Haryanvi Bible
अय्यूब 34
एलीहू का वचन
फेर एलीहू यो कहन्दा गया;
“हे बुद्धिमान्नो! मेरी बात सुणो,
हे ज्ञानियो! मेरी बात पै कान लगाओ,
क्यूँके जिस तरियां जीभ तै चाख्या जावै सै,
उस्से तरियां ए वचन कान तै परखे जावै सै।
जो कुछ ठीक सै, हम अपणी खात्तर चुण ल्यां;
जो भला सै, हम आप्पस म्ह समझ-बूझ ल्यां।
क्यूँके अय्यूब नै कह्या सै, ‘मै बेकसूर सूं,
अर परमेसवर नै मेरा हक मार दिया सै।
जै मै सच्चाई पै सूं, तोभी झूठा ठहरूँ सूं,
मै बेकसूर सूं, पर मेरा जख्म लाईलाज सै।’
अय्यूब कै बराबर कौण शूरवीर सै,
जो परमेसवर की निन्दा पाणी की तरियां पीवै सै,
जो अनर्थ करण आळयां का साथ देवै,
अर दुष्ट माणसां की संगति राक्खै सै?
उसनै तो कह्या सै, ‘माणस नै इसतै किमे फायदा न्ही
के वो खुशी तै परमेसवर की संगति राक्खै।’”
“इस करकै हे समझ आळेयो! मेरी सुणो,
यो हो न्ही सकदा के परमेसवर दुष्टता का काम करै,
अर सर्वशक्तिमान बुराई करै।
वो माणस की करणी का फळ देवै सै,
अर हरेक नै अपणी-अपणी चाल का फळ भुगतावै सै।
बे-शक परमेसवर दुष्टता न्ही करदा
अर ना सर्वशक्तिमान अन्याय करै सै।
किसनै धरती ताहीं उसके हाथ म्ह सौंप दिया?
या किसनै सारी दुनिया का बन्दोबस्त करया?
जै वो माणस तै अपणा मन हटावै
अर अपणी आत्मा अर साँस अपणे ए म्ह समेट ले,
तो सारे देहधारी एकदम नाश हो जावैंगे,
अर माणस फेर माट्टी म्ह मिल जावैगा।”
“इस करकै इसनै सुणकै समझ राक्ख,
अर मेरी इन बात्तां पै कान लगा।
जो न्याय का बैरी हो, के वो राज करै?
जो पूरा धर्मी सै, के तू उस ताहीं दुष्ट ठहरावैगा?
वो राजा तै कहवै सै, ‘तू नीच सै’;
अर प्रधानां तै, ‘थम दुष्ट सो।’
परमेसवर तो हाकिमां का पक्ष न्ही करदा
अर धनी अर कंगाल दोनुआ नै अपणे बणाए होए जाणकै
उन म्ह किमे भेद न्ही करदा।
आध्धी रात नै पलभर म्ह वे मर जावै सै,
अर प्रजा के लोग हिलाए जावै अर जान्दे रहवै सै।
अर प्रतापी माणस बिना हाथ लगाऐ ठा लिए जावै सै।”
“क्यूँके परमेसवर की आँख माणस की चाल चलण पै लाग्गी रहवै सै,
अर वो उसकी सारी चाल नै देखदा रहवै सै।
इसा अँधेरा या घणा अन्धकार किते न्ही सै
जिस म्ह गलत करण आळे छिप सकै।
क्यूँके उसनै माणस का कुछ बखत न्ही ठहराया
ताके वो परमेसवर कै स्याम्ही अदालत म्ह जावै।
वो बड़े-बड़े बलवानां नै बिना पूछताछ के चूर-चूर करै सै,
अर उनकी जगहां पै दुसरयां नै खड्या कर देवै सै।
इस करकै के वो उनके काम्मां नै आच्छी तरियां जाणै सै,
वो उननै रात म्ह इसा उलट देवै सै के वे चूर-चूर हो जावै सै।
वो उननै दुष्ट जाणकै सारया के देखदे होये मारै सै,
क्यूँके उननै उसकै पाच्छै चालणा छोड़ दिया सै,
अर उसके किस्से राह पै मन ना लगाया,
उरै तक के उनकै कारण कंगालां की दुहाई उस तक पोहची
अर उस नै गरीब माणसां की दुहाई सुणी।
जिब वो चुप रहवै सै तो उस ताहीं कौण दोषी ठहरा सकै सै?
अर जिब वो मुँह फेर ले, फेर कौण उसका दर्शन पा सकै सै?
सारी जात्ति कै गैल अर एक्ले माणस, दोनुआ की गैल उसका बराबर बरताव सै
ताके भगतिहीन राज्य करदा ना रहवै,
अर प्रजा जाळ म्ह फसाई ना जावै।”
“के किसे नै कदे परमेसवर तै कह्या,
‘मन्नै सजा सहण करी, इब मै भविष्य म्ह बुराई न्ही करुँगा,
जो किमे मन्नै समझ न्ही आन्दा, वो तू मन्नै सिखा दे;
अर जै मन्नै टेढ़ा काम करया हो, तो भविष्य म्ह उसा न्ही करुँगा?’
के वो तेरे ए मन कै मुताबिक बदला पावै क्यूँके तू उसतै खुश न्ही सै?
क्यूँके तन्नै फैसला करणा सै, ना के मन्नै;
इस करकै जो कुछ तन्नै समझ आवै सै, वो कह दे।
सारे ज्ञान्नी माणस
बल्के जितने बुद्धिमान मेरी सुणै सै वे मेरे तै कहवैंगे,
‘अय्यूब ज्ञान की बात न्ही कहन्दा,
अर ना उसके वचन समझ की गैल होवै सै।’
भला होन्दा, के अय्यूब आखिर तक परीक्षा म्ह रहन्दा,
क्यूँके उसनै अनर्थकारियाँ की तरियां जवाब दिए सै।
अर वो अपणे पाप म्ह बिरोध बढ़ावै सै;
अर म्हारे बीच म्ह ताड़ी बजावै सै,
अर परमेसवर कै खिलाफ भोत सी बात बणावै सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.