Haryanvi Bible
होशे 10
इस्राएल का पाप अर उनकी गुलाम्मी
इस्राएल एक लहरान्दी होई दाखलता जिसा सै, जिस म्ह घणे सारे फळ भी लाग्गे, पर ज्यों-ज्यों उसके फळ बढ़े, जिब-जिब उसनै घणी वेदी बणाई जिस तरियां ए उसकी धरती सुधरी, उसे तरियां ए वे सुन्दर खम्भे बणान्दे गये। उनका मन बट्या होया सै; इब वे दोषी ठहरैगें। वो उनकी वेदियाँ नै तोड़ गेरैगा, अर उनकी लाठां नै टुकड़े-टुकड़े करैगा। इब वे कहवैंगे, “म्हारा कोए राजा न्ही सै, क्यूँके हमनै यहोवा का भय न्ही मान्या; इस करकै राजा म्हारा के कर सकै सै?” वे बात बणान्दे अर झूठ्ठी कसम खाकै करार बाँधै सै; इस कारण खेत की क्यारियाँ म्ह धतूरे की तरियां सजा फुल्लै फळैगी। सामरिया के बासिन्दे बेतावेन के बाछड़े कै खात्तर डरदे रहवैंगे, अर उसके माणस उसकै खात्तर विलाप करैंगे; अर उसके पुजारी जो उसके कारण मगन होवैं थे उसके प्रताप कै खात्तर इस करकै विलाप करैंगे क्यूँके वो उन म्ह तै उठ ग्या सै। वो यारेब राजा की भेंट ठहरण कै खात्तर अश्शूर देश म्ह पोहचाया जावैगा। एप्रैम शर्मिन्दा होगा, अर इस्राएल भी अपणी युक्ति तै सरमावैगा।
सामरिया अपणे राजा समेत पाणी के बुलबले की तरियां मिट जावैगा1। आवेन की ऊँच्ची जगहां जो इस्राएल के पाप सै, वे नाश होवैंगे। उनकी वेदियाँ पै झड़बेरी, पेड़ अर ऊँटकटारे उगैंगे; अर उस बखत माणस पहाड़ां तै कहण लागैंगे, म्हारे ताहीं छिपा ल्यो, अर टील्यां तै के म्हारे पै गिर पड़ो। हे इस्राएल, तू गिबा के दिनां तै पाप करदा आया सै; वे उसे म्ह बणे रहें; के वे गिबा म्ह कुटिल माणसां कै गैल लड़ाई म्ह ना फसै? जिब मेरी इच्छा होवैगी फेर मै उननै फटकार देऊँगा, अर देश-देश के माणस उनके खिलाफ कठ्ठे हो जावैंगे; क्यूँके वे अपणे दोन्नु अधर्म म्ह फसे होए सै।
एप्रैम सीखी होई बछिया सै, जो अन्न काटण तै खुश होवै सै, पर मन्नै उसकी सुन्दर गर्दन पै जूआ धरया सै; मै एप्रैम पै सवार चढ़ाऊँगा; यहूदा हळ, अर याकूब सुहागा खींचैगा। अपणे खात्तर धार्मिकता का बीज बोओ, फेर करुणा कै मुताबिक खेत काटण पाओगे; अपणी पड़दी धरती नै जोत्तो; देक्खो, इब्बे यहोवा कै पाच्छै हो लेण का बखत सै, के वो आवै अर थारे उप्पर उद्धार बरसावै।
थमनै बुराई कै खात्तर हळ जोत्या अर अन्याय का खेत काटया सै; अर थमनै धोक्खे का फळ खाया सै। अर यो इस करकै होया क्यूँके थमनै अपणे बुरे व्यवहार पै, अर अपणे घणे से वीरां पै भरोस्सा राख्या था। इस कारण थारे माणसां म्ह सोर सराबा उठैगा, अर थारे सारे गढ़ इसे नाश करे जावैंगे जिसा बेतर्बेल नगर युद्ध के बखत शल्मन के जरिये नाश करया गया; उस बखत माँ अपणे बाळकां समेत पटक देई गई थी। थारी भोत बुराई कै कारण बेतेल तै भी इस्से तरियां का बरताव करया जावैगा। सबेर होन्दे ए इस्राएल का राजा पूरी तरियां तै मिट जावैगा।
Source notes (1)
- Footnote सामरिया अपणे राजा समेत पाणी के बुलबले की तरियां मिट जावैगा मिट जावैगा। बुलबले या घणे सारे तीणके जो पाणी पै तिरदे रहवै सै। वे नग्नता तिस्सारता, महत्त्वहीनता के रूपक सै जो पाणी म्ह ढुंघे न्ही उतरदे।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.