Haryanvi Bible
होशे 5
इस्राएल अर यहूदा का न्याय
हे याजकों, या बात सुणो! हे इस्राएल के घरान्ने, ध्यान देकै सुणो! हे राजा के घरान्ने, थम भी कान लगाओ! क्यूँके थारा न्याय करया जावैगा; क्यूँके थम मिस्पा म्ह फंदा, अर ताबोर पहाड़ पै लगाया होया जाळ बणगे सो। उन बिगड़े होयां नै घोर हत्या करी सै, इस करकै मै उन सारया नै फटकार देऊँगा।
मै एप्रैम का भेद जाणु सूं, अर इस्राएल की हालत मेरे तै छिपी न्ही सै; हे एप्रैम, तन्नै ओछापण करया, अर इस्राएल अशुद्ध होया सै।
उनके काम उननै अपणे परमेसवर की और फिरण न्ही देन्दे, क्यूँके ओछापण करण आळी आत्मा उन म्ह रहवै सै; अर वे यहोवा नै न्ही जाणदे।
इस्राएल का गर्व उसे कै बिरुध्द गवाई देवै सै, अर इस्राएल अर एप्रैम अपणे अधर्म कै कारण ठोक्कर खावैंगे, अर यहूदा भी उनके गैल ठोक्कर खावैगा। वे अपणी भेड़-बकरियाँ अर गां-बळध लेकै यहोवा नै ढूँढ़ण चाल्लैगें, पर वो उननै ना मिलैगा; क्यूँके वो उनतै दूर होग्या सै। वे व्यभिचार के छोरे जणै सै; इसतै उननै यहोवा का बिश्वासघात करया सै। इस कारण इब चाँद उनका अर उनके हिस्यां के नाश का कारण होवैगा।
गिबा म्ह नरसिंगा, अर रामाह म्ह तुरही फूँको। बेतावेन म्ह ललकार कै कहो; हे बिन्यामीन, आगै बढ़! सजा के दिन म्ह एप्रैम उजाड़ हो जावैगा; जिस बात का होणा पक्का सै, मन्नै उसे का सन्देस इस्राएल के सारे गोत्रां तै दिया सै। यहूदा के हाकिम उनकी तरियां होए सै जो हद बढ़ा लेवैं सै; मै उनपै अपणी जळजळाहट पाणी की तरियां उण्डेलूँगा। एप्रैम पै अंधेर करया गया सै, वो मुकद्दमा हार ग्या सै; क्यूँके वो जी लगाकै उस हुकम पै चल्या। इस करकै मै एप्रैम कै खात्तर कीड़े की तरियां अर यहूदा के घरान्ने कै खात्तर सड़ाहट के जिसा होऊँगा।
जिब एप्रैम नै अपणा रोग, अर यहूदा नै अपणा घाव देख्या, फेर एप्रैम अश्शूर कै धोरै गया, अर यारेब राजा नै कुह्वा भेज्या। पर ना वो थमनै चंगा कर सकदा अर ना थारा घाव आच्छा कर सकै सै। क्यूँके मै एप्रैम कै खात्तर शेर, अर यहूदा के घरान्ने कै खात्तर जवान शेर बणुगाँ। मै आप्पे उननै पाड़कै ले जाऊँगा; जिब मै ठा ले जाऊँगा, फेर मेरे पंजे तै कोए न्ही छुड़ा सकैगा।
जिब ताहीं वे अपणे आप नै अपराधी मानकै मेरे दर्शन के खोजी ना होवैंगे तब ताहीं मै अपणी जगहां नै ना बोहडुंगाँ1, अर जिब वे संकट म्ह पड़ैंगे, फेर जी लगाकै मेरे ताहीं ढूँढ़ण लागैंगे।
Source notes (1)
- Footnote तब ताहीं मै अपणी जगहां नै ना बोहडुंगाँ जिस तरियां कोए जंगळी-पशु अपणा शिकार पकड़ लेवै सै अर फेर अपणी जगहां म्ह बोहड़ आवै सै उसे तरियां परमेसवर जिब अपणी इच्छा पूरी कर लेवैगा फेर कुछ बखत कै खात्तर अपणी उपस्थिति के सारे संकेत छिपा लेवैगा।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.