Haryanvi Bible
यहेजकेल 29
मिस्र कै बिरुध्द न्याय
दसवें साल1 के दसवें महिन्ने के बारहवें दिन नै यहोवा का यो वचन मेरै धोरै पोहच्या, “हे माणस की सन्तान, अपणा मुँह मिस्र के राजा फिरौन की ओड़ करकै उसके और सारे मिस्र कै खिलाफ भविष्यवाणी कर; न्यू कह, परमेसवर यहोवा न्यू कहवै सै: हे मिस्र के राजा फिरौन, मै तेरै खिलाफ सूं, हे बड़े नगर, तू जो अपणी नदियाँ कै बिचाळै पड़या रहवै सै, जिसनै कह्या सै, ‘मेरी नदी मेरी अपणी सै, अर मन्नै उस ताहीं अपणे खात्तर बणाया सै।’ मै तेरे जबड़याँ म्ह नकेल डालूँगा, अर तेरी नदियाँ की मछलियाँ नै तेरी खाल पै चिपटाऊँगा, अर तेरी खाल म्ह चिपटी होई तेरी नदियाँ की सारी मछलियाँ समेत तेरे ताहीं तेरी नदियाँ म्ह तै लिकाड़ूंगा। फेर मै तेरे ताहीं तेरी नदियाँ की सारी मछलियाँ समेत जंगळ म्ह लिकाड़ देऊँगा, अर तू मैदान म्ह पड़या रहवैगा; किसे भी तरियां तै तेरी सुधि न्ही ली जावैगी। मन्नै तेरे ताहीं जंगळी-पशुआं अर अकास कै पंछियाँ का भोजन कर दिया सै।”
“फेर मिस्र के सारे बासिन्दे जाण लेवैंगे के मै यहोवा सूं। वे तो इस्राएल के घरान्ने कै खात्तर नरकट की टेक ठहरे थे। जिब उननै तेरे पै हाथ का जोर दिया फेर तू टूट ग्या अर उनके कंधे उखड़ ए गये; अर जिब उननै तेरे पै टेक लगाई, फेर तू टूट ग्या, अर उनकी कमर की सारी नस चढ़गी। इस कारण प्रभु यहोवा न्यू कहवै सै: देख, मै तेरे पै तलवार चलवाकै, तेरे माणस अर पशु, सारया नै नाश करुँगा। फेर मिस्र देश उजाड़ ए उजाड़ होवैगा; अर वे जाण लेवैंगे के मै यहोवा सूं।”
“तन्नै कह्या सै, ‘मेरी नदी मेरी अपणी ए सै, अर मन्नै ए उस ताहीं बणाया।’ इस करकै देख, मै तेरे अर तेरी नदियाँ के बिरुध्द सूं, अर मिस्र देश नै मिग्दोल तै लेकै सवेने ताहीं बलके कूश देश की हद ताहीं उजाड़ ए उजाड़ कर दियुँगा। चाळीस साल ताहीं उस म्ह माणस या पशु का पैर ताहीं न्ही पड़ैगा; अर ना उस म्ह कोए बसैगा। चाळीस साल ताहीं मै मिस्र देश नै उजड़े होए देशां कै बीच उजाड़ करे राखूँगा; अर उसके नगर उजड़े होए नगरां कै बीच खण्डहर ए रहवैंगे। मै मिस्रियाँ नै जात-जात म्ह छिन्न-भिन्न कर दियुँगा, अर देश-देश म्ह तित्तर-बितर कर देऊँगा।”
“परमेसवर यहोवा न्यू कहवै सै: चाळीस साल कै बीत्तण पै मै मिस्रियाँ नै उन जात्तां के बीच तै कठ्ठा करुँगा, जिन म्ह वे तित्तर-बितर होए; अर मै मिस्रियाँ नै गुलाम्मी तै छुड़ाकै पत्रोस देश म्ह, जो उनकी जन्म-भूमि सै2, फेर पोहचाऊँगा; अर ओड़ै उनका छोट्टा सा राज्य हो जावैगा। वो सारे राज्याँ म्ह तै छोट्टा होवैगा, अर फेर अपणा सिर और जात्तां कै उप्पर न्ही ठावैगा; क्यूँके मै मिस्रियाँ नै इसा घटाऊँगा के वे गैरजात्तां पै फेर राज न्ही करण पावैंगें। वो फेर इस्राएल के घरान्ने के भरोस्से का कारण ना होवैगा, क्यूँके जिब वे फेर उनकी ओड़ देखण लाग्गै, फेर वे उनके अधर्म नै याद करैंगे। अर फेर वे जाण लेवैंगे के मै परमेसवर यहोवा सूं।”
बाबेल के जरिये मिस्र का लूट्या जाणा
फेर सत्ताइसवें साल के पैहले महिन्ने के पैहले दिन नै यहोवा का यो वचन मेरै धोरै पोहच्या “हे माणस की सन्तान, बाबेल के राजा नबूकदनेस्सर नै सोर के घेरण म्ह अपणी सेना तै बड़ी मेहनत कराई; हर एक का सिर गंजा होग्या, अर हर एक के कंधे का चमड़ा छिल ग्या; फेर भी उस ताहीं सोर तै ना तो इस बड़ी मेहनत की मजदूरी किमे मिली अर ना उसकी सेना नै। इस कारण परमेसवर यहोवा न्यू कहवै सै: देख, मै बाबेल के राजा नबूकदनेस्सर नै मिस्र देश देऊँगा; अर वो उसकी भीड़ नै ले जावैगा, अर उसकी जायदाद नै लूट कै अपणा कर लेवैगा; अंत म्ह योए मजदूरी उसकी सेना नै मिलैगी। मन्नै उसकी मेहनत के बदले म्ह उस ताहीं मिस्र देश इस कारण दिया सै के उन माणसां नै मेरे खात्तर काम करया था, परमेसवर यहोवा की याए वाणी सै।”
“उसे बखत मै इस्राएल के घरान्ने का एक सींग उगाऊँगा, अर उनके बीच तेरा मुँह खोल्लूँगा। अर वे जाण लेवैंगे के मै यहोवा सूं।”
Source notes (2)
- Footnote दसवें साल यरुशलेम इस बखत घेराव म्ह था, उसका पतन न्ही होया था। यिर्मयाह नै मिस्र कै खात्तर भविष्यवाणी करी थी।
- Footnote जो उनकी जन्म-भूमि सै बोहड़ण आळे माणसां का घर
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.