Haryanvi Bible
निर्गमन 9
पाँचवीं विपत्ति - पशुआं की मौत
फेर यहोवा नै मूसा तै कह्या, “फिरौन कै धोरै जाकै कह, ‘इब्रियाँ का परमेसवर यहोवा तेरै तै इस तरियां कहवै सै, के मेरी प्रजा के माणसां नै जाण दे, ताके वो मेरी उपासना करै। अर जै तू उन ताहीं जाण ना देवै अर इब भी पकड़े रहवै, तो सुण, तेरे जो घोड़े, गधे, ऊँट, गां-बळध, भेड़-बकरी अर सारे पशुआं के झुण्ड जो मदानां म्ह सैं, उनकै बिरुध्द यहोवा का हाथ इसा पड़ैगा के घणी भारी महामारी होवैगी। पर यहोवा इस्राएलियाँ कै डांगरां म्ह अर मिस्रियाँ कै डांगरां म्ह इसा अन्तर करैगा के जो इस्राएलियाँ के सैं उन म्ह तै कोए भी न्ही मरैगा।’” फेर यहोवा नै एक बखत ठहराकै कह्या, “मै कल इस देश म्ह भोत बड़ी महामारी ल्याऊँगा।” दुसरे दिन यहोवा नै इसाए करया; अर मिस्र देश के तो सारे पशु मरगे, पर इस्राएलियाँ का एक भी पशु न्ही मरया। अर फिरौन नै माणसां ताहीं भेज्या, अर पता लगाया के इस्राएलियाँ के डांगरां म्ह तै एक भी न्ही मरया था। फेर भी फिरौन का मन कठोर होग्या, अर उसनै उन माणसां ताहीं जाण न्ही दिया।
छटी विपत्ति - फोल्ले अर फोड़यां का लिकड़णा
फेर यहोवा नै मूसा अर हारुन तै कह्या, “थम दोन्नु भट्ठी म्ह तै एक-एक मुट्ठी राख ले ल्यो, अर मूसा उसनै फिरौन कै स्याम्ही अकास की ओड़ उड़ा दे। फेर वा धूळ होकै सारे मिस्र देश म्ह माणसां अर डांगरां पै फोल्ले अर फोड़े बण ज्यागी।” इस करकै वे भट्ठी की राख लेकै फिरौन कै स्याम्ही खड़े होए, अर मूसा नै उस ताहीं अकास की ओड़ उड़ा दिया, अर वा माणसां अर डांगरां पै फोल्ले अर फोड़े बणगी। उन फोड़यां कै कारण जादूगर मूसा कै स्याम्ही खड़े न्ही रह सके, क्यूँके वे फोड़े जिस तरियां सारे मिस्रियाँ कै उस्से तरियां जादूगरां कै भी लिकड़े थे। फेर यहोवा नै फिरौन कै मन ताहीं कठोर कर दिया, अर जिसा यहोवा नै मूसा तै कह्या था, उसनै उसकी ना सुणी।
सातवीं विपत्ति ओळयां की बारिस
फेर यहोवा नै मूसा तै कह्या, “सबेरै उठकै फिरौन कै स्याम्ही खड्या हो, अर उसतै कह, ‘इब्रियाँ का परमेसवर यहोवा इस तरियां कहवै सै, के मेरी प्रजा के माणसां नै जाण दे, ताके वे मेरी उपासना करै। न्ही तो इब की बार मन्नै तेरे पै, अर तेरे कर्मचारियाँ अर तेरी प्रजा पै सारी ढाळ की बिप्दा गेरूँगा, जिसतै तू जाण ले के सारी धरती पै मेरै बराबर कोए दूसरा न्ही सै। इब तक मन्नै तो अपणा हाथ बढ़ाकै तन्नै अर तेरी प्रजा ताहीं महामारी तै मार दिया होन्दा, अर तू धरती पै तै सत्यानाश होग्या होन्दा; पर सच म्ह मन्नै इस्से करकै तेरे ताहीं जिन्दा राख्या सै के तन्नै अपणी सामर्थ दिखाऊँ, अर अपणा नाम सारी धरती पै प्रसिद्ध करुँ। के तू इब भी मेरी प्रजा कै स्याम्ही अपणे-आपनै बड़ा समझै सै, अर उननै जाण न्ही देन्दा? सुण, काल मै इस्से बखत इसे भारी-भारी ओळे बरसाऊँगा, के जिनकै बराबर मिस्र देश की नीम पड़ण के दिन तै लेकै इब ताहीं कदे न्ही पड़े। इस करकै इब माणसां नै भेजकै अपणे डांगरां नै अर मदानां म्ह जो कुछ तेरा सै सारया नै फुर्ती तै आड़ म्ह छिप्पा ले; न्ही तो जितने माणस या पशु मदानां म्ह रहवै अर घर म्ह कठ्ठे न्ही करे जावै उनपै ओळे गिरैंगे, अर वे मर ज्यागें।’” इस करकै फिरौन के कर्मचारियाँ म्ह तै जो माणस यहोवा के वचन का भय मान्नै थे उननै तो अपणे-अपणे नौकरां अर डांगरां नै घरां म्ह हाँक लिया। पर जिननै यहोवा के वचन पै मन न्ही लगाया उननै अपणे नौकरां अर डांगरां नै मदानां म्ह रहण दिया।
फेर यहोवा नै मूसा तै कह्या, “अपणा हाथ अकास की ओड़ बढ़ा ताके सारे मिस्र देश कै माणसां, डांगरां अर खेत्तां की सारी पैदावार पै ओळे गिरै।” फेर मूसा नै अपणी लाठ्ठी अकास की ओड़ ठाई; फेर यहोवा की सामर्थ तै बाद्दळ गरजण अर ओळे बरसण लाग्गे, अर आग धरती पै गिरण लाग्गी। इस तरियां यहोवा नै मिस्र देश म्ह ओळे बरसाए। जो ओळे पड़ै थे उनकै गेल्या बिजळी भी चमकै थी, अर वे ओळे इतणै भारी थे के जिब तै मिस्र देश बस्या था जिब तै मिस्र देश म्ह इसे ओळे कदे न्ही पड़े थे। सारे मिस्र के खेत्तां म्ह के माणस अर पशु, जितने थे सारे ओळयां तै मारे गए, अर ओळयां तै खेत की सारी पैदावार खतम होगी, अर मैदान के सारे दरखत्त भी टूटगे। सिर्फ गोशेन परदेस म्ह जड़ै इस्राएली बस्या करदे ओळे न्ही गिरे।
फेर फिरौन नै मूसा अर हारुन ताहीं बुलावा भेज्या अर उनतै कह्या, “इस बार मन्नै पाप करया सै; यहोवा नै सही करया सै, अर मन्नै अर मेरी प्रजा नै गलत करया सै। परमेसवर का गरजणा अर ओळयां का बरसणा तो भोत होग्या; इब यहोवा तै बिनती करो; फेर मै थमनै जाण दियुँगा, आग्गै तै थम मिस्र देश म्ह न्ही रोक्के जाओगे।” मूसा नै उसतै कह्या, “नगर तै जान्दे ए मै यहोवा की ओड़ हाथ फैलाऊँगा, फेर बाद्दळ का गरजणा बन्द हो ज्यागा, अर ओळे फेर न्ही पड़ैगें, इसतै तू जाण लेवैगा के धरती यहोवा की सै। तोभी मै जाणु सूं, के ना तो तू अर ना तेरे कर्मचारी यहोवा परमेसवर का भय मान्नैगें।” सण अर जौ की सारी फसल ओळयां तै खतम होगी, क्यूँके जौं की बाल लिकड़ ली थी अर सण म्ह फूल लाग्गे होए थे। गेहूँ अर कठिया गेहूँ जो बढ़े न्ही थे, इस करकै वे नाश न्ही होए। जिब मूसा नै फिरौन कै धोरै तै नगर कै बाहर लिकड़कै यहोवा की ओड़ हाथ फैलाए, फेर बाद्दळ का गरजणा अर ओळयां का बरसणा बन्द होया, अर फेर भोत मिह धरती पै न्ही पड्या। फिरौन नै यो देखकै के अकास तै मिह अर ओळयां अर बाद्दळ का गरजणा बन्द होग्या फिरौन नै अपणे कर्मचारियाँ समेत फेर अपणे मन नै कठोर करकै पाप करया। इस तरियां फिरौन का मन हठील्ला होन्दा गया, अर उसनै इस्राएलियाँ ताहीं जाण न्ही दिया; जिसा के यहोवा नै मूसा कै जरिये कुहाया था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.