Haryanvi Bible
यशायाह 21
बाबेल के पतन का दर्शन
समुन्दर1 कै धोरै के जंगळ कै बारै म्ह भारी वचन। जिस तरियां दक्षिणी प्रचण्ड बवण्डर चल्या आवै सै, वो जंगळ तै यानिके डरावणे देश तै दक्षिणी के धोरै आण लागरया सै। कष्ट की बात्तां का मेरे ताहीं दर्शन दिखाया गया सै; धोक्खेबाज धोक्खेबाजी करै सै, अर नाशक नाश करै सै। हे एलाम देश, चढ़ाई कर, हे मादै, घेर ले; उसका सारा कराहणा मै बन्द करुँ सूं। इस कारण मेरी कमर म्ह ओक्खी पीड़ा सै; मेरे ताहीं मान्नो जच्चा की सी पीड़ा हो रह्यी सै; मै इसा संकट म्ह पड़ग्या सूं के किमे सुणाई न्ही देन्दा, मै इसा घबरा ग्या सूं के किमे दिखाई न्ही देन्दा। मेरा दिल धड़कै सै, मै घणा डर ग्या सूं, जिस साँझ की मै बाट देक्खूँ था उसनै उस ताहीं मेरी थरथराहट का कारण बणा दिया सै। खाणे की त्यारी होण लागरी सै, पहरेदार बिठाए जाण लागरे सैं, खाणा-पीणा होण लागरया सै। हे हाकिमों, उठो, ढाल म्ह तेल मळो!2 क्यूँके प्रभु नै मेरे ताहीं न्यू कह्या सै, “जाकै एक पहरेदार खड़या कर दे, अर वो जो किमे देक्खै उसनै बतावै। जिब वो सवार देक्खै जो दो-दो करकै आन्दे हों, अर गध्यां अर ऊँट के सवार, फेर घणाए ध्यान देकै सुणै।” अर उसनै शेर के जिसे शब्द तै पुकारया, “हे प्रभु मै दिन भर खड्या पैहरा देन्दा रह्या अर मन्नै पूरी रात पहरे पै काट्टी। अर के देक्खूँ सूं3 के माणसां का दल अर दो-दो करकै सवार चाल्ले आण लागरे सैं!” अर वो बोल उठ्या, “गिर पड्या, बाबेल गिर पड्या; अर उसके देवत्यां की सारी खुदी होई मूरत धरती पै चकणाचूर कर कै गेर दी गई सैं।” हे मेरे दाएँ होए, अर मेरे खलिहाण के अन्न, जो बात मन्नै इस्राएल के परमेसवर सेनाओं के यहोवा तै सुणी सै, उन ताहीं मन्नै थारे ताहीं बता दिया सै।
एदोम कै खिलाफ घोषणा
दूमा4 कै बारै म्ह भारी वचन। सेईर म्ह तै कोए मेरे ताहीं पुकारण लागरया सै, “हे पहरेदार, रात की के खबर सै? हे पहरेदार, रात की के खबर सै?” पहरेदार नै कह्या, “भोर होवै सै5 अर रात भी। जै थम पूछणा चाहो सो तो पूच्छो; फेर बोहड़कै आईयो।”
अरब कै खिलाफ घोषणा
अरब कै खिलाफ भारी वचन। हे ददानी के मुसाफिरों,6 थारे ताहीं अरब के जंगळ म्ह रात बिताणी पड़ैगी। हे तेमा नगर के रहण आळे, प्यासे कै धोरै पाणी ल्याओ अर रोट्टी लेकै भाजण आळे तै मिलण कै खात्तर जाओ। क्यूँके वे तलवारां कै स्याम्ही तै बलके नंगी तलवार तै अर ताणे होए धनुष तै अर घोर युद्ध तै भाज्जे सैं।
क्यूँके प्रभु नै मेरे ताहीं न्यू कह्या सै, “मजदूर के साल्लां कै मुताबिक एक साल म्ह केदार जात्ति का सारा वैभव मिटाया जावैगा; अर केदार के धनुर्धारी शूरवीरां म्ह तै थोड़े ए रह जावैंगे; क्यूँके इस्राएल के परमेसवर यहोवा नै इसा कह्या सै।”
Source notes (6)
- Footnote समुन्दर बाबेल
- Footnote यानिके युद्ध की त्यारी करो।
- Footnote अर के देक्खूँ सूं प्रका. 14:8, फेर इसकै पाच्छै एक और दूसरा सुर्गदूत न्यू कहन्दा होड़ आया, के पड़ग्या, वो बड्ड़ा बेबीलोन नगर पड़ग्या जिसनै अपणी जारी की कोपमय मदिरा सारी जात्तां ताहीं पिलाई सै। प्रका. 18:2 उसनै जोर तै रुक्का मारकै कह्या, पड़ग्या, बड्ड़ा बेबीलोन नगर पड़ग्या सै, अर भुंडी ओपरी आत्मायाँ का घर, हरेक भुंडी आत्मा का बसेरा, एक अशुद्ध अर घृणित पंछी का बसेरा होग्या।
- Footnote दूमा दूमा अरब सागर के उत्तरी दिशा मै एक मरूद्वीप सै
- Footnote भोर होवै सै दिन होण की निशान्नी दिखाई दे रही सैं। उरै भोर खुशहाली की निशान्नी सै।
- Footnote मुसाफिरां का एक इसा समूह जिस म्ह ऊँट और गधे शामिल होवै सै, जो सामान नै लेकै रेगिस्तानी म्ह चाल्लै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.