Haryanvi Bible
उत्पत्ति 7
जहाज म्ह दाखिल होणा
फेर यहोवा नै नूह तै कह्या, “तू अपणे सारे परिवार सुधा जहाज म्ह जा; क्यूँके मन्नै इस युग के माणसां म्ह तै सिर्फ तू ए मेरी निगांह म्ह धर्मी दिख्या सै। सारी जात के शुद्ध जानवरां म्ह तै तो तू सात-सात जोड़े, यानिके नर अर मादा लिये: अर अशुद्ध जानवरां म्ह तै दो-दो लिये, यानिके नर अर मादा: अर अकास के पंछियाँ म्ह तै भी, नर अर मादा के सात-सात जोड़े लिये, यानिके नर अर मादा लिये, ताके उनकी जात्ति बचकै सारी धरती कै उप्पर जिन्दा रहवै। क्यूँके इब सात दिन कै बाद मै धरती पै लगातार चाळीस दिन अर चाळीस रात ताहीं पाणी बरसाऊँगा; अर जितने प्राणी मन्नै बणाये सै उन सारया नै धरती पै तै मिटा दियुँगा।” नूह नै यहोवा के हुकम कै मुताबिक सारा कुछ करया।
जिब जल-प्रलय धरती पै आया, तो नूह छः सौ साल का था। नूह अपणे बाळकां, घरआळी अर बहुआं समेत, बाढ़ तै बचण खात्तर जहाज म्ह दाखिल होया। शुद्ध, अर अशुद्ध दोन्नु ढाळ के जानवरां म्ह तै, पंछियाँ, अर जमीन पै रेंगण आळे जन्तुआं म्ह तै भी, दो-दो, यानिके नर अर मादा, नूह कै धोरै जहाज म्ह दाखिल होए, जिसा के परमेसवर नै नूह तै हुकम दिया था। सात दिन कै बाद धरती पै बाढ़ आण लाग्गी।
जल-प्रलय
जिब नूह की उम्र के छः सौवें साल कै दुसरे महिन्ने के सत्रहवाँ दिन आया, उस्से दिन बड़े गहरे समुन्दर के सारे चोवें फूट लिकड़े अर अकास के झरोखे खुलगे। अर इस तरियां मिह चाळीस दिन अर चाळीस रात लगातार धरती पै बरसदा रह्या। ठीक उस्से दिन जिब मिह बरसण लाग्या तो नूह अपणे बेट्टे शेम, हाम, अर येपेत, अर अपणी घरआळी, अर तीन्नु बहुआं समेत, अर उनकै गैल एक-एक जात्ति के सारे जंगळी-जानवर, अर एक-एक जात्ति के सारे घरेलू पशु, अर एक-एक जात्ति के सारे धरती पै रेंगण आळे, अर एक-एक जात्ति के सारे उड़ण आळे पंछी, जहाज म्ह गए। सारी ढाळ के प्राणी जिस म्ह जीवन का साँस था वे सारी जात्तां म्ह तै दो-दो नूह कै धोरै जहाज म्ह गए। अर जो गए, वो परमेसवर के हुकम कै मुताबिक सारी जात्ति के प्राणियाँ म्ह तै नर अर मादा गए। फेर यहोवा नै जहाज का दरबाजा बन्द कर दिया।
चाळीस दिन तक धरती पै जल-प्रलय होन्दा रह्या; अर पाणी घणाए बढ़दा गया, जिसतै जहाज धरती पै तै उप्पर उठण लाग्या, अर वो धरती पै तै ऊँच्चा उठ ग्या। पाणी बढ़दे-बढ़दे धरती पै भोत-ए बढ़ ग्या, अर जहाज पाणी के उप्पर-उप्पर तिरदा रह्या। बाढ़ का पाणी धरती पै भोत घणा बढ़ ग्या, इतणा बढ़ ग्या के सारी धरती पै जितने बड़े-बड़े पहाड़ थे, सारे डूबगे। बाढ़ का पाणी तो पहाड़ां तै पन्द्रह हाथ1 उप्पर बढ़ ग्या, अर पहाड़ भी डूब गए। अर के पंछी, के घरेलू पशु, के जंगळी-जानवर, अर धरती पै सारे चाल्लण आळे प्राणी, अर जितने जीव-जन्तु धरती पै भोत घणे भरगे थे, वे सारे, अर सारे माणस मरगे। धरती पै रहण आळे हरेक जिन म्ह तै जितन्या के नाकां म्ह जीवन की साँस थी, सारे मर मिटे। धरती पै रहण आळे हरेक जिन्दा प्राणी, इन्सान, जानवर, रेंगण आळे जन्तु, अर अकास के पंछी, धरती पै तै मिटगे; सिर्फ नूह, अर जितने उसकै गैल जहाज म्ह थे, वेए बचगे। अर बाढ़ का पाणी धरती पै एक सौ पचास दिन तक रह्या।
Source notes (1)
- Footnote पन्द्रह हाथ 7 मीटर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.