Haryanvi Bible
यहेजकेल 40
यहेजकेल का यरुशलेम पोहचाया जाणा
म्हारी गुलाम्मी के पच्चीसवें साल यानिके यरुशलेम नगर ले लिए जाणकै बाद चौदहवें साल के पैहले महिन्ने के दसवें दिन नै, यहोवा की शक्ति मेरे पै आई, अर उसनै मेरे ताहीं ओड़ै पोहचाया। अपणे दर्शनां म्ह परमेसवर नै मेरे ताहीं इस्राएल के देश म्ह पोहचाया अर ओड़ै एक घणे ऊँच्चे पहाड़ पै खड़या करया, जिसपै दक्षिण ओड़ मान्नो किसे नगर का आकार था। जिब वो मेरे ताहीं ओड़ै लेग्या, तो मन्नै के देख्या के पीतळ का रूप धरे होए अर हाथ म्ह सण का फीत्ता अर मापण के बाँस लिए होए एक माणस फाटक म्ह खड़या सै। उस माणस नै मेरे ताहीं कह्या, “हे माणस की सन्तान, अपणी आँख्यां तै देख, अर अपणे कान्नां तै सुण; अर जो कुछ मै तन्नै दिखाऊँगा उस सारे पै ध्यान दे, क्यूँके तू इस करकै उरै पोहचाया गया सै के मै तेरे ताहीं ये बात दिखाऊँ; अर जो कुछ तू देक्खै वो इस्राएल के घरान्ने नै बतावै।”
मन्दर का पूर्वी प्रवेश-द्वार
अर देक्खो, भवन के बाहर च्यांरु ओड़ एक दीवार थी, अर उस माणस के हाथ म्ह मापण का बाँस था, जिसकी लम्बाई इसे छः हाथ की थी जो साधारण हाथां तै च्यार आंगळ भर ज्यादा सै; अंत म्ह उसनै दीवार की मोटाई मापकै बाँस भर की पाई, फेर उसकी ऊँचाई भी मापकै बाँस भर की पाई। फेर वो उस फाटक कै धोरै आया जिसका मुँह पूर्व की ओड़ था, अर उसकी सीढ़ी पै चढ़कै फाटक की दोन्नु देहळियाँ की चौड़ाई मापकै एक-एक बाँस भर की पाई। पहरे आळी कोठड़ियाँ बाँस भर लाम्बी अर बाँस भर चौड़ी थी; अर दो-दो कोठड़ियाँ का अन्तर पाँच हाथ का था; अर फाटक की देहळी जो फाटक के ओसारे कै धोरै भवन की ओड़ थी, वो भी बाँस भर की थी। फेर उसनै फाटक का वो ओसारा जो भवन कै स्याम्ही था, मापकै बाँस भर का पाया। उसनै फाटक का ओसारा मापकै आठ हाथ का पाया, अर उसके खम्भे दो-दो हाथ के पाए, अर फाटक का ओसारा भवन कै स्याम्ही था। पूर्वी फाटक के दोन्नु ओड़ तीन-तीन पहरे आळी कोठड़ियाँ थी जो सारे एके माप की थी, अर दोन्नु ओड़ के खम्भे भी एके माप के थे। फेर उसनै फाटक के दरबाजे की चौड़ाई मापकै दस हाथ की पाई; अर फाटक की लम्बाई मापकै तेरह हाथ की पाई। दोन्नु ओड़ की पहरे आळी कोठड़ियाँ कै आगै हाथ भर की जगहां थी अर दोन्नु ओड़ कोठड़ियाँ छः-छः हाथ की थी। फेर उसनै फाटक ताहीं एक ओड़ की पहरे आळी कोठड़ी की छात तै लेकै दुसरी ओड़ की पहरे आळी कोठड़ी की छात ताहीं मापकै पच्चीस हाथ की दूरी पाई, अर दरबाजे आम्ही-स्याम्ही थे। फेर उसनै साठ हाथ के खम्भे नाप्पे, अर आँगण, फाटक के लोवै-धोरै, खम्भयां तक था। फाटक के बाहरी दरबाजे के आगै तै लेकै उसके भीतरी ओसारे कै आगै ताहीं पचास हाथ का अन्तर था। पहरे आळी कोठड़ियाँ म्ह, अर फाटक के भित्तर च्यांरु ओड़ कोठड़ियाँ कै बीच के खम्भे के बीच-बीच म्ह झिलमिलीदार खिड़कियाँ थी, अर खम्भयां के ओसारे म्ह भी उसीए थी; अर फाटक कै भित्तर के च्यांरु ओड़ खिड़की थी; अर हर एक खम्भे पै खजूर के दरखत खुदे होए थे।
बाहरी आँगण
फेर वो मेरै ताहीं बाहरी आँगण म्ह लेग्या; अर उस आँगण कै च्यांरु ओड़ कोठड़ी थी; अर एक फर्श बण्या होया था; जिसपै तीस कोठड़ियाँ बणी थी। यो फर्श यानिके निचला फर्श फाटकां तै लाग्या होया था अर उनकी लम्बाई कै मुताबिक था। फेर उसनै निचले फाटक कै आगै तै लेकै भीतरी आँगण के बाहर के आगै ताहीं मापकै सौ हाथ पाए; वो पूर्व अर उत्तर दोन्नु ओड़ इसाए था।
उत्तरी प्रवेश-द्वार
फेर बाहरी आँगण के उत्तरमुखी फाटक की लम्बाई अर चौड़ाई उसनै नाप्पी। उसके दोन्नु ओड़ तीन-तीन पहरे आळी कोठड़ी थी, अर इसके भी खम्भयां के ओसारे की माप पैहले फाटक के मुताबिक था; इसकी लम्बाई पचास अर चौड़ाई पच्चीस हाथ की थी। इसकी भी खिड़कियाँ अर खम्भयां के ओसारे अर खजूरां की माप पूर्वमुखी फाटक की जिसी थी; अर इसपै चढ़ण नै सात सीढ़ियाँ थी; अर उनकै स्याम्ही इसका ओसारा था। भीतरी आँगण की उत्तर अर पूर्व की ओड़ दुसरे फाटकां के स्याम्ही फाटक थे अर उसनै फाटकां की दूरी मापकै सौ हाथ की पाई।
दक्षिणी प्रवेश-द्वार
फेर वो मेरे ताहीं दक्षिण की ओड़ लेग्या, अर दक्षिण ओड़ एक फाटक था; अर उसनै इसके खम्भे अर खम्भयां का ओसारा मापकै इनका उसाए माप पाया। उन खिड़कियाँ की तरियां इसके अर इसके खम्भयां के ओसारां के च्यांरु ओड़ भी खिड़की थी; इसकी भी लम्बाई पचास अर चौड़ाई पच्चीस हाथ की थी। इस म्ह भी चढ़ण कै खात्तर सात सीढ़ियाँ थी अर उनकै स्याम्ही खम्भयां का ओसारा था; अर उसके दोन्नु ओड़ के खम्भयां पै खजूर के दरखत खुदे होए थे। दक्षिण की ओड़ भी भीतरी आँगण का एक फाटक था, अर उसनै दक्षिण ओड़ के दोन्नु फाटकां की दूरी मापकै सौ हाथ की पाई।
भीतरी आँगण: दक्षिणी प्रवेश-द्वार
फेर वो दक्षिणी फाटक तै होकै मेरै ताहीं भीतरी आँगण म्ह लेग्या, अर उसनै दक्षिणी फाटक ताहीं मापकै उसाए पाया। यानिके इसकी भी पहरे आळी कोठड़ी, अर खम्भे, अर खम्भयां का ओसारा, सारे उसेए थे; अर इसके अर इसके खम्भयां के ओसारे के भी च्यांरु ओड़ भी खिड़की थी; अर इसकी लम्बाई पचास अर चौड़ाई पच्चीस हाथ की थी। इसके च्यांरु ओड़ के खम्भयां का ओसारा भी पच्चीस हाथ लाम्बा, अर पचास हाथ चौड़ा था। इसके खम्भयां का ओसारा बाहरी आँगण की ओड़ था, अर इसके खम्भयां पै भी खजूर के दरखत खुदे होए थे, अर इसपै चढ़ण नै आठ सीढ़ियाँ थी।
भीतरी आँगण: पूर्वी प्रवेश-द्वार
फेर वो माणस मेरे ताहीं पूर्व की ओड़ भीतरी आँगण म्ह लेग्या, अर उस ओड़ के फाटक ताहीं मापकै उसाए पाया। इसकी भी पहरे आळी कोठड़ी अर खम्भे अर खम्भयां का ओसारा, सारे उसेए थे; अर इसके अर इसके खम्भयां के ओसारे के च्यांरु ओड़ भी खिड़की थी; इसकी लम्बाई पचास अर चौड़ाई पच्चीस हाथ की थी। इसका ओसारा भी बाहरी आँगण की ओड़ था, अर उसके दोन्नु ओड़ के खम्भयां पै खजूर के दरखत खुदे होए थे; अर इसपै भी चढ़ण नै आठ सीढ़ियाँ थी।
भीतरी आँगण: उत्तरी प्रवेश-द्वार
फेर उस माणस नै मेरै ताहीं उत्तरी फाटक कै धोरै ले जाकै उस ताहीं माप्या, अर उसका भी माप उसाए पाया। उसकै भी पहरे आळी कोठड़ियाँ अर खम्भे अर उनका ओसारा था; अर उसके भी च्यांरु ओड़ खिड़की थी; उसकी लम्बाई पचास अर चौड़ाई पच्चीस हाथ की थी। उसके खम्भे बाहरी आँगण की ओड़ थे, अर उनपै भी दोन्नु ओड़ खजूर के दरखत खुदे होए थे; अर उस म्ह चढ़ण नै आठ सीढ़ियाँ थी।
बलिदान त्यार करण की कोठड़ी
फेर फाटकां कै धोरै के खम्भयां कै धोरै दरबाजे समेत कोठड़ी थी, जड़ै होमबलि धोया जावै था। होमबलि, पापबलि, अर दोषबलि के पशुआं के बलि करण कै खात्तर फाटक के ओसारे कै धोरै उसके दोन्नु ओड़ दो-दो मेज थी। फाटक की एक बाहरी ओड़ पै यानिके उत्तरी फाटक के दरबाजे की चढ़ाई पै दो मेज थी; अर उसकी दुसरी बाहरी ओड़ पै भी, जो फाटक के ओसारे कै धोरै थी, दो मेज थी। फाटक के दोन्नु ओड़ च्यार-च्यार मेज थी, सारी मिलाकै आठ मेज थी, जो बलिपशु बलि करण कै खात्तर थी। फेर होमबलि कै खात्तर तराशे होए पत्थर की च्यार मेज थी, जो डेढ़ हाथ लाम्बी, डेढ़ हाथ चौड़ी, अर हाथ भर ऊँच्ची थी; उनपै होमबलि अर मेलबलि के पशुआं नै बलि करण कै हथियार राक्खे जावैं थे। भित्तर च्यांरु ओड़ च्यार आंगळ भर की आंकड़ियाँ लाग्गी थी, अर मेज पै चढ़ावै का माँस धरया होया था।
याजकां की कोठड़ी
भीतरी आँगण के उत्तरी फाटक कै बाहर गाण आळयां की कोठड़ियाँ थी जिनके दरबाजे दक्षिण ओड़ थे; अर पूर्वी फाटक की ओड़ एक कोठड़ी थी, जिसका द्वार उत्तर ओड़ था। उसनै मेरै ताहीं कह्या, “या कोठड़ी, जिसका दरबाजा दक्षिण की ओड़ सै, उन याजकां कै खात्तर सै जो भवन की चौकसी करैं सैं, अर जिस कोठड़ी का दरबाजा उत्तर की ओड़ सै, वो उन याजकां कै खात्तर सै जो वेदी की चौकसी करैं सैं; ये सादोक की सन्तान सैं; अर लेवियाँ म्ह तै यहोवा की सेवा पाणी करण नै सिर्फ येए उसके धोरै जावैं सैं।”
भीतरी आँगण अर मन्दर का भवन
फेर उसनै आँगण ताहीं मापकै उसनै चकोर यानिके सौ हाथ लाम्बा अर सौ हाथ चौड़ा पाया; अर भवन कै स्याम्ही वेदी थी।
फेर वो मेरै ताहीं भवन के ओसारे म्ह लेग्या, अर ओसारे के दोन्नु ओड़ के खम्भयां नै मापकै पाँच-पाँच हाथ का पाया; अर दोन्नु ओड़ फाटक की चौड़ाई तीन-तीन हाथ की थी। ओसारे की लम्बाई बीस हाथ अर चौड़ाई ग्यारहां हाथ की थी; अर उसपै चढ़ण नै सीढ़ियाँ थी; अर दोन्नु ओड़ के खम्भयां कै धोरै लाठें थी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.