Haryanvi Bible
एस्तेर 2
एस्तेर का पटराणी बणाया जाणा
इन बात्तां कै बाद जिब राजा क्षयर्ष का छो ठण्डा होग्या, तो उसनै राणी वशती की, अर जो काम उसनै करया था, अर जो उसकै बारै म्ह हुकम लिकड्या था उसकी भी सुधि ली। फेर राजा के सेवक जो उसके सेवादार थे, कहण लाग्गे, “राजा कै खात्तर सुथरी अर जवान कुवारी ढूँढ़ी जावैं। अर राजा नै अपणे राज्य के सारे प्रान्तां म्ह माणसां ताहीं ज्यांतै ठैहराया कै वे सारी सुथरी जवान कुँवारियाँ नै शूशन गढ़ के रणवास म्ह कठ्ठा करैं अर कुँवारियाँ की देखभाळ हेगे ताहीं जो राजा का खोजा था सौंप दें; अर शुद्ध करण कै खात्तर सारी चीज उन ताहीं दी जावैं। फेर उन म्ह तै जो कुँवारी राजा की नजर म्ह खास ठैहरै, वा राणी वशती की जगहां पै पटराणी बणाई जावै।” या बात राजा नै पसन्द आई अर उसनै इसाए करया।
शूशन गढ़ म्ह मोर्दकै नाम का एक यहूदी रह्या करदा, जो कीश नाम के एक बिन्यामीनी का पड़पोत्ता, शिमी का पोत्ता, अर याईर का बेट्टा था। वो उन बन्दियाँ कै गैल यरुशलेम तै बँधुआई म्ह गया था, जिननै बाबेल का राजा नबूकदनेस्सर, यहूदा के राजा यकोन्याह कै गैल बन्दी बणाकै लेग्या था। उसनै हदास्सा नाम की अपणी चचेरी भाण ताहीं, जो एस्तेर भी कुहाया करदी, पाळया-पोस्या था; क्यूँके उसके माँ-बाप कोए ना थे, अर वो छोरी सुथरी अर रुपवती थी, अर जिब उसके माँ-बाप मरगे, फेर मोर्दकै नै उस ताहीं अपणी बेट्टी करकै पाळ्या। जिब राजा का हुकम अर नियम सुणाए गए, अर भोत सी जवान कुँवारी, शूशन गढ़ म्ह हेगे के हक म्ह कठ्ठी करी गई, फेर एस्तेर भी राजभवन म्ह कुँवारियाँ के देखभाळ करण आळे हेगे कै हक म्ह सौंपी गई। वा छोरी उसकी नजर म्ह आच्छी लाग्गी; अर वो उसतै खुश होया, फेर उसनै बिना देर उस ताहीं राजभवन म्ह तै शुद्ध करण की सारी चीज, अर उसका खाणा, अर उसकै खात्तर चुणी होई सात सहेली भी दी, अर उसनै अर उसकी सहेलियाँ ताहीं रणवास म्ह सबतै आच्छी रहण की जगहां दी। एस्तेर नै ना अपणी जात बताई थी, ना अपणा कुल; क्यूँके मोर्दकै नै उसतै हुकम दिया था, के उस नै ना बतावै। मोर्दकै तो रोज रणवास के आँगण कै स्याम्ही फिरया करदा ताके जाण सकै के एस्तेर किसी सै अर उसकै गैल के हो रह्या सै?
जिब एक-एक छोरी की बारी आई, के वा क्षयर्ष राजा कै धोरै जावै, अर यो उस बखत होया जिब उसकै गैल जनानियाँ कै खात्तर ठहराए होए नियम कै मुताबिक बाराह महिन्ने ताहीं बरताव करया गया था; यानिके उनके शुद्ध करण के दिन इस रीति तै बीतगे, के छः महिन्ने ताहीं गन्धरस का तेल लगाया जान्दा, अर छः महिन्ने ताहीं सुगन्ध-द्रव्य, अर जनानियाँ के शुद्ध करण का और सामान लगाया जान्दा। इस तरियां तै वा छोरी जिब राजा कै धोरै जाया करदी, फेर जो कुछ वा चाहन्दी के रणवास तै राजभवन म्ह ले जावै, वो उसतै दिया जाया करदा। साँझ नै तो वा जान्दी अर सबेरै नै वा बोहड़कै रणवास के दुसरे घर म्ह जाकै रखैल्लां के देखभाळ करण आळे राजा के खोजे शाशगज के अधिकार म्ह हो जाया करदी, अर राजा कै धोरै फेर न्ही जाया करदी। अर जै राजा उसतै खुश हो जाया करदा, फेर वा नाम लेकै बुलाई जाया करदी।
जिब मोर्दकै के चाचा अबीहैल की बेट्टी एस्तेर, जिस ताहीं मोर्दकै नै बेट्टी मानकै राख्या था, उसकी बारी आई के राजा कै धोरै जावै, फेर जो कुछ जनानियाँ की देखभाळ करण आळे राजा के खोजे हेगे नै उसकै खात्तर ठैहराया था, उसतै घणा उसनै और किमे न्ही मांग्या। जितन्या नै एस्तेर ताहीं देख्या, वे सारे उसतै खुश होए। आखर एस्तेर राजभवन म्ह राजा क्षयर्ष कै धोरै उसके राज्य के सातवें साल के तेबेत1 नाम के दसवें महिन्ने म्ह पोहचाई गई। अर राजा नै एस्तेर तै और सारी जनानियाँ तै घणा प्यार करया, अर और सारी कुँवारियाँ तै घणी उसके अनुग्रह अर दया की नजर उसे पै होई, इस कारण उसनै उसके सिर पै राजमुकुट धरया अर उस ताहीं वशती की जगहां पै राणी बणाया। फेर राजा नै अपणे सारे हाकिमां अर कर्मचारियाँ ताहीं एक बड़ा भोज दिया, अर उस ताहीं एस्तेर का भोज कह्या; अर प्रान्तां म्ह छुट्टी होई, अर अपणी उदारता कै लायक ईनाम भी बाँटे। जिब कुँवारी दुसरी बार कठ्ठी करी गई, फेर मोर्दकै राजभवन के फाटक म्ह बैठ्या था। एस्तेर नै अपणी जात अर कुल का पता न्ही दिया था, क्यूँके मोर्दकै नै उस ताहीं इसा हुकम दिया था के ना बतावै; अर एस्तेर मोर्दकै की बात इसी मान्या करदी जिस तरियां के उसके उरै अपणे पालन-पोषण के बखत मान्या करदी। उन्हे दिनां म्ह जिब मोर्दकै राजा के राजभवन के फाटक म्ह बैठ्या करया करदा, फेर राजा के खोजे जो द्वारपाल भी थे, उन म्ह तै बिगताना अर तेरेश नाम के दो जण्या नै राजा क्षयर्ष तै नाराज होकै उसपै हाथ चलाण की योजना बणाई। या बात मोर्दकै नै सुण ली, अर उसनै एस्तेर राणी ताहीं या बात बताई, अर एस्तेर नै मोर्दकै का नाम लेकै राजा ताहीं बताया। फेर जाँच पड़ताळ होण पै या बात सच लिकड़ी अर वे दोन्नु पेड़ पै लटका दिए गए, अर यो हाल राजा कै स्याम्ही इतिहास की किताब म्ह लिख लिया गया।
Source notes (1)
- Footnote तेबेत आध्धा दिसम्बर तै आध्धी जनवरी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.