Haryanvi Bible
न्यायियों 2
इस्राएलियाँ का हुकम ना मानणा
एक दिन यहोवा का दूत गिलगाल तै बोकीम म्ह जाकै कहण लाग्या, “मन्नै थारे ताहीं मिस्र तै ले आकै इस देश म्ह पोहचाया सै, जिसकै बारै म्ह मन्नै तेरे पुरखां तै कसम खाई थी। अर मन्नै कह्या था, ‘जो करार मन्नै थारै तै करया सै, उसनै मै कदे भी न्ही तोड़ूँगा; ज्यांतै थम इस देश के निवासियां तै करार ना करियो; थम उनकी वेदियाँ नै गेर दियो।’ पर थमनै मेरी बात न्ही मान्नी। थमनै इसा क्यूँ करया सै? ज्यांतै मै कहूँ सूं, ‘मै उन माणसां नै थारे स्याम्ही तै न्ही लिकाडूँगा; अर वे थारे पाँजर म्ह काण्डे, अर उनके देवता तेरै खात्तर फंदा ठैहरैगें।’” जिब यहोवा के दूत नै सारे इस्राएलियाँ तै या बात कही, तो वे माणस जोर-जोर तै रोण लाग्गे। अर उननै उस जगहां का नाम बोकीम1 धरया। अर ओड़ै उननै यहोवा खात्तर बलि चढ़ाई। जिब यहोशू नै उन माणसां ताहीं विदा करया था, फेर इस्राएली देश के सारे माणस अपणे-अपणे हिस्से की धरती नै अपणे हक म्ह कर लेण खात्तर अपणे-अपणे हिस्यां पै गए।
यहोशू की मौत
अर यहोशू के जीवन भर, अर उन बूढ़े माणसां के जीवन भर जो यहोशू के मरण कै बाद जिन्दा रहे अर देख चुके थे के यहोवा नै इस्राएल कै खात्तर किसे-किसे बड़े काम करे सैं, इस्राएली माणस यहोवा की सेवा करदे रहे। फेर यहोवा का दास नून का बेट्टा यहोशू एक सौ दस साल का होकै मर ग्या। अर उसनै तिम्नथेरेस म्ह जो एप्रैम की पहाड़ी देश म्ह गाश नाम की पहाड़ के उत्तरी और सै, उसे के हिस्से म्ह माट्टी दी गई। यहोशू की पीढ़ी के सारे माणस भी अपणे-अपणे पितरां म्ह जा मिले; फेर उसकै बाद जो दुसरी पीढ़ी होई उसके माणस ना तो यहोवा नै जाणै थे अर ना उस काम नै जो उसनै इस्राएल कै खात्तर करया था।
इस्राएल का बिश्वासघात
ज्यांतै इस्राएली वो करण लाग्गे जो यहोवा की नजर म्ह बुरा सै, अर बाल नाम के देवता की उपासना करण लाग्गे; वे अपणे पूर्वजां के परमेसवर यहोवा नै, जो उननै मिस्र देश म्ह तै लिकाड़ ल्याया था, त्याग कै पराए देवत्यां की उपासना करण लाग्गे, अर उनतै दण्डवत करया; अर यहोवा ताहीं छो दिला दिया। वे यहोवा नै त्याग कै बाल देवता अर अश्तोरेत देवी की उपासना करण लाग्गे। ज्यांतै यहोवा का छो इस्राएलियाँ पै भड़क उठ्या, अर उसनै उन ताहीं लुटेरयां कै हाथ म्ह कर दिया जो उननै लूटण लाग्गे; अर उसनै उन ताहीं च्यांरु और के दुश्मनां कै अधीन कर दिया;2 अर वे फेर अपणे दुश्मनां कै स्याम्ही ठहर न्ही सके। जित्त किते वे बाहर जान्दे ओड़ै यहोवा का हाथ उनकै खिलाफ था, ज्यांतै यहोवा नै उनतै कह्या था, बलके यहोवा नै शपथ खाई थी; इस तरियां वे बड़े संकट म्ह पड़गे।
फेर भी यहोवा उनकै खात्तर न्यायी ठहरावै था जो उननै लूटण आळे के हाथ तै छुड़ावै थे। पर वे अपणे न्यायियाँ की भी न्ही मान्नै थे; बल्कि व्यभिचारिणी की तरियां पराए देवत्यां कै पाच्छै चाल्ले अर उनतै दण्डवत करैं थे; उनके पूर्वज जो यहोवा के हुकमां नै मान्नै थे, उनकी उस लीक ताहीं उननै तावळी तै छोड़ दिया, अर उनके मुताबिक न्ही करया। जिब-जिब यहोवा उनकै खात्तर न्यायी नै ठहरान्दा तब-तब वो उस न्यायी के गैल रहकै उसके जीवन भर उननै दुश्मनां के हाथ तै छुड़ावै था; क्यूँके यहोवा उनका बिलखणा जो अंधेर अर उपद्रव करण आळयां के कारण होवै था सुणकै दुःखी था। पर जिब न्यायी मर जावै था, फेर वे पराए देवत्यां कै पाच्छै चालकै उनकी उपासना करदे, अर उननै दण्डवत करकै अपणे पुरखां तै घणे बिगड़ जावैं थे; अर अपणे बुरे काम्मां अर हठीली चाल नै न्ही छोड़ै थे। ज्यांतै यहोवा का कोप इस्राएल पै भड़क उठ्या; अर उसनै कह्या, “इस जात्ति नै उस करार ताहीं जो मन्नै उनके पूर्वजां तै करया था तोड़ दिया, अर मेरी बात न्ही मान्नी, इस कारण जिन जात्तां ताहीं यहोशू मरदे बखत छोड़ ग्या सै उन म्ह तै मै इब किसे नै उनके स्याम्ही तै न्ही लिकाडूँगा; जिसतै उनके जरिये मै इस्राएलियाँ की परीक्षा करुँ, के उनके पूर्वज मेरे राह पै चाल्ले थे उसे तरियां ए ये भी चाल्लैगें के न्ही।” ज्यांतै यहोवा नै उन जात्तां ताहीं एकदम न्ही लिकाड़या, बलके रहण दिया, अर उसनै उन ताहीं यहोशू कै हाथ म्ह भी उन ताहीं न्ही सौंप्या था।
Source notes (2)
- Footnote बोकीम रोणा
- Footnote यहोवा नै उनपै हमला करकै लूटण दिया
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.