Haryanvi Bible
अय्यूब 22
एलीपज का इलजाम
फेर तेमानी एलीपज नै कह्या,
“के माणस तै परमेसवर नै फायदा पोहच सकै सै?
जो अकलमंद सै, वो खुद कै खात्तर फायदेमन्द सै।
के तेरे धर्मी होण तै सर्वशक्तिमान सुख पा सकै सै?
तेरी चाल की खराई तै के उस नै कुछ फायदा हो सकै सै?
वो तो तन्नै डाँटै सै, अर तेरे तै मुकद्दमा लड़ै सै,
तो के यो तेरी भगति कै कारण सै?
के तेरी बुराई भोत न्ही?
तेरे अधर्म के काम्मां का कुछ खात्मा न्ही।
तन्नै तो अपणे भाई का कैद्दी बिना कारण राख लिया सै,
अर नंगे माणस के भी कपड़े उतार लिये सै।
थके होए तै तन्नै पाणी न्ही पिलाया,
अर भूक्खे तै रोट्टी देण तै इन्कार करया।
जो ताकतवर था उस्से नै धरती मिली,
अर जिस माणस की मान-बड़ाई होई थी, वोए उस म्ह बस ग्या।
तन्नै बिधवा ताहीं खाल्ली हाथ भेज दिया।
अर अनाथ्थां की बाजू तोड़ गेरी।
इस करकै तेरे च्यांरु ओड़ फंदे लाग्गै सै,
अर चाणचक डर के मारे तू घबरा रह्या सै।
के तू अन्धेरै नै न्ही देखदा,
अर उस बाढ़ नै जिस म्ह तू डूब रह्या सै?”
“के परमेसवर सुर्ग की ऊँच्ची जगहां म्ह न्ही सै?
ऊँच्चे तै ऊँच्चे तारयां नै देख के वे कितणे ऊँच्चे सै।
फेर तू कहवै सै, ‘परमेसवर के जाणै सै?
के वो घोर अन्धकार की आड़ म्ह होकै न्याय करैगा?
काळी घटा तै वो इसा छिप्या रहवै सै के वो कुछ भी न्ही देख सकदा,
वो तो अकासमण्डल के उप्पर चाल्लै-फिरै सै।’
के तू उस पुराणी राह नै पकड़े रहवैगा,
जिसपै वे अनर्थ करणीये चाल्लै सै?
वे अपणे बखत तै पैहले ठा लिए गए
अर उनके घर की नींव नदी बहा लेगी।
उननै परमेसवर तै कह्या था, ‘म्हारे तै दूर हो ज्या;’
अर यो के ‘सर्वशक्तिमान परमेसवर म्हारा के कर सकै सै?’
फेर भी उसनै उनके घर आच्छी-आच्छी चिज्जां तै भर दिए
पर दुष्ट माणसां का विचार मेरे तै दूर रहवै।
धर्मी माणस देखकै खुश होवै सै;
अर बेकसूर माणस उनकी हाँस्सी करै सै, के
‘जो म्हारे खिलाफ उठ्ठे थे, बे-शक मिटगे
अर उनका बड़ा धन आग म्ह भस्म होग्या सै।’”
“परमेसवर तै मेळ-मिलाप कर फेर तन्नै शान्ति मिलैगी;
अर इसतै तेरी भलाई होवैगी।
उसके मुँह तै शिक्षा सुणले,
अर उसके वचन अपणे मन म्ह राख।
जै तू सर्वशक्तिमान परमेसवर की ओड़ फिरकै धोरै जावै,
अर अपणे तम्बू तै बुरे काम दूर करै, तो तू पैहला जिसा बण जावैगा।
तू अपणी अनमोल चिज्जां नै धूळ पै, बल्के
ओपीर का कुन्दन भी नाळयां के पत्थरां म्ह गेर दे,
फेर सर्वशक्तिमान आप तेरी अनमोल चीज
अर तेरी खात्तर चमकदार चाँदी होवैगा।
फेर तू सर्वशक्तिमान तै सुख पावैगा,
अर परमेसवर की ओड़ अपणा मुँह बेधड़क ठा सकैगा।
अर तू उसतै प्रार्थना करैगा, अर वो तेरी सुणैगा;
अर तू अपणी मन्नतां नै पूरी करैगा।
जिस बात नै करण की तू ठाण ले वो तेरे तै बण भी जावैगी,
अर तेरे राह म्ह चाँदणा रहवैगा।
माणस जिब गिरै सै, फेर तू कहवै सै के वो ठाया जावैगा;
क्यूँके वो नरम माणस नै बचावै सै।
बल्के जो बेकसूर ना हो उस ताहीं भी वो बचावै सै;
तेरे शुद्ध काम्मां के कारण तू छुटाया जावैगा।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.