Haryanvi Bible
निर्गमन 37
करार का सन्दूक बणाया जाणा
फेर बसलेल नै किक्कर की लाकड़ी का सन्दूक बणाया; उसकी लम्बाई ढाई हाथ, चौड़ाई डेढ़ हाथ, अर ऊँचाई डेढ़ हाथ की थी। उसनै उस ताहीं भित्तर-बाहर शुद्ध सोन्ने तै मढ़यां, अर उसकै चौगरदे नै सोन्ने की बाड़ बणाई। अर उसकै च्यांरु पायां पै लगाण खात्तर उसनै सोन्ने के च्यार कड़े ढाळे, दो कड़े एक ओड़ अर दो कड़े दुसरी ओड़ लाग्गे। फेर उसनै किक्कर के डण्डे बणाए, अर उन ताहीं सोन्ने तै मढ़यां, अर उन ताहीं सन्दूक के दोन्नु ओड़ कै कड़यां म्ह पाया के उनकै बळ सन्दूक ठाया जावै। फेर उसनै शुद्ध सोन्ने के प्रायश्चित आळे ढक्कण ताहीं बणाया; उसकी लम्बाई ढाई हाथ अर चौड़ाई डेढ़ हाथ की थी। अर उसनै सोन्ना गढ़कै दो करूब प्रायश्चित के ढक्कण कै दोन्नु सिरयां पै बणाए; एक करूब तो एक सिरा पै, अर दूसरा करूब दूसरा सिरा पै बण्या; उसनै उन ताहीं प्रायश्चित कै ढक्कण कै गेल्या एक ए टुकड़े के दोन्नु सिरयां पै बणाया। अर करूबां कै पंख उप्पर तै फैल्ले होए बणे, अर उनके पंखां तै प्रायश्चित का ढकणा ढक्या होया बण्या, अर उनके मुँह आम्ही-स्याम्ही अर प्रायश्चित के ढक्कण की ओड़ करे होए बणे।
पवित्र मेज का बणाया जाणा
फेर उसनै किक्कर की लाकड़ी की मेज बणाई; उसकी लम्बाई दो हाथ, चौड़ाई एक हाथ, अर ऊँचाई डेढ़ हाथ की थी; अर उसनै उस ताहीं शुद्ध सोन्ने तै मढ़यां, अर उस म्ह चौगरदे नै शुद्ध सोन्ने की एक बाड़ बणाई। अर उसनै उसकै खात्तर च्यार आंगळ चौड़ी एक पटड़ी, अर इस पटड़ी कै खात्तर चौगरदे सोन्ने की एक बाड़ बणाई। अर उसनै मेज कै खात्तर सोन्ने के च्यार कड़े ढाळ कै उन च्यांरु कुण्यां म्ह लगाया, जो उसकै च्यांरु पायां पै थे। वे कड़े पटड़ी कै धोरै मेज ठाण के डण्ड्याँ के खान्नयां का काम देण नै बणे। अर उसनै मेज ठाण कै खात्तर डण्ड्याँ ताहीं किक्कर की लाकड़ी के बणाया, अर सोन्ने तै मढ़यां। अर उसनै मेज पै का सामान यानिके परात, धूपदान, कटोरे, अर उडेलण के बरतन सारे शुद्ध सोन्ने के बणाए।
सोन्ने की दीवट का बणाया जाणा
फेर उसनै शुद्ध सोन्ना गढ़कै पाये अर डण्डी सुधा दीवट ताहीं बणाया; उसके पुष्पकोष, गाँठ, अर फूल सारे एक ए टुकड़े के बणे। अर दीवट तै लिकड़ी होई छः डाळी बणी; तीन डाळी तो उसकी एक ओड़ तै अर तीन डाळी उसकी दुसरी ओड़ तै लिकड़ी होई बणी। एक-एक डाळी म्ह बदाम के फूल जिस्से तीन-तीन पुष्पकोष, एक-एक गाँठ, अर एक-एक फूल बण्या; दीवट तै लिकड़ी होई, उन छहों डाळियाँ का योए आकार होया। अर दीवट की डण्डी म्ह बदाम के फूल की ढाळ अपणी-अपणी गाँठ अर फूल सुधा च्यार पुष्पकोष जिसे कटोरे बणे। अर दीवट तै लिकड़ी होई छहों डाळियाँ म्ह तै दो-दो डाळी कै तळै एक-एक गाँठ दीवट की गैल एक ए टुकड़े की बणी। पुष्प-गाँठ अर डाळी सारी दीवट कै गैल एक ए टुकड़े की बणी; सारी दीवट गढ़े होए शुद्ध सोन्ने की अर एक ए टुकड़े की बणी। अर उसनै दीवट के सात्तु दीवे, अर गुलतराश, अर गुलदान, शुद्ध सोन्ने के बणाए। उसनै सारे सामान सुधा दीवट ताहीं किक्कार1 भर सोन्ने की बणाई।
धूपवेदी का बणाया जाणा
फेर उसनै किक्कर की लाकड़ी की धूप की वेदी भी बणाई; उसकी लम्बाई एक हाथ अर चौड़ाई एक हाथ की थी; वो चकोर बणी, अर उसकी ऊँचाई दो हाथ की थी; अर उसके सींग उसकै गैल बिना जोड़कै बणे थे उप्पर आळे पल्यां, अर चौगरदे के बाजुआं अर सीन्गां सुधा उसनै उस वेदी ताहीं शुद्ध सोन्ने तै मढ़यां; अर उसकै चौगरदे नै सोन्ने की एक बाड़ बणाई, अर उस बाड़ कै तळै उसकै दोन्नु पल्यां पै उसनै सोन्ने के दो कड़े बणाए, जो उसकै ठाण के डण्ड्याँ कै खान्नयां का काम दें। अर डण्ड्याँ ताहीं उसनै किक्कर की लाकड़ी का बणाया, अर सोन्ने तै मढ़यां।
अर उसनै अभिषेक का पवित्र तेल, अर सुगन्ध-द्रव्य का धूप गंधी की रीति कै मुताबिक बणाया।
Source notes (1)
- Footnote किक्कार 35 किलोग्राम
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.