Haryanvi Bible
होशे 3
इस्राएल के परमेसवर की और बोहड़ना
फेर यहोवा नै मेरे ताहीं कह्या, “इब जाकै एक इसी जनान्नी तै प्यार कर, जो व्यभिचारिणी होण पै भी अपणे प्यारे की प्यारी हो; क्यूँके उसे ढाळ फेर भी इस्राएली पराए देवत्यां की ओड़ फिरे, अर किशमिश की टिकिया तै प्यार राक्खैं सैं, फेर भी यहोवा उनतै प्यार राक्खै सै।”
फेर मन्नै एक जनान्नी ताहीं चाँदी के पन्द्रह टुकड़े अर डेढ़ होमेर जौ देकै मोल लिया। मन्नै उसतै कह्या, “तू घणे दिन ताहीं मेरै खात्तर बैठी रहणा; अर ना तो ओछापण करणा, अर ना किसे माणस की जनान्नी होणा; अर मै भी तेरै खात्तर इसाए रहूँगा।” क्यूँके इस्राएली घणे दिन ताहीं बिना राजा, बिना हाकिम, बिना यज्ञ, बिना स्तम्भ, अर बिना एपोद या गृहदेवत्यां के बैठ्ठे रहवैगें। उसके बाद वे अपणे परमेसवर यहोवा अर अपणे राजा दाऊद नै फेर ढूँढ़ण लागैंगे1, अर अन्त के दिनां म्ह यहोवा कै धोरै, अर उसकी बढ़िया चिज्जां कै खात्तर थरथरान्दे होए आवैंगे।
Source notes (1)
- Footnote वे अपणे परमेसवर यहोवा अर अपणे राजा दाऊद नै फेर ढूँढ़ण लागैंगे इब्रानी म्ह इस शब्द ढूँढ़ण का मतलब सै कोशिश के गैल खोजणा जिस तरियां परमेसवर नै, यो धार्मिक खोज का बोध करवावै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.