Haryanvi Bible
निर्गमन 38
होमबलि की वेदी
फेर उसनै किक्कर की लाकड़ी की होमबलि कै खात्तर वेदी भी बणाई; उसकी लम्बाई पाँच हाथ अर चौड़ाई पाँच हाथ की थी; इस तरियां तै वो चकोर बणी, अर ऊँचाई तीन हाथ की थी। अर उसनै उसके च्यांरु कुण्यां पै उसके च्यार सींग बणाए, वे उसकै गैल बिना जोड़ के बणे; अर उसनै उस ताहीं पीत्तळ तै मढ़यां। अर उसनै वेदी की सारी चीज, यानिके उसकी हांडी, फावड़ियाँ, कटोरे, काँटें, अर कड़छियाँ ताहीं बणाया। उसकी सारी चीज उसनै पीत्तळ की बणाई। अर वेदी कै खात्तर उसकै चौगरदे की कँगणी कै तळै उसनै पीत्तळ की जाळी की एक झंझरी बणाई, वा तळै तै वेदी की ऊँचाई कै बीच तक पोहची। अर उसनै पीत्तळ की झंझरी कै च्यांरु कुण्यां कै खात्तर च्यार कड़े ढाळे, जो डण्ड्याँ के खान्नयां का काम देवै। फेर उसनै डंड्यां ताहीं किक्कर की लाकड़ी का बणाया, अर पीत्तळ तै मढ़यां। फेर उसनै डण्ड्याँ ताहीं वेदी की ओड़ कै कड़यां म्ह वेदी कै ठाण कै खात्तर डाल दिया। वेदी ताहीं उसनै तख्तां तै खोखळी बणाया।
पीतळ की हौदी
उसनै हौदी अर उसके पाये दोन्नु पीत्तळ कै बणाए, यो मिलापआळे तम्बू के दरबाजे पै सेवा करण आळी जनानियाँ के पीत्तळ के शिशयां कै खात्तर बणाए गये।
पवित्रस्थान का आँगण
फेर उसनै आँगण बणाया; अर दक्षिण की ओड़ कै खात्तर आँगण के पड़दे बटी होई सूक्ष्म सणी के कपड़े के थे, अर सारे मिलाकै सौ हाथ लाम्बे थे; उनकै खात्तर बीस खम्भे, अर इनके पीत्तळ के बीस पावे बणे; अर खम्भे की घुंडी अर जोड़ण की छड़ चाँदी की बणी। अर उत्तर की ओड़ कै खात्तर भी सौ हाथ लाम्बे पड़दे बणे; अर उनकै खात्तर बीस खम्भे, अर इनके पीत्तळ के बीस पावे बणे, अर खम्भ्यां की घुंडियाँ अर जोड़ण की छड़ चाँदी की बणी। अर पश्चिम ओड़ कै खात्तर सारे पड़दे मिलाकै पचास हाथ कै थे; उनकै खात्तर दस खम्भे, अर दस ए उनके पावे थे, अर खम्भ्यां की घुंडियाँ अर जोड़ण की छड़ चाँदी की थी। अर पूरब की ओड़ भी वो पचास हाथ कै थे। आँगण के दरबाजे कै एक ओड़ कै खात्तर पन्द्रह हाथ के पड़दे बणे; अर उनकै खात्तर तीन खम्भे अर तीन पावे थे। अर आँगण के दरबाजे के दुसरी ओड़ भी उस्से तरियां ए बण्या था; अर आँगण के दरबाजे कै आस्सै-पास्सै पन्द्रह-पन्द्रह हाथ के पड़दे बणे थे; अर उनकै खात्तर तीन-तीन खम्भे, अर तीन-तीन इनके पावे भी थे। आँगण के चौगरदे के सारे पड़दे सूक्ष्म बटी होई सणी के कपड़यां के बणे होए थे। अर खम्भ्यां के पावे पीत्तळ के, अर घुंडी अर छड़ चाँदी की बणी, अर उनके सिरे चाँदी तै मढ़े गये, अर आँगण के सारे खम्भे चाँदी की छड़ां तै जोड़े गये थे। आँगण के दरबाजे के पड़दे पै बेलबूट्टे का काम करया होया था, अर वो नीले, बैंगणी अर लाल रंग के कपड़े का; अर सूक्ष्म बटी होई सणी के कपड़े के बणे थे; अर उसकी लम्बाई बीस हाथ की थी, अर उसकी ऊँचाई आँगण की कनात की चौड़ाई की तरियां पाँच हाथ की बणी। अर उनकै खात्तर च्यार खम्भे, अर खम्भ्यां के च्यार ए पावे पीत्तळ के बणे, उनकी घुंडी चाँदी की बणी, अर उनके सिरे चाँदी तै मढ़े गये, अर उनकी छड़ चाँदी की बणी। अर निवास की अर आँगण कै चौगरदे के सारे खूँटे पीत्तळ कै बणे थे।
धातुआं का ब्यौरा
साक्षीपत्र कै मिलापआळे तम्बू का सामान जो लेवियाँ कै सेवा के काम खात्तर बण्या; अर जिसकी गिणती हारुन याजक के बेट्टे ईतामार के जरिये मूसा कै कहण तै होई थी, उसका ब्यौरा यो सै। जिस-जिस चीज कै बणाण का हुकम यहोवा नै मूसा तै दिया था उसनै यहूदा कै गोत्र आळे बसलेल नै, जो हूर का पोत्ता अर ऊरी का बेट्टा था, बणा दिया। अर उसकै गैल दान के गोत्र आळे, अहीसामाक का बेट्टा, ओहोलीआब था, जो नक्काशी करण अर काढ़ण आळा अर नीले, बैंगणी अर लाल रंग के अर सूक्ष्म सणी के कपड़े म्ह कढ़ाई करण आळा माहिर कारीगर था।
पवित्र स्थान के सारे काम म्ह जो भेंट का सोन्ना लाग्या वो पवित्र स्थान के शेकेल कै हिसाब तै उणतीस किक्कार1 अर सात सौ तीस शेकेल2 था। अर मण्डळी के गिणे होए माणसां की भेंट की चाँदी पवित्र स्थान के शेकेल कै हिसाब तै सौ किक्कार3, अर सत्तरा सौ पिचेहत्तर शेकेल4 थी। यानिके जितने बीस साल के अर उसतै घणी उम्र के गिणे गये थे, वे छः लाख तीन हजार साढ़े पाँच सौ माणस थे, अर एक-एक माणस की ओड़ तै पवित्र स्थान के शेकेल कै मुताबिक आध्धा शेकेल5, जो एक बेका होवै सै, मिल्या। अर वो सौ किक्कार चाँदी पवित्र स्थान अर बीच आळे पड़दे खात्तर अर तखत्याँ के दोन्नु पावे ढाळण म्ह लाग्गी; सौ किक्कार तै सौ पावे बणे, एक-एक पावे एक किक्कार6 के बणे। अर सत्तरा सौ पिचेहत्तर शेकेल7 जो बचगे उनतै खम्भ्यां की घुंडी बणाई गई, अर खम्भ्यां की चोट्टी मढ़ी गई, अर उनकी पट्टी भी बणाई गई। अर भेंट का पीत्तळ सत्तर किक्कार8 अर दो हजार च्यार सौ शेकेल था; इसतै मिलापआळे तम्बू के खम्भे के पावे बणवाए, अर पीत्तळ की वेदी, पीत्तळ की झंझरी, अर वेदी की सारी चीज; अर आँगण कै चौगरदे के पावे, अर उसके दरबाजे खात्तर, अर मिलापआळे तम्बू के अर आँगण कै चौगरदे के खूँटे भी बणाए गये।
Source notes (8)
- Footnote उणतीस किक्कार लगभग 991 किलोग्राम
- Footnote सात सौ तीस शेकेल लगभग 9 किलोग्राम
- Footnote सौ किक्कार लगभग 3,400 किलोग्राम
- Footnote सत्तरा सौ पिचेहत्तर शेकेल लगभग 30 किलोग्राम
- Footnote आध्धा शेकेल लगभग 5.7 ग्राम
- Footnote एक किक्कार लगभग 34 किलोग्राम
- Footnote सत्तरा सौ पिचेहत्तर शेकेल लगभग 30 किलोग्राम
- Footnote सत्तर किक्कार लगभग 2,425 किलोग्राम
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.