Haryanvi Bible
निर्गमन 8
दुसरी विपत्ति - मिंढ़कां का हमला
फेर यहोवा नै मूसा तै कह्या, “फिरौन कै धोरै जाकै कह, ‘यहोवा तन्नै न्यू कहवै सै, के मेरी प्रजा के माणसां नै जाण दे जिसतै वे मेरी उपासना कर सकै। पर जै तू उननै जाण न्ही देवैगा तो सुण, मै मिंढ़क भेजकै तेरे सारे देश नै नुकसान पोहोचाण आळा सूं। अर नील नदी मिंढ़कां तै भर ज्यागी, अर वे तेरे घरां म्ह, अर तेरे बिछोण्यां पै, अर तेरे कर्मचारियाँ कै घरां म्ह, अर तेरी प्रजा पै, बल्के तेरे तन्दूरां अर कठौतियाँ म्ह भी चढ़ ज्यांगे। वे मिंढ़क तेरे पै, अर तेरी प्रजा, अर तेरे कर्मचारियाँ, सारया पै चढ़ ज्यांगे।’”
फेर यहोवा नै मूसा तै हुकम दिया, “हारुन तै कह दे, के नदियाँ, नहरां, अर झील्लां कै उप्पर लाठ्ठी कै गैल अपणा हाथ बढ़ाकै मिंढ़कां नै मिस्र देश पै चढ़ा ले आवै।” फेर हारुन नै मिस्र देश के पाणी की जगहां कै उप्पर अपणा हाथ बढ़ाया; जिसतै मिस्र देश पूरा मिंढ़कां तै भरग्या। अर जादूगरां नै भी अपणे तंत्र-मंत्रां तै उस्से तरियां मिस्र देश ताहीं मिंढ़कां तै भर दिया।
फेर फिरौन नै मूसा अर हारुन तै बुलवाकै कह्या, “यहोवा तै बिनती करो के वो मिंढ़कां नै मेरै तै अर मेरी प्रजा तै दूर करै; अर मै इस्राएली माणसां नै जाण दियुँगा। जिसतै वे यहोवा कै खात्तर बलिदान चढ़ा सकै।” फेर मूसा नै फिरौन तै कह्या, “इतणी बात कै खात्तर तू मन्नै आदेश दे के इब मै तेरे, अर तेरे कर्मचारियाँ, अर प्रजा कै खात्तर कद बिनती करुँ, के यहोवा तेरे धोरै तै अर तेरे घरां म्ह तै मिंढ़कां नै दूर करै, अर वे सिर्फ नील नदी म्ह पाए जावै?” फेर उसनै कह्या, “कल।” जिब मूसा नै कह्या, “तेरे वचन कै मुताबिक होवैगा, जिसतै तू या जाण जावै के म्हारै परमेसवर यहोवा कै बराबर कोए दूसरा प्रभु न्ही सै। अर मिंढ़क तेरे धोरै तै, अर तेरे घरां म्ह तै, अर तेरे कर्मचारियाँ अर प्रजा कै धोरै तै दूर होकै सिर्फ नील नदी म्ह रहवैंगें।” फेर मूसा अर हारुन फिरौन कै धोरै तै चले गये; अर मूसा नै उन मिंढ़कां के बारै म्ह यहोवा के नाम की दुहाई दी, जो उसनै फिरौन पै भेज्जे थे। अर यहोवा नै मूसा कै कहण कै मुताबिक करया; अर मिंढ़क घरां, आँगणां, अर खेत्तां म्ह मरगे। अर माणसां नै उन सारे मिंढ़कां ताहीं कठ्ठा करकै उनके ढेर लगा दिए, अर सारा देश दुर्गन्ध तै भरग्या। पर जिब फिरौन नै देख्या के इब संकट टळ ग्या सै फेर यहोवा कै कहण कै मुताबिक उसनै फेर अपणे मन ताहीं कठोर करया, अर उनकी न्ही सुणी।
तीसरी विपत्ति कुटकियाँ के झुण्ड
फेर यहोवा नै मूसा तै कह्या, “हारुन नै हुकम दे, ‘तू अपणी लाठ्ठी बढ़ाकै धरती की धूळ पै मार, जिसतै वो धूळ मिस्र देश म्ह कुटकियाँ बण ज्यां।’” अर उननै उस्से तरियां करया; यानिके हारुन नै लाठ्ठी तै हाथ बढ़ाकै धरती की धूळ पै मारया, फेर माणस अर पशु दोनुवां पै कुटकियाँ होगी बल्के सारे मिस्र देश म्ह धरती की धूळ कुटकियाँ बणगी। पर जिब जादूगरां नै चाह्या के अपणे तंत्र-मंत्रां कै बल तै हम भी कुटकियाँ ले आवां, पर या बात उनतै न्ही हो सकी। अर माणसां अर डांगरां दोनुवां पै कुटकियाँ बणी ए रही। फेर जादूगरां नै फिरौन तै कह्या, “यो तो परमेसवर कै हाथ का काम सै।” फेर भी यहोवा कै कहण कै मुताबिक फिरौन का मन कठोर होन्दा गया, अर उसनै मूसा अर हारुन की बात न्ही मान्नी।
चौथी विपत्ति - डांसां के झुण्ड
फेर यहोवा नै मूसा तै कह्या, “सबेरै उठकै फिरौन कै स्याम्ही नदी की ओड़ जान्दे हाणा उसका सामना करकै कहिये, ‘यहोवा तेरे तै न्यू कहवै सै, के मेरी प्रजा के माणसां नै जाण दे, के वे मेरी उपासना कर सकै। जै तू मेरी प्रजा नै न्ही जाण देवैगा तो सुण, मै तेरे पै, अर तेरे कर्मचारियाँ अर तेरी प्रजा पै, अर तेरे घरां म्ह टोळ के टोळ डांस भेज्जूँगा; अर मिस्रियाँ के घर अर उनकै रहण की धरती भी डांसां तै भर ज्यागी। उस दिन मै गोशेन परदेस नै जिस म्ह मेरी प्रजा रहवै सै न्यारा करुँगा, अर उस म्ह डांसां के टोळ न्ही होवैंगें; जिसतै तू जाण ले के धरती कै बीच म्ह मै ए यहोवा सूं। अर मै अपणी प्रजा अर तेरी प्रजा म्ह अन्तर ठहराऊँगा। यो चमत्कार कल होवैगा।’” अर यहोवा नै उस्से तरियां करया, जिसा मूसा तै कह्या था, फिरौन कै भवन, अर उसकै कर्मचारियाँ कै घरां म्ह, अर सारे मिस्र देश म्ह डांसां के टोळ के टोळ भरगे, अर डांसां के मारे वो देश नाश होया।
फेर फिरौन नै मूसा अर हारुन तै बुलवाकै कह्या, “थम जाकै अपणे परमेसवर की खात्तर इस्से देश म्ह बलिदान करो।” पर मूसा नै कह्या, “इसा करणा ठीक न्ही; क्यूँके हम जो अपणे परमेसवर यहोवा कै खात्तर चीज बलिदान चढ़ावांगें वो मिस्रियाँ कै खात्तर घृणित होवैगी; अर जै हम मिस्रियाँ कै देखदे उनकी नजरां म्ह घृणित चीज बलिदान करां तो के वे म्हारै पै पथराव न्ही करैंगें? हम जंगळ-बियाबान म्ह तीन दिन कै राह पै जाकै अपणे परमेसवर यहोवा कै खात्तर जिसा वो म्हारै तै कहवैगा उस्से तरियां बलिदान करागें।” फिरौन नै कह्या, “मै थारे ताहीं जंगळ-बियाबान म्ह जाण दियुँगा के थम अपणे परमेसवर यहोवा कै खात्तर जंगळ-बियाबान म्ह बलिदान करो; सिर्फ घणी दूर न्ही जाणा, अर मेरै खात्तर बिनती करो।” फेर मूसा नै कह्या, “सुण, मै तेरे धोरै तै बाहर जाकै यहोवा तै बिनती करुँगा के डांसां के टोळ तेरे, अर तेरे कर्मचारियाँ, अर प्रजा कै धोरै तै कल ए दूर हों; पर फिरौन आग्गै तै कपट करकै हमनै यहोवा कै खात्तर बलिदान करण नै जाण देण कै खात्तर मना ना करै।” आखर म्ह मूसा नै फिरौन कै धोरै तै बाहर जाकै यहोवा तै बिनती करी। अर यहोवा नै मूसा के कहे कै मुताबिक डांसां के टोळां ताहीं फिरौन, अर उसके कर्मचारियाँ, अर उसकी प्रजा तै दूर करया; उरै तक के एक भी न्ही रह्या। फेर फिरौन नै इब कै भी अपणे मन ताहीं कठोर करया, अर उन माणसां ताहीं जाण न्ही दिया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.