Haryanvi Bible
उत्पत्ति 39
पोतीपर कै घर यूसुफ
जिब यूसुफ मिस्र देश म्ह पोहचाया गया, तो पोतीपर नाम के एक मिस्री नै, जो फिरौन का हाकिम, अर अंगरक्षकां का प्रधान था, उस ताहीं इश्माएलियाँ कै हाथ तै जो उसनै ओड़ै लेगे थे, मोल लिया। यूसुफ अपणे मिस्री माल्लिक कै घर म्ह रहवै था, अर यहोवा उसकै गैल था; ज्यांतै वो भाग्यवान माणस होग्या। अर यूसुफ कै माल्लिक नै देख्या, के यहोवा उसकै गैल रहवै सै, अर जो काम वो करै सै, उस ताहीं यहोवा उसकै हाथ तै सफल करदे सै। फेर उसकी अनुग्रह की निगांह यूसुफ पै होई, अर वो उसकी सेवा-पाणी करण कै खात्तर ठहराया गया; फेर उसनै उस ताहीं अपणे घर का अधिकारी बणाकै अपणा सारा किमे उसके हाथ म्ह सौंप दिया। जिब तै ए उसनै यूसुफ ताहीं अपणे घर का अर अपणी सारी सम्पत्ति का हकदार बणा दिया, जिब तै यहोवा यूसुफ कै कारण उस मिस्री कै घर पै आशीष देण लाग्या; अर के घर म्ह, के मैदान म्ह, उसका जो कुछ था, सारया पै यहोवा की आशीष होण लाग्गी। इस करकै उसनै अपणा सारा कुछ यूसुफ कै हाथ्थां म्ह सौंप दिया, उरै ताहीं के अपणे खाण की रोट्टी ताहीं छोड़, वो अपणी सम्पत्ति का हाल कुछ न्ही जाणै था।
यूसुफ सुन्दर अर रुपवान था। इन बात्तां कै बाद इसा होया, के उसकै माल्लिक की घरआळी नै यूसुफ पै आँख लगाई, अर कह्या, “मेरे गेल्या सो।” पर उसनै मना करदे होए अपणे माल्लिक की घरआळी तै कह्या, “सुण, जो कुछ इस घर म्ह सै मेरै हाथ म्ह सै; उस ताहीं मेरा माल्लिक कुछ न्ही जाणदा, अर उसनै अपणा सारा किमे मेरै हाथ म्ह सौप दिया सै। इस घर म्ह मेरै तै बड्ड़ा कोए कोनी; अर उसनै तेरे ताहीं छोड़, जो उसकी घरआळी सै; मेरै तै कुछ न्ही छुपाकै राख्या; ज्यांतै भला, मै इतणा बड़ा पाप करकै परमेसवर का कसूरवार क्यूँ बणु?” अर इसा होया के वा रोज यूसुफ तै बात करदी रही, पर यूसुफ नै उसकी न्ही मान्नी के उसकै धोरै सोवै या उसकै गैल रहवै। एक दिन के होया के यूसुफ अपणा काम-काज करण कै खात्तर घर म्ह गया, अर घर के नौकरां म्ह तै कोए भी घर म्ह न्ही था। तो उस जनान्नी नै उसका कपड़ा पकड़कै कह्या, “मेरे गेल्या सो,” पर वो अपणा कपड़ा उसकै हाथ म्ह छोड़कै भाजकै बाहर लिकड़ ग्या। न्यू देखकै के वो अपणा कपड़ा मेरै हाथ म्ह छोड़कै बाहर भाज ग्या, तो उस जनान्नी नै अपणे घर के नौकरां ताहीं बुलाकै कह्या, “देक्खो, वो एक इब्री माणस नै म्हारी बेजती करण कै खात्तर म्हारे धोरै ले आया सै। वो तो मेरै गेल्या सोण के मतलब तै मेरै धोरै भित्तर आया था अर मै जोरकै चिल्ला उठी। अर मेरा जोर-जोरकै चिल्लाणा सुणकै वो अपणा कपड़ा मेरै धोरै छोड़कै बाहर लिकड़कै भाज ग्या।” अर वा उसका कपड़ा उसकै माल्लिक कै घर आण तक अपणे धोरै धरे रही। फेर1 उसनै उस ताहीं इस तरियां की बात कही, “वो इब्री नौक्कर जिस ताहीं तू म्हारै धोरै लेकै आया सै, वो मेरै धोरै गलत नियत तै आया था; अर जिब मै जोर तै चिल्ला उठी, तो वो अपणा कपड़ा मेरै धोरै छोड़कै बाहर भाज ग्या।” अपणी पत्नी की ये बात सुणकै के तेरे नौक्कर नै मेरै गैल इसा-इसा काम करया सै, तो यूसुफ कै माल्लिक का प्रकोप भड़क्या।
यूसुफ का जेळ म्ह गेर दिया जाणा
अर यूसुफ कै माल्लिक नै उस ताहीं पकड़कै जेळ म्ह, जड़ै राजा के कैदी बन्द थे, गिरवा दिया; आखर वो उस जेळ म्ह रहया। पर यहोवा यूसुफ कै संग-संग रहया, अर उसपै करुणा करी, अर जेळ के दरोग्गा कै अनुग्रह की निगांह उसपै होई। इस करकै जेळ के दरोग्गै नै उन सारे कैदियाँ ताहीं, जो जेळ म्ह थे, यूसुफ कै हाथ म्ह सौंप दिया; अर जो-जो काम वे ओड़ै करै थे, वो उस्से के हुकम तै होवै था। यूसुफ कै बस म्ह जो कुछ था उस म्ह तै जेळ के दरोग्गा ताहीं कोए भी चीज देखणी न्ही पड़ै थी; क्यूँके यहोवा यूसुफ कै गेल्या था; अर जो किमे वो करै था, यहोवा उस ताहीं उस म्ह सफलता देवै था।
Source notes (1)
- Footnote फेर जिब उसका पति आया
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.