यशायाह 19

मिस्र कै खिलाफ घोषणा

1मिस्र1 कै बारै म्ह भारी भविष्यवाणी। देक्खो, यहोवा तावळा उड़ण आळे बादळ पै सवार होकै मिस्र म्ह आण लागरया सै; अर मिस्र की मूरत उसके आण तै थरथरा उठैंगी, अर मिस्र के रहण आळा का हृदय पाणी-पाणी हो जावैगा। 2यहोवा2 न्यू कहवै सै, मै मिस्रियाँ ताहीं एक दुसरे कै खिलाफ उभारूँगा, अर वे आप्पस म्ह लड़ैंगें, हरेक अपणे भाई तै अर हरेक अपणे पड़ोसी तै लड़ैगा, नगर-नगर म्ह अर एक राज्य का दुसरे राज्य तै युद्ध छिड़ैगा; 3अर मिस्रियाँ की बुद्धि मारी जावैगी3 अर मै उनकी युक्तियाँ नै बेकार कर दियुँगा; अर वे अपणी मूरतां कै धोरै अर ओझां अर फुसफुसाण आळे टोन्हा कै धोरै जा-जाकै उनतै पूच्छैगें; 4पर मै मिस्रियाँ ताहीं एक कठोर राजा कै हाथ म्ह कर दियुँगा; अर एक जालिम राजा उनपै प्रभुता करैगा, प्रभु सेनाओं के यहोवा की याए वाणी सै।

5जिब समुन्दर का पाणी सूख जावैगा, अर महानदी सूख कै खाल्‍ली हो जावैगी; 6अर नाळे तै बदबू आण लाग्गैगी, अर मिस्र की नहरें भी सूख जावैंगी, अर नरकट अर हूगले कुम्हला जावैंगे। 7नील नदी का किनारा उजड़ जावैगा, अर उसके कछार की घास, अर जो किमे नील नदी कै धोरै बोया जावैगा वो सूख कै नाश हो जावैगा, अर उसका बेरा भी ना पाट्टैगा। 8सारे मछुआरे जितने नील नदी म्ह बंसी डालै सैं विलाप करैंगे अर लाम्बी-लाम्बी साँस लेवैंगे, अर जो पाणी कै उप्पर जाळ फेंकै सैं वे कमजोर हो जावैंगे। 9फेर जो माणस धुने होए सण तै काम करैं सैं अर जो सूत तै बुणै सैं उनकी उम्मीद जावैगी। 10मिस्र देश म्ह रईस तो निराश अर उसके सारे मजदूर उदास हो जावैंगे।

11पक्‍का सोअन शहर के सारे हाकिम मूर्ख सैं; अर फिरौन के बुद्धिमान मंत्रियाँ की योजना पशु की जिसी ठहरी। फेर थम फिरौन तै किस तरियां कह सको सो के मै बुद्धिमानां का बेट्टा अर पुराणे राजयां की औलाद सूं? 12हे मिस्र4 देश के राजा इब तेरे बुद्धिमान कित्त सै? सेनाओं के यहोवा नै मिस्र के बारै म्ह जो योजना बणाई सै, उस ताहीं जै वे जाण्दे हों तो तेरे ताहीं बतावै। 13सोअन5 के हाकिम मूर्ख बणगे सैं, नोप शहर के हाकिमां नै धोखा खाया सै; अर जिनपै मिस्र के प्रधान माणसां का भरोस्सा था उननै मिस्र ताहीं भरमा दिया सै। 14यहोवा नै उस म्ह भ्रमता पैदा करी सै6; उननै मिस्र ताहीं उसके सारे काम्मां म्ह उस मतवाळे की तरियां कर दिया सै जो वमन करदे होए डगमगावै सै। 15अर मिस्र कै खात्तर कोए इसा काम ना रहवैगा जो सिर या पूँछ तै या खजूर की डालियाँ या सरकण्डे तै हो सकै।

मिस्र परमेसवर की उपासना करैगा

16उस बखत मिस्री, जनानियाँ की तरियां हो जावैंगे, अर सेनाओं का यहोवा जो अपणा हाथ उनपै बढ़ावैगा उसके डर के मारे वे थरथरावैंगे अर काँम्ब उठैगें। 17अर यहूदा का देश मिस्र कै खात्तर उरै ताहीं भय का कारण होवैगा के जो कोए उसकी चर्चा सुणैगा वो थरथरा उठैगा; सेनाओं के यहोवा की उस योजना का योए फळ होवैगा जो वो मिस्र कै खिलाफ करै सै।

18उस बखत मिस्र देश म्ह पाँच नगर होवैंगे जिनके माणस कनान की भाषा बोलैगें अर यहोवा की कसम खावैंगे। उन म्ह तै एक का नाम नाशनगर धरया जावैगा।

19उस बखत मिस्र देश कै बीच म्ह यहोवा खात्तर एक वेदी होवैगी, अर उसकी सीमा कै धोरै यहोवा खात्तर एक खम्बा खड़या होवैगा। 20वो मिस्र देश म्ह सेनाओं के यहोवा खात्तर निशान्‍नी अर गवाह ठहरैगा; अर जिब वे अंधेर करण आळे कै कारण यहोवा नै मदद खात्तर पुकारैंगे, फेर वो उनकै धोरै एक उद्धारकर्ता अर रक्षक भेज्जैगा, अर उननै आजाद करैगा। 21फेर यहोवा अपणे-आपनै मिस्रियाँ पै प्रगट करैगा; अर मिस्री उस बखत यहोवा नै पिच्छाणैगें अर मेलबलि अर अन्‍नबलि चढ़ाकै उसकी आराधना करैंगे, अर यहोवा खात्तर मन्‍नत मानकै पूरी भी करैंगे। 22अर यहोवा मिस्रियाँ नै मारैगा, वो मारैगा अर चंगा भी करैगा, अर वे यहोवा की और फिरैंगे अर वो उनकी बिनती सुणकै उननै चंगा करैगा।

23उस बखत मिस्र तै अश्शूर जाण का एक राजमार्ग होगा, अर अश्शूरी मिस्र म्ह आवैंगे अर मिस्री माणस अश्शूर म्ह जावैंगे, अर मिस्री अश्शूरियां कै साथ मिलकै परमेसवर की आराधना करैंगे।

24उस बखत इस्राएल, मिस्र अर अश्शूर तीन्‍नु मिलकै धरती खात्तर आशीष का कारण होवैंगे। 25क्यूँके सेनाओं का यहोवा उन तीनुआं ताहीं या कहकै आशीष देवैगा, धन्य हो मेरी प्रजा मिस्र के रहण आळे, अर मेरा रच्या होया अश्शूर के रहण आळे, अर मेरा खास भाग इस्राएल।