Haryanvi Bible
होशे 7
जिब मै इस्राएल नै चंगा करुँ सूं फेर एप्रैम का अधर्म अर सामरिया की बुराई भी प्रगट हो जावै सै; वे छळ तै काम करैं सैं, चोर भित्तर घुसैं, अर डाकुआं का दल बाहर छीन लेवै सै। तोभी वे न्ही सोचदे के यहोवा म्हारी सारी बुराई नै याद राक्खै सै। इस करकै इब वे अपणे काम्मां के जाळ म्ह फँसैंगे, क्यूँके उनके काम मेरी नजर म्ह बणे सै।
वे राजा नै बुराई करण तै1, अर हाकिमां नै झूठ बोलण तै आनन्दित करैं सै। वे सारे के सारे व्यभिचारी सै; वे उस तन्दूर की तरियां सै जिस ताहीं पकाण आळा गरम करदा रहवै सै, पर जिब ताहीं आटा गूँध्यां न्ही जान्दा अर खमीर तै फूल न्ही जान्दा, तब ताहीं वो आग नै तेज न्ही करदा। म्हारे राजा के जन्म दिन म्ह हाकिम दाखमधु पीकै चूर होए; उसनै मजाक करण आळयां तै अपणा हाथ मिलाया। जिब ताहीं वे घात लगाये रहवैं सै, तब ताहीं वे अपणा मन तन्दूर की तरियां त्यार करदे रहवैं सै; उनका पकाण आळा पूरी रात सोन्दा रहवै सै; वो सुबेरै नै तन्दूर की धधकती लौ की तरियां लाल हो जावै सै। वे सारे के सारे तन्दूर की तरियां धधकै, अर अपणे न्यायियाँ नै भस्म करैं सैं। उनके सारे राजा मारे गए सैं; अर उन म्ह तै कोए मेरी दुहाई न्ही देन्दा।
एप्रैम देश-देश के माणसां तै मिल्या जुल्या रहवै सै; एप्रैम इसी रोट्टी ठहरया सै जो पलटी ना गई हो। परदेशियाँ नै उसका बल तोड़ गेरया, पर वो इसनै न्ही जाणदा; उसके सिर म्ह कित्ते-कित्ते पके बाळ सैं, पर वो इसनै भी न्ही जाणदा। इस्राएल का गर्व उस्से कै खिलाफ गवाही देवै सै; इन सब बात्तां के रहन्दे होए भी वे अपणे परमेसवर यहोवा की और न्ही मुड़े, अर ना उस ताहीं ढूँढ्या।
एप्रैम एक भोळी कबूतरी की तरियां होग्या सै जिस म्ह कुछ बुद्धि न्ही; वे मिस्रियाँ की दुहाई देवैं2, अर अश्शूर ताहीं चले जावैं सै। जिब वे जावैं, फेर उनके उप्पर मै अपणा जाळ फैलाऊँगा; मै उननै इसा खींच ल्यूँगा जिस तरियां अकास के पंछी खींचे जावैं सै; मै उननै इसी फटकार देऊँगा, जिसी उनकी मण्डळी सुण चुकी सै। उनपै हाय, क्यूँके वे मेरे धोरै तै भटकगे! उनका सत्यानाश हो, क्यूँके उननै मेरे तै बिश्वासघात करया सै! मै तो उननै छुड़ान्दा रहया, पर वे मेरे खिलाफ झूठ बोलदे आए सै।
वे मन तै मेरी दुहाई न्ही देन्दे, पर अपणे बिछोणे पै पड़े होए हाय, हाय, करै सैं; वे अन्न अर नये दाखमधु पाण कै खात्तर भीड़ लगावैं, अर मेरे तै बिश्वासघात करै सैं। मै उननै शिक्षा देन्दा रहया अर उनकी बांह नै ताकतवर करदा आया सूं, फेर भी वे मेरै खिलाफ बुरी कल्पना करैं सैं। वे फिरैं तो सैं, पर परमप्रधान की और न्ही; वे धोक्खा देण आळे धनुष की तरियां सै; इस करकै उनके हाकिम अपणी छो भरी बात्तां कै कारण तलवार तै मारे जावैंगे। मिस्र देश म्ह उन ताहीं मजाक म्ह उड़ाए जाण का योए कारण होवैगा।
Source notes (2)
- Footnote वे राजा नै बुराई करण तै दुष्ट राजा अर दुष्ट माणस एक दुसरे कै खात्तर श्राप सै दोन्नु एक दुसरे नै पाप कै खात्तर प्रोत्साहित करै सै। उनका राजा दुष्ट होण कै कारण, उनकी बुराई का आनन्द लेवै था।
- Footnote वे मिस्रियाँ की दुहाई देवैं याए उनकी भूल थी वे मिस्र तै छुड़ाणआळे अपणे परमेसवर नै न्ही पुकारै थे, बलके अपणे दो शक्तिशाली पड़ोसी देशां की और देक्खैं थे जिन म्ह मिस्र एक भ्रमित प्रतिज्ञाता था अर अश्शूर एक शक्तिशाली उत्पीड़क था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.