एज्रा 3

वेदी का बणाया जाणा

1बेबीलोन तै बोहड़ण कै बाद जिब सातवाँ महिन्‍ना आया, अर इस्राएली अपणे-अपणे नगर म्ह बसगे, तो माणस यरुशलेम म्ह एक मन होकै कठ्ठे होए1। 2फेर योसादाक के बेट्टे येशुअ नै अपणे भाई याजकां समेत अर शालतीएल के बेट्टे जरुब्बाबेल नै अपणे भाईयाँ समेत कमर बाँधकै इस्राएल के परमेसवर की वेदी ताहीं बणाया के उसपै होमबलि चढ़ावै, ज्यांतै के परमेसवर के भगत मूसा की व्यवस्था म्ह लिख्या2 सै। 3फेर उननै जो बोहड़े थे वेदी ताहीं उसकी जगहां पै खड़या करया क्यूँके उननै उस और के देशां के माणसां3 का डर रह्या, अर वे उसपै यहोवा कै खात्तर होमबलि यानिके रोज सबेरै अर शाम के होमबलि चढ़ाण लाग्गे। 4उननै झोपड़ियां के त्यौहार ताहीं मान्या, जिसा मूसा के नियम-कायदा म्ह लिख्या सै, हर रोज के होमबलि एक-एक दिन की गिणती अर नियम कै मुताबिक चढ़ावै। 5उसकै बाद सदा होमबलि अर नये चाँद4 अर यहोवा के पवित्र करे होए सारे नियत त्यौहारां के बलि अर अपणी-अपणी इच्छा तै यहोवा कै खात्तर सारे स्वेच्छाबलि हर एक कै खात्तर बलि चढ़ावै5। 6सातवें महिन्‍ने के पैहले दिन तै वे यहोवा नै होमबलि चढ़ाण लाग्गे। पर यहोवा के भवन की नींव तब ताहीं ना गेरी गई थी। 7फेर उननै पत्थर गढ़ण आळे माणसां अर कारीगरां तै रुपया, अर सीदोनी अर सोरी नगर के माणसां नै खाण-पीण की चीज अर तेल दिया, के वे फारस के राजा कुस्रू के पत्र कै मुताबिक देवदार की लाकड़ी लबानोन तै याफा कै धोरै के समुन्दर म्ह पोहचावै। 8दुसरे साल के दुसरे महिन्‍ने म्ह परमेसवर के भवन म्ह, जो यरुशलेम म्ह सै, आण के दुसरे साल के दुसरे महिन्‍ने म्ह, शालतीएल के बेट्टे जरुब्बाबेल नै अर योसादाक के बेट्टे येशुअ नै अर उनके और भाईयाँ नै जो याजक अर लेवीय थे, अर जितने गुलाम्मी तै यरुशलेम म्ह आए थे उननै भी काम शरु करया, अर बीस साल या उसतै घणी उम्र के लेवियाँ नै यहोवा के भवन का काम चलाण खात्तर ठहराया6। 9तो येशुअ अर उसके बेट्टे अर भाई, अर कदमीएल अर उसके बेट्टे, जो यहूदा की औलाद थे, अर हेनादाद की औलाद अर उनके बेट्टे परमेसवर के भवन म्ह कारीगरां का काम चलाण नै खड़े होए।

10जिब राजमिस्त्रियाँ नै यहोवा के भवन की नींव डाली, फेर अपणे कपड़े पैहरे होए, अर तुरहियाँ लिये होए याजक, अर झाँझ लिये होए आसाप के वंश के लेवीय ज्यांतै नियुक्त करे गए के इस्राएलियाँ के राजा दाऊद की चलाई होई रीति कै मुताबिक यहोवा की स्तुति करैं। 11इस करकै वे यो गा-गाकै यहोवा की स्तुति अर धन्यवाद करण लाग्गे, “वो भला सै, अर उसकी करुणा इस्राएल पै सदा बणी सै।” अर जिब वे यहोवा की स्तुति करण लाग्गे फेर सारे माणसां नै यो जाणकै के यहोवा के भवन की नींव इब पड़ रही सै, ऊँच्‍चे शब्द तै जयजयकार करी7। 12पर घणे तो याजक अर लेवीय अर पूर्वजां के घरान्‍ने के खास आदमी, यानिके वे बूढ़े जिननै पैहला भवन देख्या था, जिब इस भवन की नींव उनकी आँखां कै स्याम्ही पड़ी फेर वो फूट-फूटकै रोण लाग्गे, अर घणे तो आनन्द के मारे ऊँच्‍चे शब्द तै जयजयकार करण लागरे थे। 13ज्यांतै माणस, आनन्द के जयजयकार का शब्द, माणसां के रोण के शब्द तै न्यारा पिछाण ना सके, क्यूँके माणस ऊँच्‍चे शब्द तै जयजयकार कर रहे थे, अर वो शब्द दूर ताहीं सुणाई देवै था।