Haryanvi Bible
यहो. 14
यरदन के पश्चिमी भाग का बटवारा
जो-जो हिस्सा इस्राएलियाँ नै कनान देश म्ह पाया, उन ताहीं एलीआजर याजक, अर नून के बेट्टे यहोशू, अर इस्राएली गोत्रां के पूर्वजां के घरान्ने के खास-खास माणसां नै उनतै दिया वे ये सै। जो हुकम यहोवा नै मूसा के जरिये साढ़े नौ गोत्रां कै खात्तर दिया था, उसकै मुताबिक उनके हिस्से चिट्ठी डाल-डालकै दिए गए। मूसा नै तो ढाई गोत्रां के भाग यरदन पार दिए थे; पर लेवियाँ तै उनकै बिचाळै कोए हिस्सा न्ही दिया था। यूसुफ के वंश के तो दो गोत्र होगे थे, यानिके मनश्शे अर एप्रैम; अर उस देश म्ह लेवियाँ तै कुछ भाग न्ही दिया गया, सिर्फ रहण के नगर, अर पशु आदि धन राक्खण नै चराई उन ताहीं मिली। जो हुकम यहोवा नै मूसा ताहीं दिया था उसकै मुताबिक इस्राएलियाँ नै करया; अर उननै देश ताहीं बाँट लिया।
फेर यहूदी यहोशू कै धोरै गिलगाल म्ह आए; अर कनजी यपुन्ने के बेट्टे कालेब नै उसतै कह्या, “तू जाणदा होवैगा के यहोवा नै कादेशबर्ने म्ह परमेसवर के भगत मूसा तै मेरे अर तेरे बारै म्ह के कह्या था। जिब यहोवा के दास मूसा नै मेरे ताहीं इस देश का भेद लेण खात्तर कादेशबर्ने तै भेज्या था तब मै चाळीस साल का था; अर मै सच्चे मन तै उसके धोरै खबर ले आया। अर मेरे साथी जो मेरे गैल गए थे उननै तो प्रजा के माणसां का मन निराश कर दिया, पर मन्नै अपणे परमेसवर यहोवा की पूरी रीति तै बात मान्नी। फेर उस दिन मूसा नै कसम खाकै मेरै तै कह्या, ‘तन्नै पूरी रीति तै मेरे परमेसवर यहोवा की बात्तां का अनुकरण करया सै, इस कारण बेशक जिस धरती पै तू अपणे पैर धर आया सै वो सदा खात्तर तेरा अर तेरे वंश का भाग होवैगी।’ अर इब देख, जिब तै यहोवा नै मूसा तै यो वचन कह्या था तब तै पैंतालीस साल हो चुके सैं, जिन म्ह इस्राएली जंगळ म्ह घूमदे-फिरदे रहे; उन म्ह यहोवा नै अपणे कहण कै मुताबिक हमनै जिन्दा राख्या सै; अर इब मै पचास्सी साल का सूं। जिब मूसा नै मेरे ताहीं लड़ण खात्तर भेज्जा उतणी ताकत मेरे म्ह आज भी सै; युद्ध करण अर भित्तर-बाहर आण-जाण खात्तर जितनी उस बखत मेरे म्ह सामर्थ्य थी उतणी ए इब भी मेरे म्ह सै। इस करकै इब वो पहाड़ी देश मन्नै दे जिसकी चर्चा यहोवा नै उस दिन करी थी; थमनै तो उस दिन सुण्या होगा के उस म्ह अनाकवंशी रहवै सैं, अर बड़े-बड़े गढ़आळे नगर भी सैं; पर के बेरा सै के यहोवा मेरै गैल रहवै, अर उसके कहण कै मुताबिक मै उननै उनके देश म्ह तै लिकाड़ देऊँ।”
फेर यहोशू नै उस ताहीं आशीर्वाद दिया; अर हेब्रोन नै यपुन्ने के बेट्टे कालेब का हिस्सा कर दिया। इस कारण हेब्रोन कनजी यपुन्ने के बेट्टे कालेब का हिस्सा आज ताहीं बण्या सै, क्यूँके वो इस्राएल के परमेसवर यहोवा का पूरी रीति तै अनुगामी था। पैहले हेब्रोन का नाम किर्यतअर्बा था; वो अर्बा अनाकियाँ म्ह सबतै बड़ा माणस था। अर उस देश नै लड़ाई तै शान्ति मिली।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.