Haryanvi Bible
अय्यूब 39
“के तू जाणै सै के पहाड़ पै रहण आळी जंगळी बकरी कद बच्चें देवै सैं?
या जिब हिरणी ब्यावै सै, फेर के तू देखदा रहवै सै?
के तू उनकै गर्भ के महिन्ने गिण सकै सै,
के तू उनकै बियाण का बखत जाणै सै?
जिब वे बैठकै अपणे बच्यां नै पैदा करै,
वे अपणी पीड़ा तै छूट जावै सै?
उनके बच्चें हट्टे-कट्टे होकै मैदान म्ह बढ़ जावै सै;
वे लिकड़ ज्या सै अर फेर न्ही मुड़दे।”
“किसनै जंगळी गधे ताहीं आजाद करकै छोड़ दिया सै?
किसनै उसके बन्धन खोल्ले सै?
उसका घर मन्नै निर्जल देश ताहीं,
अर उसका बसेरा नमकीन धरती ताहीं ठहराया सै।
वो नगर के शोर-सराबे पै हाँस्सै,
अर हाँकण आळे की हाँक सुणदा भी न्ही।
पहाड़ां पै जो कुछ मिलै सै उस ताहीं वो चरै
वो सारी ढाळ की हरियाली ढूँढ़दा फिरै सै।”
“के जंगळी सांड तेरा काम करण नै खुश होवैगा?
के वो तेरी खोर कै धोरै रहवैगा?
के तू जंगळी सांड नै रस्से तै बाँधकै घाटियाँ म्ह चला सकै सै?
के वो नाळयां म्ह तेरे पाच्छै-पाच्छै हाँक्या फिरैगा?
के तू उसकी बड़ी ताकत कै कारण उसपै भरोस्सा करैगा?
या जो मेहनत का काम तेरा हो, के तू उस ताहीं उसपै छोड़ैगा?
के तू उसका बिश्वास करैगा, के वो तेरा नाज घर ले आवै,
अर तेरे खलिहाण का नाज कठ्ठा करै?”
“फेर शुतुर्मुर्गी अपणे पंखां नै खुशी तै फैलावै सै,
पर के ये पंख अर पर प्यार नै प्रगट करै सै?
क्यूँके वो तो अपणे अण्डे धरती पै छोड़ देवै
अर धूळ म्ह उननै गरम करै सै;
अर उनका ख्याल न्ही राखदी, के वे पैर तै कुचळे जावैंगे,
या कोए जंगळी-पशु उन ताहीं कुचळ देवैगा।
वो अपणे बच्यां तै इसी सखताई करै सै के मान्नो उसके न्ही सै;
फेर उसका दुख बेकार जावै सै, फेर भी वो शान्त रहवै सै;
क्यूँके परमेसवर नै उस ताहीं बिना बुद्धि के बणाया,
अर उस ताहीं समझण की शक्ति न्ही दी।
जिस बखत वो सीध्धी होकै अपणे पंख फैलावै सै,
फेर घोड़े अर उसके सवार दोनुआ नै कुछ न्ही समझदी सै।”
“के तन्नै घोड़े ताहीं उसकी ताकत दी सै?
के तन्नै उसकी गर्दन म्ह फैहरान्दे होए घणे बाळ जमाए सै?
के उस ताहीं टिड्डी जिसी उछलण की शक्ति तू देवै सै?
उसके फूँकारण का शब्द डरावणा होवै सै।
वो तराई म्ह खुर टाप मारै सै अर अपणी ताकत तै खुश रहवै सै,
वो हथियारबन्दा का सामना करण नै लिकड़ पड़ै सै।
वो डर की बात पै हाँस्सै, अर घबरान्दा न्ही;
अर तलवार तै पाच्छै न्ही हटदा।
तरकश अर चमकदा होया बरछा अर भाल्ला
उसपै खड़खड़ावै सै।
वो जोश तै अर छो के मारे धरती नै निगळै सै;
जिब नरसिंगे का शब्द सुणाई देवै सै फेर वो रुकदा न्ही।
जिब-जिब नरसिंगा बाजदा तब-तब वो हिण-हिणावै सै,
अर लड़ाई अर अफसरां की ललकार
अर जय-जयकार नै दूर तै सूंघ लेवै सै।”
“के तेरे समझाण तै बाज उड़ै सै,
अर दक्षिण की ओड़ उड़ण नै अपणे पंख फैलावै सै?
के उकाब तेरे हुकम तै उप्पर चढ़ जावै सै,
अर ऊँच्ची जगहां पै अपणा घोंसला बणावै सै?
वो पहाड़ पै रहवै अर पहाड़ां की चोट्टी
अर मजबूत जगहां पै बसेरा करै सै।
वो अपणी आँखां तै दूर तक देक्खै सै,
ओड़ै तै वो अपणे शिकार नै देख लेवै सै।
उसके बच्चे भी शिकार का लहू चूस्सै सैं;
अर जित्त मारे होए माणस होवै ओड़ै वो भी होवै सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.