Haryanvi Bible
यहेजकेल 10
परमेसवर की महिमा का मन्दर तै लिकड़ जाणा
इसके बाद मन्नै देख्या के करूबां के सिरां कै उप्पर जो अकासमण्डल सै, उस म्ह नीलमणि का सिंहासन जिसा कुछ दिखाई देवै सै। फेर यहोवा नै उस सण के कपड़े पैहरे होए माणस तै कह्या, “घूम्मण आळे पहियाँ कै बीच करूबां कै नीच्चै जा अर अपणी दोन्नु मुट्ठियाँ नै करूबां कै बीच के अंगारयाँ तै भरकै यरुशलेम नगर पै बिखेर दे।” अंत म्ह वो मेरे देखदे-देखदे पहियाँ के बीच म्ह गया।
जिब वो माणस भित्तर गया, जिब वे करूब भवन के दक्षिण की ओड़ खड़े थे; अर बादळ भित्तर आळे आँगण म्ह भरया होया था। फेर यहोवा का तेज करूबां कै उप्पर तै उठकै भवन की देहळीया पै आ ग्या; अर बादळ भवन म्ह भरग्या; अर वो आँगण यहोवा के तेज की रोशनी तै भरग्या। करूबां के पंखां का शब्द मंदर के बाहरी आँगण ताहीं सुणाई देवै था, वो सर्वशक्तिमान परमेसवर के बोलण का जिसा शब्द था।
जिब उसनै सण के कपड़े पैहरे होए माणस ताहीं घूम्मण आळे पहियाँ के भित्तर करूबां कै बीच म्ह तै आग लेण का हुकम दिया, फेर वो उनके बीच म्ह जाकै एक पहिये कै धोरै खड़या होया। फेर करूबां कै बीच म्ह तै एक करूब नै अपणा हाथ बढ़ाकै, उस आग म्ह तै जो करूबां कै बीच म्ह थी, कुछ ठाकै सण के कपड़े पैहरे होए माणस की मुट्ठी म्ह दे दी; अर वो उसनै लेकै बाहर चल्या गया। करूबां के पंखां कै नीच्चै तो माणस का हाथ जिसा कुछ दिखाई देवै था।
फेर मन्नै देख्या, के करूबां कै धोरै च्यार पहिये सैं; यानिके एक-एक करूब कै धोरै एक-एक पहिया सै, अर पहियाँ का रूप फीरोजा का जिसा सै। उनका इसा रूप सै, के च्यांरु एक जिसे दिखाई देवै सैं, जिस तरियां एक पहिये कै बिचाळै दूसरा पहिया हो। चाल्लण कै बखत वे अपणी च्यांरु दिशा के बळ तै चाल्लै सैं; अर चाल्दे बखत मुड़दे न्ही, बलके जित्त उनका सिर रहवै सै वे उधर ए उसके पाच्छै चाल्लै सैं अर चाल्दे बखत वे मुड़दे न्ही। अर पीठ हाथ अर पंखां समेत करूबां का सारा शरीर अर जो चार पहिये उनके सैं, वे भी सारे के सारे च्यांरु ओड़ आँख्यां तै भरे होए सैं। मेरे सुणदे होए इन पहियाँ ताहीं चक्कर कह्या गया, यानिके घूम्मण आळे पहिये। एक-एक के च्यार-च्यार मुँह थे; एक मुँह तो करूब का जिसा, दूसरा माणस का जिसा, तीसरा शेर का जिसा, अर चौथा उकाब पंछी का जिसा।
करूब धरती पै तै उठगे। ये वेए जीवधारी सैं, जो मन्नै कबार नदी कै धोरै देक्खे थे। जिब-जिब वे करूब चाल्लै थे तब-तब वे पहिये उनके धोरै-धोरै चाल्लै थे; अर जिब-जिब करूब धरती पै तै उठण कै खात्तर अपणे पंख ठान्दे तब-तब पहिये उनके धोरै तै न्ही मुड़ै थे। जिब करूब खड़े होन्दे फेर ये भी खड़े होवैं थे; अर जिब वे पहिये उठै फेर ये भी उनकै गैल उठै थे; क्यूँके जीवधारियां की आत्मा इन म्ह भी रहवै थी।
यहोवा का तेज भवन की देहळीया पै तै उठकै करूबां कै उप्पर ठहर ग्या। फेर करूब अपणे पंख ठाकै मेरे देखदे-देखदे धरती पै तै उठकै लिकड़गे; अर पहिये भी उनकै गैल-गैल गये1, अर वे सारे यहोवा के भवन के पूर्वी फाटक म्ह खड़े होगे; अर इस्राएल के परमेसवर का तेज उनके उप्पर ठहरया रहया।
ये वेए जीवधारी सैं जो मन्नै कबार नदी कै धोरै इस्राएल के परमेसवर कै नीच्चै देक्खे थे; अर मन्नै जाण लिया के वे भी करूब सैं। हर एक के च्यार मुँह अर च्यार पंख अर पंखां कै तळै माणस के जिसे हाथ भी थे। उनके मुखां का रूप वोए सै जो मन्नै कबार नदी के किनारे पै देख्या था। अर उनके मुँह ए के बलके उनकी सारी देह भी उसीए थी। वे सीध्धे अपणे-अपणे स्याम्ही ए चाल्लै थे।
Source notes (1)
- Footnote उनकै गैल-गैल गये करूब अर पहिये एके जिन्दा प्राणी थे
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.