Haryanvi Bible
अय्यूब 1
अय्यूब का भारी परीक्षा म्ह पड़णा
ऊज नाम के देश म्ह अय्यूब नाम का एक माणस था; वो खरा अर सीध्धा था अर वो परमेसवर का भय मान्या करदा अर बुराई तै दूर रहया करदा। उसके सात बेट्टे अर तीन बेट्टी पैदा होई। अर उसके सात हजार भेड़-बकरी, तीन हजार ऊँट, पाँच सौ जोड़ी बळध, अर पाँच सौ गधी, अर भोत-से दास-दासियाँ थी; बल्के उसकी इतणी जायदाद थी, के वो पूर्वी देशां म्ह सबतै बड़ा था। उसके बेट्टे बारी-बारी तै एक दुसरे के घर म्ह खाण-पीण नै जाया करदे; अर अपणी तीन्नु भाणा नै अपणे गैल खाण-पीण खात्तर बुलावा भेज्या करदे। अर जिब-जिब दावत के दिन पूरे हो जान्दे, जद-जद अय्यूब उननै बुलवाकै पवित्र करदा, अर सबेरै तावळा उठकै उनकी गिणती कै मुताबिक होमबलि चढ़ाया करै था; क्यूँके अय्यूब सोच्या करदा, “कदे मेरे बाळकां नै पाप करकै परमेसवर ताहीं छोड़ दिया हो।” इस्से तरियां अय्यूब हमेशा, करया करदा।
एक दिन सुर्गदूत यहोवा कै स्याम्ही हाजिर होए, अर उनकै बीच शैतान भी आया। यहोवा नै शैतान तै पूच्छया, “तू कित्त तै आवै सै?” शैतान नै यहोवा तै उत्तर दिया, “धरती पै आस्सै-पास्सै घूमदे-फिरदे अर डोलते-डालते आया सूं।” यहोवा नै शैतान तै पूच्छया, “के तन्नै मेरे दास अय्यूब पै ध्यान दिया सै? क्यूँके उसके जिसा खरा अर सीध्धा अर मेरा भय मान्नण आळा अर बुराई तै दूर रहण आळा माणस और कोए न्ही सै।” शैतान नै यहोवा तै उत्तर दिया, “के अय्यूब परमेसवर का भय बिना फायदा के मान्नै सै? के तन्नै उसका, अर उसके घर का, अर जो कुछ उसका सै उसके च्यांरु ओड़ बाड़ा न्ही बाँध्या? तन्नै तो उसके काम्मां पै आशीष दी सै, अर उसकी जायदाद देश भर म्ह फैलगी सै। पर इब अपणा हाथ बढ़ाकै जो कुछ उसका सै, उस नै छू; फेर वो तेरे मुँह पै तेरी बुराई करैगा।” यहोवा नै शैतान तै कह्या, “सुण, जो कुछ उसका सै, वो सब तेरे हाथ म्ह सै; सिर्फ उसकी शरीर पै हाथ ना लगाईये।” फेर शैतान यहोवा कै स्याम्ही तै चल्या गया।
अय्यूब के बाळकां अर जायदाद का नाश
एक दिन अय्यूब के बेट्टे-बेट्टी बड़े भाई के घर म्ह खाण अर दाखमधु पीण लागरे थे; फेर एक दूत अय्यूब कै धोरै आकै कहण लाग्या, “हम तो बळधां तै हळ जोत्तण लागरे थे अर सारी गधी उनकै धोरै चरण लागरी थी तो शेबा देश के लोग हमला करकै उननै लेगे, अर तलवार तै तेरे सेवकां ताहीं मार दिया; अर मै एक्ला ए बचकै तन्नै या खबर देण खात्तर आया सूं।” वो इब्बे यो कहणे लाग रहया था के दूसरा भी आकै कहण लाग्या, “परमेसवर की आग आसमान तै गिरी अर उसतै सारी भेड़-बकरी अर सेवक जळकै भस्म होगे; अर मै एक्ला ए बचकै तन्नै या खबर देण खात्तर आया सूं।” वो इब्बे यो कहणे लाग रहया था, के एक और भी आकै कहण लाग्या, “कसदी माणस तीन दल बाँधकै ऊँटां पै हमला करकै उननै लेगे, अर तलवार तै तेरे सेवकां ताहीं मार गेरया; अर मै एक्ला ए बचकै तन्नै खबर देण नै आया सूं।” वो इब्बे यो कहण ए लाग रहया था, के एक और भी आकै कहण लाग्या, “तेरे बेट्टे-बेट्टी बड़े भाई के घर म्ह खाण अर दाखमधु पीण लागरे थे, के जंगल की ओड़ तै घणी तेज हवा चाल्ली, अर घर के च्यांरु कुण्यां कै इसा झोंक्का मारया, के वो जवानां पै गिर पड़या अर वे मरगे; अर मै एक्ला ए बचकै तन्नै खबर देण नै आया सूं।”
फेर अय्यूब उठ्या, अर दुख मै चोळा पाड़कै, सिर मुँड़ाकै धरती पै पड़ग्या अर परमेसवर नै दण्डवत करकै कह्या, “मै अपणी माँ कै पेट तै नंगा लिकड़या अर नंगा ए बोहड़ ज्याऊँगा; यहोवा नै दिया अर यहोवा नै ए ले लिया; यहोवा का नाम धन्य सै।”
इन सारी बात्तां म्ह भी अय्यूब नै ना तो पाप करया, अर ना परमेसवर पै बेकूफी तै दोष लगाया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.