Haryanvi Bible
उत्पत्ति 37
यूसुफ अर उसके भाई
इसहाक के मरण के बाद याकूब तो कनान देश म्ह रहण लाग्या, जड़ै उसका बाप परदेशी होकै रहया था। अर याकूब के वंश का वृत्तान्त यो सै: यूसुफ सत्तरा साल का था अर वो अपणे भाईयाँ कै गैल भेड़-बकरी चराया करदा; वो छोरा अपणे पिता की घरआळी बिल्हा, अर जिल्पा के बेट्याँ कै गैल रह्या करदा; अर उनके बुरे काम्मां की खबर अपणे पिता कै धोरै पोहचाया करै था। अर इस्राएल अपणे सारे बेट्याँ तै बढ़कै यूसुफ तै प्यार करया करदा, क्यूँके वो उसकै बुढ़ापे का बेट्टा था अर उसनै उसकै खात्तर रंग-बिरंगा अंगरखा बणवाया। पर जिब उसके भाईयाँ नै देख्या, के म्हारा पिता हम सारे भाईयाँ तै घणा उस्से तै प्यार करै सै, तो वे उसतै बैर राक्खण लाग्गे अर उसकै गेल्या ठीक तै बात भी न्ही करया करदे।
यूसुफ का सपना
यूसुफ नै एक सपना देख्या, अर अपणे भाईयाँ तै उसका जिक्र करया; फेर वे उसतै और भी घणा बैर करण लाग्गे। उसनै उनतै कह्या, “जो सपना मन्नै देख्या सै, उस ताहीं सुणो आपां सारे खेत म्ह पूळें बांधण लागरे सां, अर मै के देक्खूँ सूं के मेरा पूळा उठकै सीध्धा खड्या होग्या; फेर थारे पूळयाँ नै मेरै पूळे ताहीं च्यांरु ओड़ तै घेर लिया अर उस ताहीं दण्डवत करया।” फेर उसके भाईयाँ नै उसतै कह्या, “के साच्चए तू म्हारै उप्पर राज करैगा? तो के तू साच्चए म्हारै पै राज करैगा?” ज्यांतै वे उसकै सपने अर उसकी बात्तां कै कारण उसतै और भी घणा बैर करण लाग्गे। फेर उसनै एक और सपना देख्या, अर अपणे भाईयाँ तै उसकै बारै म्ह भी बताया, “सुणो, मन्नै एक और सपना देख्या सै, के सूरज, चाँद, अर ग्यारह तारे मन्नै दण्डवत करण लागरे सैं।” यो सपना उसनै अपणे पिता, अर भाईयाँ तै बताया; फेर उसकै पिता नै उसतै धमकाकै कह्या, “यो किसा सपना सै जो तन्नै देख्या सै? के साच्चए मै अर तेरी माँ अर तेरे भाई तेरे आग्गै धरती पै पड़कै दण्डवत करागें?” उसके भाई तो उसतै जळण तै भरे थे; पर उसकै पिता नै उसकी सारी बात्तां ताहीं याद राख्या।
उसके भाई अपणे पिता की भेड़-बकरी चराण खात्तर शेकेम नगर म्ह गए। फेर इस्राएल नै यूसुफ तै कह्या, “तेरे भाई तो शेकेम म्ह ए भेड़-बकरी चराण लागरे होवैगें, इस करकै जा, मै तन्नै उनकै धोरै भेज्जू सूं।” यूसुफ नै उसतै कह्या, “जो हुकम! मै जाण खात्तर तैयार सूं।” इस्राएल नै उसतै कह्या, “जा, अपणे भाईयाँ नै अर भेड़-बकरियाँ नै देख के आ के वे सही-सलामत सैं के न्ही, अर उनकी खबर मेरै धोरै ल्या।” आखर उसनै उस ताहीं हेब्रोन की तराई म्ह भेज दिया, अर वो शेकेम म्ह आ ग्या। अर किसे माणस नै उस ताहीं मदानां म्ह इधर-उधर भटकदे होए देखकै उसतै पूच्छया, “तू किसनै टोह्वैं सै?” यूसुफ नै कह्या, “मै अपणे भाईयाँ नै टोहऊँ सूं मेहरबान्नी करकै मन्नै बता के वे भेड़-बकरियाँ नै कित्त चराण लागरे सैं?” उस माणस नै कह्या, “वे तो उरै तै चले गये सैं; अर मन्नै उन ताहीं न्यू कहन्दे सुण्या था, ‘आओ, हम दोतान नगर म्ह चाल्लां।’” न्यू सुणकै यूसुफ ओड़ै तै चाल पड़या, अर अपणे भाईयाँ ताहीं उसनै दोतान नगर म्ह पाया।
यूसुफ ताहीं गुलाम्मी खात्तर बेच्या जाणा
जिब उसके भाईयाँ नै उस ताहीं दूर तै आन्दे देख्या, तो उसकै धोरै आण तै पैहल्याए उननै उस ताहीं मारण की साजस रची। अर वे आप्पस म्ह कहण लाग्गे, “देक्खो, वो सपना देखण आळा आण लागरया सै। इस करकै आओ, हम उसनै मारकै किसे गड्ढे म्ह गेर द्या, अर अपणे पिता तै न्यू कह द्याँगे, के कोए जंगळी-पशु उस ताहीं खाग्या। फेर हम देक्खांगे के उसके सपने किस तरियां पूरे होवैंगे।” न्यू सुणकै रूबेन नै उस ताहीं उनकै हाथ्थां तै बचाण की इच्छा तै कह्या, “उसनै जान तै तो ना मारो।” पर रूबेन नै उनतै कह्या, “लहू ना बहाओ, उसनै जंगळ-बियाबान के किसे गड्ढे म्ह गेर द्यो, अर उसपै हाथ ना उठाओ।” वो यूसुफ नै उनके हाथ्थां तै बचाकै अपणे पिता कै धोरै पोहचाणा चाहवै था। इस करकै इसा होया के जिब यूसुफ अपणे भाईयाँ कै धोरै आ ग्या, तो उननै उसका रंग-बिरंगा अंगरखा, जिस ताहीं वो पहरे होए था, उतार लिया। अर यूसुफ ताहीं ठाकै गड्ढे म्ह गेर दिया। वो गड्डा सूखरया था, अर उस म्ह पाणी कोनी था।
फेर वे रोट्टी खाण बैठगे; अर निगांह ठाकै यो देख्या के इश्माएलियाँ का एक टोळ ऊँटां पै सुगन्ध-द्रव्य, बलसान, अर गन्धरस लादे होए, गिलाद तै मिस्र देश म्ह जाण लागरया सै। फेर यहूदा नै अपणे भाईयाँ तै कह्या, “अपणे भाई नै मारकै उसकी हत्या का जुर्म छुपाण तै के फायदा होवैगा? आओ, हम उसनै इश्माएली माणसां तै बेच द्या, अर अपणा हाथ उसपै ना ठावां, क्यूँके वो म्हारा भाई अर म्हारी ए हाड्डी अर माँस सै।” अर उसके भाईयाँ नै उसकी बात मान ली। उस बखत मिद्यानी व्यापारी ओड़ै तै होकै उनकै धोरै तै गुजरे। इस करकै यूसुफ के भाईयाँ नै उस ताहीं उस गड्ढे म्ह तै खींचकै बाहर लिकाड्या, अर इश्माएली व्यापारी माणसां ताहीं चाँदी के बीस टुकड्या1 म्ह बेच दिया; अर वे यूसुफ नै मिस्र देश म्ह लेगे। रूबेन नै बोहड़कै देख्या के यूसुफ गड्ढे म्ह कोनी, ज्यांतै उसनै अपणे लत्ते पाड़े, अर अपणे भाईयाँ कै धोरै जाकै कहण लाग्या, “छोरा तो कोनी; इब मै कड़ै जाऊँ?” फेर उननै यूसुफ का अंगरखा लिया, अर एक बकरा मारकै उसकै लहू म्ह उस ताहीं डुबा दिया। अर उननै उस रंग-बिरंगे अंगरखे ताहीं अपणे पिता कै धोरै भेजकै यो सन्देसा दिया; “यो हमनै मिल्या सै, इसनै देखकै पिच्छाण ले के यो तेरे बेट्टे का अंगरखा सै के न्ही।” उसनै उस ताहीं पिच्छाण लिया, अर कह्या, “हाँ यो मेरै ए बेट्टे का अंगरखा सै; किसे दुष्ट पशु नै उस ताहीं खा लिया; जरुर यूसुफ के टुकड़े-टुकड़े कर दिये होंगे।” फेर याकूब नै अपणे लत्ते पाड़े अर कमर म्ह टाट लपेट्या, अर अपणे बेट्टे कै खात्तर घणे दिनां तक बिलाप करदा रहया। अर उसके सारे बेट्टे-बेटियाँ नै उस ताहीं तसल्ली देण की कोशिश करी; पर उसनै तसल्ली न्ही मिली; अर वो योए कहन्दा रहया, “मै बिलाप करदा होया अपणे बेट्टे कै धोरै अधोलोक म्ह चल्या जाऊँगा।” इस तरियां उसका पिता यूसुफ खात्तर रोन्दा ए रहया। उन्हे मिद्यानियाँ नै यूसुफ ताहीं मिस्र देश म्ह ले जाकै पोतीपर नाम के, फिरौन कै एक हाकिम, अर अंगरक्षकां कै प्रधान, कै हाथ बेच दिया।
Source notes (1)
- Footnote चाँदी के बीस टुकड्या एक गुलाम की कीमत 220 ग्राम चाँदी थी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.