ह गड़ी सै।
इस तरियां परमेसवर नै उस दिन कनान के राजा याबीन ताहीं इस्राएलियाँ कै स्याम्ही नीच्चा दिखाया। अर इस्राएली कनान के राजा याबीन पै प्रबल होन्दे गए, उरै तक के उननै कनान माणसां के राजा याबीन ताहीं सर्वनाश कर दिया।
Source notes (1)
- Footnote यहोवा नै उन ताहीं कनान के राजा याबीन के हाथ्थां हरा दिया
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.